ಶಿವನ 3ನೇ ಕಣ್ಣು ಜಟೆ ತ್ರಿಶೂಲದಲ್ಲೆಲ್ಲ ಜೀವನದ ಈ 10 ಮುಖ್ಯವಾದ ಸಂದೇಶಗಳು ಅಡಗಿ ಕೂತಿವೆ

ಸಾಮಾನ್ಯವಾಗಿ ಇದು ಯಾರಿಗೂ ಗೊತ್ತಿರಲ್ಲ

ನಮ್ಮ ದೇವ್ರುಗಳಲ್ಲಿ ಭಾಳ ಬೇಗ ಒಲಿಯೋನು ಅಂದ್ರೆ ಶಿವ. ಭಕ್ತಿವಂತರಿಗೆ ಬೇಡಿದ್ದು ಕೊಡ್ತಾನೆ ಹಾಗೆ ಕೆಟ್ಟೋರಿಗೆ ಶಿಕ್ಷೆನೂ ಕೊಡ್ತಾನೆ. ಪುರಾಣದಲ್ಲಿ ಶಿವ ಅಂದ್ರೆ ಜಟಾಧಾರಿ, ತ್ರಿಶೂಲ ಹಿಡ್ಕೊತಾನೆ, ಮೈಗೆ ಭಸ್ಮ ಹಚ್ಚ್ಕೊತಾನೆ, ತಲೇಲಿ ಗಂಗೆ ಇರ್ತಾಳೆ, ಕತ್ತಿಗೆ ಹಾವು ಸುತ್ತ್ಕೊತಾನೆ....ಹೀಗೆಲ್ಲಾ ವರ್ಣನೆ ಮಾಡಿದಾರೆ. ನೋಡಕ್ಕೆ ವಿಚಿತ್ರವಾದ್ರೂ ಅದೇ ಒಂದೊಂದಾಗಿ ಬಿಡಿಸಿ ಹೀಗೆ ಯಾಕಿದಾನೆ ಅಂತ ತಿಳ್ಕೊಳ್ಳೊ ಪ್ರಯತ್ನ ಮಾಡಿದಾಗ ಜೀವನದ ಪಾಠಗಳನ್ನ ಕಲಿಸತ್ತೆ. ಮುಂದೆ ಓದಿ...

1. ಜಟೆ - "ಶಾಂತಿ ಸಮಾಧಾನದಿಂದ ಮಾಡಿದರೆ ಯಾವ ಕೆಲ್ಸ ಬೇಕಾದ್ರೂ ಸಾಧ್ಯ"

ದೇಹ, ಮನಸ್ಸು ಮತ್ತೆ ಆತ್ಮದ ಏಕಿಕರಣದ ಪ್ರತಿಬಿಂಬ ಶಿವನ ಜಟೆ.

ಪರೀಕ್ಷೆ ಪಾಸ್ ಮಾಡ್ಬೇಕು, ಆರೋಗ್ಯ ಸುಧಾರಿಸ್ಕೊಬೇಕು, ಕೆಲ್ಸದಲ್ಲಿ ಏಕಾಗ್ರತೆ ಬೆಳಸ್ಕೊಬೇಕು...ಈ ಸಂದರ್ಭಗಳಲ್ಲಿ ನಮ್ಮ ದೇಹ, ಮನ್ಸ್ಸು ಹಾಗೂ ಅಂತರಾತ್ಮ ಮೂರು ಒಂದೇ ದಿಕ್ಕಿನಲ್ಲಿ ಇರ್ಬೇಕು, ಶಾಂತಿ ಸಮಾಧಾನದಿಂದ ಇರ್ಬೇಕು. ಹೀಗಿದ್ರೆ ದೇಹದಲ್ಲಿ ಒಳ್ಳೆ ಹಾರ್ಮೋನ್ಗಳು ಬಿಡುಗಡೆ ಆಗತ್ವೆ, ಮನಸ್ಸಿಗೆ ಖುಷಿ ಆಗತ್ತೆ. ಇಮ್ಮ್ಯೂನಿಟಿ ಜಾಸ್ತಿ ಆಗತ್ತೆ. ಜೀವನದಲ್ಲಿ ಏನೇ ಕಷ್ಟ ಬಂದ್ರೂ ಎದುರಿಸಕ್ಕೆ ರೆಡಿ ಆಗ್ತೀವಿ, ಅದು ಕಷ್ಟ ಅನ್ಸೋದೇ ಇಲ್ಲ.

2. ಮೂರನೇ ಕಣ್ಣು - "ಕಣ್ಣಲ್ಲಿ ನೋಡಿದ್ದನ್ನ ನಂಬದೆ ಮನಸ್ಸಿಂದ ಅರ್ಥ ಮಾಡ್ಕೊಬೇಕು"

ಶಿವನ ಮೂರನೇ ಕಣ್ಣು ಸಮಸ್ಯೆಗಳನ್ನ ನೋಡೊ ರೀತಿ ಹೇಳುತ್ತೆ. ಜೊತೇಲಿ ಅದನ್ನ ಪರಿಹರಿಸೋಕೆ ದಾರಿ ಕೂಡ ತೊರ್ಸುತ್ತೆ.

