ಎಷ್ಟೇ ಡೀಲೀಟ್ ಮಾಡುದ್ರೂ ನಿಮ್ ಫೋನಲ್ಲಿ ಸ್ಪೇಸ್ ಪ್ರಾಬ್ಲಮ್ ಬರ್ತಿದ್ರೆ ಈ 6 ಉಪಾಯ ಬಳಸಿ

ಪಾತಾಳಗರಡಿ ಅಲ್ಲ ಅದು, ಫೋನು.

ಜೀವನ್ದಲ್ಲಿ ಏನೆಲ್ಲಾ ವಿಷ್ಯಗಳು ಕಿರಿಕಿರಿ ಮಾಡತ್ತೋ ದೇವ್ರೇ ಬಲ್ಲ. ಈಗಂತೂ ದೊಡ್ಡೋರು, ಚಿಕ್ಕೋರು, ಚಿಲ್ಟೂ ಪಿಲ್ಟೂ ಎಲ್ರೂ ಕೈಲೂ ಸ್ಮಾರ್ಟ್ ಫೋನು, ಆಂಡ್ರಾಯಿಡ್ ಫೋನು ಕಾಣೋದು ಮಾಮೂಲು. ಜೊತೆಗೆ ಬೇಕೋ ಬೇಡ್ವೋ ಸಿಕ್ಕಸಿಕ್