ಜೀವನದಲ್ಲಿ ಯಾವುದೇ ತೊಂದ್ರೆ ಬಂದಾಗ ಎರಡು ಕಣ್ಣಿಗೆ ಏನ್ ಕಾಣಿಸತ್ತೋ ಅದರ ಜೊತೆ ಇನ್ನೂ ಏನಿದೆ ಅಂತ ಯೋಚ್ನೆ ಮಾಡಿ ಅದೇನು ಅದರ ಹಿಂದಿನ ಕಾರಣವೇನು, ಸಮಸ್ಯೆ ಹೆಂಗೆ ಬಗೆಹರಿಸಿದ್ರೆ ಎಲ್ಲರಿಗೂ ಒಳ್ಳೆದು ಅನ್ನೋದರ ಸಂಕೇತ.

3. ತ್ರಿಶೂಲ - "ಅಹಂಕಾರ ಬಿಟ್ಟು ಕೆಲ್ಸ ಮಾಡಬೇಕು"

ಮನುಷ್ಯನ ಮನಸ್ಸು, ಬುದ್ಧಿ ಹಾಗೆ ಅಹಂಕಾರದ ಪ್ರತೀಕ ತ್ರಿಶೂಲ. ಶಿವ ತನ್ನ ಅಹಂಕಾರಾನ ಮೆಟ್ಟಿ ನಿಂತಿದ್ದಾನೆ. ಬೇರೇಯೋರ ಅಹಂಕಾರನೂ ಅವ ಸಹಿಸೊಲ್ಲ.

ನಮ್ ಜೀವನದಲ್ಲಿ ಅಹಂ ಬಿಟ್ಟು ಕೆಲ್ಸ ಮಾಡಿದಾಗ ಇನ್ನೂ ಎತ್ತರಕ್ಕೇರ್ತೀವಿ. ಕೆಲಸ ಸಮರ್ಥವಾಗಿ ಮಾಡ್ತೀವಿ.

4. ಧ್ಯಾನದ ಭಂಗಿ - "ಏಕಾಗ್ರತೆಗೆ ಧ್ಯಾನ ಮಾಡಬೇಕು"

ಅವನು ಧ್ಯಾನಕ್ಕೆ ಕೂರೋ ಭಂಗಿ ದಿನ ನಿತ್ಯದ ಜಂಜಾಟದಲ್ಲಿ ತಾಳ್ಮೆ ಹೇಳಿಕೊಡುತ್ತೆ.

5. ವಿಭೂತಿ - "ಎಲ್ಲವೂ ಕ್ಷಣಿಕ"

ಜೀವನದಲ್ಲಿ ಎಲ್ಲವೂ ಕ್ಷಣಿಕ ಅನ್ನೋದು ವಿಭೂತಿಯ (ಭಸ್ಮ) ಸಂಕೇತ. 

ಜೀವನದಲ್ಲಿ ಸುಖವಾಗಿರಕ್ಕೆ ಏನ್ ಬೇಕೋ ಮಾಡಿ - ಚೆನ್ನಾಗಿ ಕಾಣ್ಸಕ್ಕೆ, ದುಡ್ಡು ಸಂಪಾದನೆ ಮಾಡಕ್ಕೆ. ಆದ್ರೆ ಅದೇ ಒಂದು ಗೀಳಾಗಿ ನಿಮ್ ದೇಹ ಮನಸ್ಸು ಹಾಳಗ್ಬಾರ್ದು ಅಂತ ಪಾಠ ಹೇಳತ್ತೆ.

6. ನೀಲಕಂಠ - "ಬರೋ ಕೋಪಾನ ಒಳ್ಳೇದಕ್ಕೆ ಉಪ್ಯೋಗಿಸಬೇಕು"

ಕೋಪ ನುಂಗಿ, ಅದನ್ನ ಸಕಾರತ್ಮಕವಾಗಿ ಬಳಸಿ, ಯಾರಿಗೂ ತೊಂದರೆ ಮಾಡದೆ ಅದರಿಂದ ಒಳ್ಳೇದು ಮಾಡಿ ಅನ್ನೋದರ ಸಂಕೇತ.

7. ಢಮರುಗ - "ವ್ಯಾಯಾಮ ಮಾಡಿ ದೇಹ ಮತ್ತು ಮನಸ್ಸನ್ನ ಶುದ್ಧ ಮಾಡ್ಕೋಬೇಕು"

ದೇಹನ ರೋಗ - ರುಜಿನದಿಂದ ದೂರ ಇಟ್ಟು ಶುದ್ಧವಾಗಿಡೋದರ ಸಂಕೇತ.

8. ಗಂಗಾಧರ - "ನಿರ್ಧಾರಗಳನ್ನ ತೊಗೊಬೇಕಾದ್ರೆ ಚಿಕ್ಕ ಚಿಕ್ಕ ವಿಷಯಾನೂ ಗಮನಿಸಬೇಕು"

ತಲೆ ಮೇಲಿರೋ ಗಂಗೆ ಸಂಕೇತ ಅಂಧತೆ ಕೊನೆ ಆಗಿ ಜ್ಞಾನ ಬೆಳೀಬೇಕು ಅಂತ. ಯಾವುದೇ ಕೆಲ್ಸ ಮಾಡೊಕ್ಕೆ ಮುಂಚೆ ಸಾಕಷ್ಟು ರಿಸರ್ಚ್ ಮಾಡಿ. ಸುಮ್ನೆ ಏನೂ ಗೊತ್ತಿಲ್ಲದೆ ಮುನ್ನುಗೋದು ಬೇಡ, ಆಮೇಲೆ ಪಶ್ಚಾತಾಪ ಪಡೋದು ಬೇಡ ಅನ್ನೋ ಪಾಠ ಕಲ್ಸತ್ತೆ.

9. ಕಮಂಡಲ - "ನಕಾರಾತ್ಮಕ ಭಾವನೆಗಳನ್ನ ಬಿಸಾಕಬೇಕು"

ಕಮಂಡಲ ದೇಹದಲ್ಲಿರೋ ಕೆಟ್ಟದೆಲ್ಲಾ ತೆಗೆದು ಹಾಕೋದರ ಸಂಕೇತ.

ಮನಸ್ಸು ದೇಹದಲ್ಲಿ ಬರೋ ನಕಾರಾತ್ಮಕ ಶಕ್ತಿಗಲನ್ನ ಆಚೆ ಹಾಕೊ ಪ್ರಯತ್ನ ಮಾಡಿ ಶುದ್ಧವಾಗಿ. ಇದ್ರಿಂದ ಅರೋಗ್ಯ ಕೂಡ ಕಾಪಾಡ್ಕೊಳ್ಳಿ ಅಂತ ಹೇಳತ್ತೆ.

10. ಕತ್ತಿನಲ್ಲಿ ಹಾವು - "ಕೋಪ, ದುಃಖ, ಹತಾಶೆ ಭಾವನೆಗಳನ್ನ ಹದ್ದುಬಸ್ತಿನಲ್ಲಿ ಇಟ್ಕೋಬೇಕು"

ಕೋಪ, ದುಃಖ, ಬೇಸರ, ಹತಾಶೆ..ಈ ತರದ ಭಾವನೆ ಮನಸ್ಸಿಗೆ ಖುಷಿ ಕೊಡಲ್ಲ. ಆದಷ್ಟು ಆಗದೇ ಇರೋ ಹಾಗೆ ಕಂಟ್ರೋಲ್ ಮಾಡ್ಬೇಕು. ಆದ್ರೆ ವಿಧಿಯಿಲ್ಲದೆ ಜಾಸ್ತಿ ಆದಾಗ ಗಂಟಲೊಳಗಡೇನೇ ಇಟ್ಕೊಂಡ್ರೆ ಆರೋಗ್ಯ ಹಾಳು. ಆಚೆ ಹಾಕಿ, ಮನಸ್ಸು ಹಗೂರ ಮಾಡ್ಕೊಳಿ ಅಂತ ಪಾಠ ಹೇಳತ್ತೆ.

ಇಷ್ಟು ಓದಿದ್ಮೇಲೆ ಶಿವ ಶಿವ ಅಂದಾಗಲೆಲ್ಲ ಈ ಮಾತುಗಳು ನೆನಪಾಗಿ ಜೀವನ ಇನ್ನಷ್ಟು ಅರ್ಥ ಆಗುತ್ತೆ.

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ:

ಕುರುವಂಶಕ್ಕೆ ನಾಂದಿ ಹಾಡಿದ ಈ ರಾಜ ರಾಣಿ ಕಥೆ ಕೇಳಿ ಮಹಾಭಾರತ ಇನ್ನಷ್ಟು ಅರ್ಥ ಆಯ್ತು ಅಂತೀರಿ

ವಸಿಷ್ಟರ ಸಹಾಯದಿಂದ...

ಮಹಾಭಾರತ, ಕೌರವರು, ಪಾಂಡವರು ಅಂತ ಓದಿದ್ದೀವಿ, ಕೇಳಿದ್ದೀವಿ. ಕುರುವಂಶದ ಮೂಲ ಏನು? ಕುರುವಂಶ ಹೇಗೆ ಹುಟ್ಟಿದ್ದು? ಕುರುವಂಶ ಯಾರಿಂದ ಶುರು ಆಗಿದ್ದು ? ಇದನ್ನ ಇವತ್ತು ತಿಳ್ಕೊಳೋಣ.

ಸೂರ್ಯನ ಮಗಳು ತಪತಿ

ಸೂರ್ಯ ದೇವನಿಗೆ ಒಬ್ಬಳು ಅತೀ ಸುಂದರ  ಮಗಳು ಇರ್ತಾಳೆ , ಅವಳೇ ತಪತಿ. ಮೂರೂ ಲೋಕದಲ್ಲಿ ಅವಳ ಸೌಂದರ್ಯಕ್ಕೆ ಸರಿಸಾಟಿ ಯಾರೂ ಇರಲಿಲ್ಲ. ಅವಳ ಸೌಂದರ್ಯದ ಬಗ್ಗೆ ಹೇಳೋದಕ್ಕೆ ಪದಗಳೇ ಸಾಲೋದಿಲ್ಲ. ಸೂರ್ಯದೇವನಿಗೆ ಇವಳನ್ನು ಯಾರಿಗೆ ಕೊಟ್ಟು ಮಾಡುವೆ ಮಾಡಬೇಕು ಅನ್ನೋ ಯೋಚ್ನೆ ಶುರು ಆಗುತ್ತೆ. ಅವಳ ಹಾಗೆ ಸ್ಪುರದ್ರೂಪಿಯೂ ಅವಳನ್ನೂ ಹೆಚ್ಚಾಗಿ ಪ್ರೀತಿಸುವ ವರನ್ನು ಹುಡುಕಿ ಮಾಡುವೆ ಮಾಡಿಕೊಡಬೇಕು ಅಂತ ನಿರ್ಧಾರ ಮಾಡ್ತಾನೆ.

ಚಂದ್ರವಂಶದ ರಾಜ ಸಮವರ್ಣ

ಚಂದ್ರ ವಂಶದಲ್ಲಿ ಒಬ್ಬ ರಾಜ ಹುಟ್ಟಿರ್ತಾನೆ, ಅವನೇ ಸಮವರ್ಣ. ಅವನು ಸ್ಪುರದ್ರೂಪಿಯೂ ಸುಂದರವಾದ ಶರೀರವುಳ್ಳವನೂ ಆಗಿರ್ತಾನೆ, ಅಷ್ಟೇ ಅಲ್ಲ ಅವನು ಒಳ್ಳೆ ತಪಸ್ವಿ ಕೂಡ ಆಗಿರ್ತಾನೆ. ಅವನು ಒಳ್ಳೆ ಹೆಸರು, ಗೌರವ ಹಾಗೂ ಯಶಸ್ಸು ಪಡೀಬೇಕು ಅಂತ ಪ್ರತಿನಿತ್ಯವೂ ಅರ್ಘ್ಯ, ಪಾದ್ಯ, ಹೂವು, ಗಂಧ ಮುಂತಾದವನ್ನೆಲ್ಲ ಅರ್ಪಿಸಿ ಸೂರ್ಯದೇವನ ಪೂಜೆ ಮಾಡ್ತಿರ್ತಾನೆ. ಇವನು ಇಡೀ ಜಂಬೂ ದ್ವೀಪಕ್ಕೆ ಅಧಿಪತಿಯಾಗಿರ್ತಾನೆ. ಸ್ನೇಹಿತರಿಗೆ ಚಂದ್ರನಂತೆ ತಂಪಾಗಿದ್ದರೂ ಶತ್ರುಗಳಿಗೆ ಸೂರ್ಯನಷ್ಟೇ ಸುಡ್ತಿರ್ತಾನೆ.

ಒಂದುಸಲ ರಾಜ ಬೆಟ್ಟಗುಡ್ಡಗಳ ಮಧ್ಯೆ ದಟ್ಟ ಕಾಡಿನ ಒಳಗೆ ಹೋಗ್ತಾನೆ

ಕೆಲವು ಮೂಲಗಳ ಪ್ರಕಾರ ಪಾಂಚಾಲ ರಾಜನ ವಿರುದ್ಧ ಯುದ್ಧದಲ್ಲಿ ಸೋಲಿನ ಅವಮಾನದಿಂದ ತಪ್ಪಿಸಿಕೊಳ್ಳೋದಕ್ಕೆ ತಲೆಮರೆಸಿಕೊಂಡು ಹೋದ ಅನ್ನೋ ಉಲ್ಲೇಖ ಇದೆ. ಹೀಗೆ ಕಾದಿಲ್ಲಯ್ಯ ಸುತ್ತಾಡುತ್ತ ನೀರು ಆಹಾರ ಇಲ್ಲದೆ ಅವನ ಕುದುರೆಗಳು ದಾರಿ ಮಧ್ಯೆ ನಿಲ್ಲುತ್ತವೆ. ಅವನ್ನು ಅಲ್ಲೇ ಬಿಟ್ಟು ರಾಜ ಮುಂದೆ ಹೋಗ್ತಾನೆ.

ತಪತಿ ಹಾಗೂ ಸಮವರ್ಣನ ಭೇಟಿಗೆ ಒಂದು ಸಂದರ್ಭ ಕೂಡಿ ಬರತ್ತೆ

ಸುತ್ತಾಟದಿಂದ ಬಳಲಿದ ರಾಜ ನೆಲಕ್ಕೆ ಬೀಳ್ತಾನೆ. ಅವನು ಆಕಾಶದಕಡೆಗೆ ತಿರುಗಿದಾಗ ಪ್ರಕಾಶಮವಾದ ಬೆಳಕೊಂದು ಹೊರಹೊಮ್ಮುತ್ತಿರೋದು ಕಾಣ್ಸುತ್ತೆ. ಕುತೂಹಲದಿಂದ ಹತ್ತಿರ ಬಂದಾಗ, ಯಾವುದೇ ಕೊಂಕಿಲ್ಲದ, ರೂಪವತಿ ಕಾಣಿಸುತ್ತಾಳೆ. ಅವಳ ಸೌನ್ದರ್ಯ ಕಣ್ಣು ಕುಕ್ಕುವಹಾಗಿತ್ತು. ಅವಳ ಹೊಳೆಯುವ ಮೈಕಾಂತಿ ಆ ದಟ್ಟ ಕಾಡಿನಲ್ಲಿ ಆಗತಾನೆ ಸೂರ್ಯೋದಯ ಆಗ್ತಿದೆಯೇನೋ ಅನ್ನೋ ಭಾವನೆ ಮೂಡಿಸುತ್ತಿತ್ತು. ಅವಳ ಚರ್ಮದ ಬಣ್ಣ ಚಿನ್ನದ ಹೊಳಪಿನಂತೆ ಇತ್ತು. ಅವಳ ಸೌಂದರ್ಯಕ್ಕೆ ಮಾರು ಹೋದ ಈ ರಾಜ ಒಂದು ಕ್ಷಣವೂ ಅವಳಿಂದ ದೃಷ್ಟಿ ಬೇರೆ ಕಡೆ ಸರಿಸಲಿಲ್ಲ. ಅವನ ಹೃದಯ ಮನ್ಮಥನ ಬಾಣ ಚುಚ್ಚಿ ನೋವಿನಿಂದ ಒದ್ದಾಡುತ್ತಿರುವಹಾಗಿತ್ತು.  ಅವಳ ಸೌಂದರ್ಯಕ್ಕೆ ಮಾರುಹೋದ ರಾಜನು ಅವಳನ್ನ ನೀನು ಸಾಮಾನ್ಯ ಮ್ಸನುಷ್ಯಳೂ, ಗಂಧರ್ವ ಕನ್ಯೆಯೋ ಅಥವಾ ಯಕ್ಷ ಲೋಕದವಳಂತೆಯೂ ಕಾಣುತ್ತಿಲ್ಲ. ಅಸುರ ಮಾಯೆಯಂತೆಯೂ ಕಾಣುತ್ತಿಲ್ಲ ಯಾಕೆ ಅಂದ್ರೆ ಯಾವುದೇ ಅಸುರ ಶಕ್ತಿಯೂ ನನ್ನ ಹತ್ತಿರ ಸುಳಿಯುವುದಿಲ್ಲ. ನೀನೇನು ಐಶ್ವರ್ಯ ದೇವತೆಯಾ? ಸಾಧ್ಯವಿಲ್ಲ ಯಾಕೆ ಆದ್ರೆ ನಿನ್ನಮೇಲೆ ನನಗೆ ಕಾಮ, ಮೋಹೇ ಹೆಚ್ಚಾಗಿದೆ. ಓ ಅಪ್ರತಿಮ ಸುಂದರಿಯೇ ನೀನು ಯಾರು ? ನನ್ನ ಜೀವನ ಪರ್ಯಂತ ನೀನು ನನ್ನ ಜೊತೆಯಾಗಿರಬೇಕು ಇದುವರೆಗೂ ನನ್ನ ಜೀವನ ಬರಡಾಗಿತ್ತು, ಆದರೆ ನಿನ್ನನ್ನು ನೋಡಿದಮೇಲೆ ನನಗೆ ಜೀವನದಮೇಲೆ ಆಸಕ್ತಿ ಶುರುವಾಗ್ತಿದೆ ಅಂತ ನಿನಗಾಗಿಯೇ ಬದುಕಬೇಕು ಅನ್ನಿಸುತ್ತಿದೆ ಅಂತ ಹೇಳ್ತಾನೆ.

ರಾಜ ಇನ್ನೂ ಮಾತಾಡ್ತಾ ಇರ್ತಾನೆ ಅಷ್ಟ್ರಲ್ಲೇ ತಪತಿ ಮಾಯ ಆಗ್ತಾಳೆ. ರಾಜ ಪ್ರಜ್ಞೆ ಕಳ್ಕೊಂಡು ಕೆಳಗೆ ಬೀಳ್ತಾನೆ

ಮತ್ತೆ ಅಲ್ಲೆಲ್ಲ ಕಟ್ಟಲು ಕವಿಯುತ್ತೆ. ಅವಳ ಕಣ್ಮರೆಯಿಂದ ಬಹಳ ಬೇಸರ ಹಾಗೂ ನೋವಿನಿಂದ ರಾಜ ಪ್ರಜ್ಞೆ ಕಳೆದುಕೊಂಡು ಕೆಳಗೆ ಬೀಳ್ತಾನೆ. ಅವನ ಮನಸ್ಸಿನ ತುಂಬಾ ಅವನು ಈಗತಾನೇ ಭೇಟಿಯಾಗಿದ್ದ ಆ ರೂಪಾವತಿಯ ಧ್ಯಾನವೇ ತುಂಬಿರುತ್ತೆ.

ಇಂತಹ ಒಳ್ಳೆಯ ಸ್ಪುರದ್ರೂಪಿ ರಾಜನು ಜ್ಞಾನವಿಲ್ಲದೆ ಬಿದ್ದಿರುವುದನ್ನು ನೋಡಿ ತಪತಿ ಮತ್ತೊಮ್ಮೆ ಪ್ರತ್ಯಕ್ಷಳಾಗಿ ಅವನಿಗೆ ನೀರು ಚುಮುಕಿಸುತ್ತಾಳೆ, ಅವನಿಗೆ ಜ್ಞಾನ ಬರುತ್ತೆ. ಕಣ್ಬಿಟ್ಟ ಕೂಡಲೇ ತನ್ನ ಪ್ರೇಯಸಿ ನಿಂತಿರುವುದನ್ನು ನೋಡಿ ಅವನಿಗೆ ಅದು ಕನಸೋ ತನ್ನ ಭ್ರಮೆಯೋ ಅನ್ನೋ ಸಂಶಯ ಬರುತ್ತೆ. ಆಗ ತಪತಿಯನ್ನು ತನ್ನ ಭ್ರಮೆ ದೂರ ಮಾಡುವಂತೆ ಕೇಳಿಕೊಳ್ತಾನೆ. ಹಾಗೆಯೆ ಬ್ರಹ್ಮನು ಹೇಗೆ ಕಮಲವನ್ನು ಕಂಡು ಆಕರ್ಷಿತನಾಗಿದ್ದನೋ, ಹಾಗೆಯೆ ನನಗೂ ನಿನ್ನ್ನಮೇಲೆ ಸೆಳೆತ ಇದೆ,

ತಪತಿ ಮತ್ತೆ ಪ್ರತ್ಯಕ್ಷ ಆಗ್ತಾಳೆ. ಆಗ ರಾಜ "ನೀನು ನನ್ನ ಹೆಂಡತಿಯಾಗಿರು" ಅಂತ ಹೇಳ್ತಾನೆ.

ಇದಕ್ಕುತ್ತರವಾಗಿ ತಪತಿಯು, ರಾಜ ಇದು ನಿನ್ನ ಭ್ರಮೆಯಲ್ಲ ವಾಸ್ತವ. ಈ ಮೂರು ಲೋಕದಲ್ಲೇ  ನಿನ್ನಷ್ಟು ಧೈರ್ಯಶಾಲಿ , ಸುಪ್ರಸಿದ್ದ ಹಾಗೂ ಸ್ಪುರದ್ರೂಪಿ ಪುರುಷರು ಯಾರೂ ಇಲ್ಲ. ನೀನು ನನ್ನನ್ನು ಎಷ್ಟು ಪ್ರೀತಿಸುತ್ತೀಯಾ ಅಂತ ನನಗೆ ಗೊತ್ತಿದೆ. ನಾನು ಕಣ್ಮರೆಯಾದ ತಕ್ಷಣ ನೀನು ಜ್ಞಾನ ಕಳೆದುಕೊಳ್ಳುತ್ತಿರುವುದು, ನಿನ್ನನ್ನು ಪಡೆಯಲು ನಾನು ಎಷ್ಟು ಅದೃಷ್ಟಶಾಲಿ ಅಂತ ತಿಳಿಸುತ್ತೆ. ಆದರೆ ನಾನು ಯಾವುದೇ ನಿರ್ಧಾರ ತೆಗದುಕೊಳ್ಳಲ್ಲು ಸ್ವತಂತ್ರಳಲ್ಲ. ನಾನು ನನ್ನ ತಂದೆ ಸೂರ್ಯದೇವನ ನಿರ್ಧಾರದಂತೆ ನಡೆಯುತ್ತೇನೆ, ಅವನು ಒಪ್ಪಿದರೆ ನಾನು ನಿನ್ನ ಚರಣದಾಸಿಯಾಗಿ ಇರುತ್ತೇನೆ ಅಂತ ಹೇಳ್ತಾಳೆ.

https://kathakids.com
ತಂದೆ ಸೂರ್ಯದೇವನ ಒಪ್ಪಿಗೆ ಇಲ್ಲದೆ ಈ ಮದ್ವೆ ನಡೆಯಲ್ಲ ಅಂತ ಹೇಳಿ ತಪತಿ ಅಲ್ಲಿಂದ ಸೂರ್ಯ ಲೋಕಕ್ಕೆ ಹೋಗ್ತಾಳೆ

ರಾಜ ಮತ್ತೆ ಯಾವುದೇ ಚಲನವಲನಗಳಿಲ್ಲದೆ ಕೆಳಗೆ ಬೀಳ್ತಾನೆ. ಇದುವರೆಗೂ ಯಾವುದೇ ದೇವಕನ್ಯೆ ಮನುಷ್ಯನ ಜೊತೆ ವಿವಾಹ ಆಗಿರುವ ಪ್ರಸಂಗವೇ ಇಲ್ಲ. ಸೂರ್ಯ ತನ್ನ ಆರಾಧ್ಯ ದೈವ, ಅವನ ಮಗಳನ್ನು ತನಗೆ ಕೊಡು ಅಂತೇ ಹೇಗೆ ಕೇಳೋದು?  ಆದರೆ ಅವನ ಮನಸ್ಸು ಅವಳನ್ನೇ ಹಂಬಲಿಸುತ್ತಿರುತ್ತೆ, ರಾಜ ಮತ್ತೆ ತನ್ನ ಜ್ಞಾನ ಕಳೆದುಕೊಂಡು ಧಾನ್ಯದ ರಾಶಿ ಕೆಳಗೆ ಜಾರುವಂತೆ ನೆಲಕ್ಕೆ ಬೀಳ್ತಾನೆ.

ರಾಜ ಕಾಡಲ್ಲೇ ನೀರು ಅಹಾರ ಇಲ್ಲದೆ ದಿನಾ ಕಳಿತಾನೆ  

ಎಷ್ಟು ದಿನ ಕಳೆದರೂ ರಾಜ ಬರದಿದ್ದನ್ನು ನೋಡಿ ಮಂತ್ರಿಗಳು ಅವನನ್ನು ಕಾಡಿನಲ್ಲಿ ಹುಡುಕುತ್ತಾ ಸುತ್ತಾಡುವಾಗ, ರಾಜ ನೆಲದಮೇಲೆ ಬಿದ್ದಿರುವುದನ್ನು ನೋಡ್ತಾರೆ. ರಾಜ ನೀರು ಆಹಾರ ಏನೂ ಇಲ್ಲದೆ ಹೇಗೆ ಆಗಿದ್ದನೆಂದು ಅದರ ವ್ಯವಸ್ಥೆ ಮಾಡ್ತಾರೆ. ಆದರೆ ರಾಜ ಏನನ್ನೂ ಮುಟ್ಟುವುದಿಲ್ಲ. ನಂತರ ರಾಜ ವೈದ್ಯರನ್ನು ಕರೆಸಿ ತೋರಿಸಿದಾಗ, ರಾಜ ಮಾನಸಿಕವಾಗಿ ತೊಂದರೆಗೆ ಒಳಗಾಗಿದ್ದಾರೆ ಅಂತ ಹೇಳ್ತಾರೆ. ರಾಜನ್ನ ಕರೆದುಕೊಂಡು ಹೋಗಕ್ಕೆ ಪ್ರಯತ್ನ ಪಟ್ಟಾಗ ತಾನು ಕಾಡು ಬಿಟ್ಟು ಹೋಗುವುದಕ್ಕೆ, ನೀರು ಆಹಾರ ತೆಗದುಕೊಳ್ಳೋದಕ್ಕೆ ನಿರಾಕರಿಸುತ್ತಾನೆ. ತನ್ನ ದೇಹ, ರೆಪ್ಪೆ ಏನೂ ಚಲಿಸದೆ ಹಾಗೆ ನಿಶ್ಚಲವಾಗಿ ಸೂರ್ಯನನ್ನೇ ದಿಟ್ಟಿಸುತ್ತಾ  ಕಾಡಿನ ಮಧ್ಯೆ ಮಲಗಿರುವ ರಾಜನನ್ನು ನೋಡಿ ಮಂತ್ರಿಗಳಿಗೆ ಆತಂಕ ಆಗುತ್ತೆ. ರಾಜ್ಯದ ಮಂತ್ರಿಗಳು,ಪ್ರಜೆಗಳು ಎಲ್ಲರೂ ತಮ್ಮ ರಾಜನ ಆರೋಗ್ಯಕ್ಕಾಗಿ ಪೂಜೆ, ಪುನಸ್ಕಾರ ಮಾಡ್ತಾರೆ. 

ಸಮವರ್ಣ ಅನಾರೋಗ್ಯದ ಸ್ಥಿತೀಲಿ ಇರೋದು ವಸಿಷ್ಠ ಮುನಿಗೆ ಗೊತ್ತಾಗಿ ಸೂರ್ಯನಿಂದ ಮಾತು ಪಡ್ಕೊತಾರೆ

ಇದೇ ಸಮಯದಲ್ಲಿ ವಸಿಷ್ಠ ಮುನಿ ಅದೇ ದಾರಿಯಲ್ಲಿ ಹೋಗ್ತಿರ್ತಾರೆ, ತನ್ನ ದಿವ್ಯ ದೃಷ್ಟಿಯಿಂದ ಸಮವರ್ಣನಿಗೆ ಈ ಗತಿ ಯಾಕೆ ಬಂತು ಅಂತ ತಿಳ್ಕೋತಾರೆ. ತನ್ನ ತಪೋಬಲದಿಂದ ಸೂರ್ಯಲೋಕಕ್ಕೆ ಹೋಗ್ತಾರೆ.

ಬ್ರಹ್ಮರ್ಷಿನಾ ಕಂಡು ಸೂರ್ಯಂಗೆ ತುಂಬಾ ಸಂತೋಷವಾಗುತ್ತೆ. ನಿಮ್ಮ ಪಾದಸ್ಪರ್ಶದಿಂದ ಸೂರ್ಯಲೋಕ ಪಾವನವಾಯಿತೆಂದೂ... ನೀವು ಏನು ಕೇಳಿದ್ರೂ ಕೊಡುವೆ ಅಂತ ಹೇಳ್ತಾನೆ. 

ಆಗ ವಸಿಷ್ಠರು ರಾಜ ಸಮವರ್ಣನ್ನ ನಿನ್ನ ಅಳಿಯ ಮಾಡ್ಕೊ. ಮೂರೂ ಲೋಕದಲ್ಲಿ ಇವನಂತ ಉತ್ತಮ, ಉದಾತ್ತ ಗುಣಗಳಿರೋ ರಾಜ ನಿನಗೆ ಸಿಗಲ್ಲ. ಪ್ರಜೆಗಳೆಂದರೆ ಅವನಿಗೆ ತುಂಬಾನೇ ಪ್ರೀತಿ. ರೂಪಾವತಿಯಾದ ನಿನ್ನ ಮಗಳು ತಪತಿಗೆ ಇವನೇ ಸೂಕ್ತ ಹಾಗೂ ಯೋಗ್ಯ ವರ ಅಂತ ಹೇಳ್ತಾರೆ.

ವಸಿಷ್ಠರ ಮಾತಿಂದ ಸೂರ್ಯನಿಗೆ ತುಂಬಾನೇ ಸಂತೋಷವಾಗುತ್ತೆ. ನನ್ನ ಮಗಳ ಪಾಲಿಗೆ ಅದೃಷ್ಟ ಒಲಿದು ಬಂದಿದೆ. ಅದರಲ್ಲೂ ಬ್ರಹ್ಮರ್ಷಿಯೊಬ್ಬರು ಇಂತಹ ಒಳ್ಳೆ ಸಂಬಂಧ ತಂದಿರೋವಾಗ ಬೇಡ ಅನ್ನೋ ಅಹಂಕಾರಿ ಅಲ್ಲ. ಅವನನ್ನೇ ಅಳಿಯ ಮಾಡ್ಕೊಬೇಕು ಅನ್ನೋ ಆಸೆ ನಂಗೂ ಇತ್ತು. ನನ್ನ ಭಾರ ಕಮ್ಮಿ ಮಾಡಿದ್ರಿ ಅಂತಾ ಹೇಳ್ತಾನೆ.

ತಪತಿ ಸಮವರ್ಣನ್ನ ಮದ್ವೆಯಾಗಿ ಕಾಡಲ್ಲೇ ಸಂಸಾರ ಹೂಡ್ತಾರೆ   

ಆ ಕ್ಷಣವೇ ತಪತಿ ಹಾಗೂ ಸೂರ್ಯ ಕಾಡಿನಲ್ಲಿ ಪ್ರತ್ಯಕ್ಷ  ಆಗ್ತಾರೆ. ಕಾಡೆಲ್ಲಾ ಬೆಳಕಿನಿಂದ ಜಗಮಗಿಸುತ್ತಿರುತ್ತೆ. ಈ ಬೆಳಕಿಂದ ಎಚ್ಚರಗೊಂಡ ರಾಜ ಸೂರ್ಯ ಹಾಗೂ ಪ್ರೇಯಸಿ ತಪತಿಯನ್ನು ಕಂಡು  ತನ್ನ 12 ದಿನಗಳ ಉಪವಾಸ ಮುಗಿಸಿ ನೀರು, ಆಹಾರ  ಸೇವಿಸಲು ಒಪ್ಕೋತಾನೆ. ಹಾಗೆ ವಸಿಷ್ಠರಿಗೆ ಧನ್ಯವಾದ ಹೇಳ್ತಾನೆ.

ಮೂರೋ ಲೋಕಗಳಲ್ಲಿ ಇವರ ಮದುವೆ ಆಚರಿಸಿ ಕೊಂಡಾಡುತ್ತಾರೆ. ರಾಜ ಸಮವರ್ಣ ತನ್ನ ಮಂತ್ರಿಗಳಿಗೆ ರಾಜ್ಯಭಾರ ನೋಡಿಕೊಳ್ಳೂ ಹೇಳಿ ಮುಂದಿನ 12 ವರ್ಷ ಅದೇ ಕಾಡಿನಲ್ಲಿ ಸಂಸಾರ ಮಾಡ್ತಾನೆ.

ಅಳಿಯ ಮಗಳ ಒಳಿತಿಗೆ ಸೂರ್ಯದೇವ ಮಳೆ ತಡೀತಾನೆ. ತಂಗಾಳಿ, ಹೂವು ಹಣ್ಣು  ಎಲ್ಲ ಯೆಥೇಚ್ಛವಾಗಿ ಸಿಗೋ ಹಾಗೆ ಮಾಡ್ತಾನೆ.

12 ವರ್ಷಗಳ ಕಾಲ ತನ್ನ ಹೆಂಡತಿಯ ಪ್ರೀತಿಯಲ್ಲಿ ಮುಳುಗಿರುವಾಗ, ಮಳೆ ಇಲ್ಲದೆ ಅವನ ರಾಜ್ಯದ ಪ್ರಜೆಗಳು ಕಾಯಿಲೆಗಳಿಂದ ನರಳಿ ಸಾಯುತ್ತಿದ್ದು  ಎಲ್ಲ ಸ್ಮಶಾನದಂತೆ ಕಾಣಲು ಶುರುವಾಗಿರುತ್ತೆ.


 

ವಸಿಷ್ಟರ ಮಾತಿನ ಪ್ರಕಾರ 12 ವರ್ಷ ಆದ್ಮೇಲೆ ಸಮವರ್ಣ ಹಾಗೂ ತಪತಿ ರಾಜ್ಯಕ್ಕೆ ವಾಪಸ್ಸಗ್ತಾರೆ. 

ಸೂರ್ಯ ಮಳೆ ಬರುವ ಹಾಗೆ ಮಾಡ್ತಾನೆ. ಜನರು ಫಸಲು ಬೆಳೆದು, ಆರೋಗ್ಯದಿಂದ ನಿಮ್ಮದಿಯಿಂದ ಇರೋಹಾಗೆ ಆಗುತ್ತೆ.

ಈ ಅಪೂರ್ವ ಜೋಡಿಗೆ ಹುಟ್ಟಿದ ಮಗನೇ ಸರ್ವಕಾಲಿಕ ಶ್ರೇಷ್ಠ ರಾಜ "ಕುರು"

ಈ ವಿಷಯವನ್ನ ಗಂಧರ್ವರು ಅರ್ಜುನನಿಗೆ ತನ್ನ ಪೂರ್ವಜರ ಹುಟ್ಟಿನ ಬಗ್ಗೆ ಹೇಳಿದ್ದು. 

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ: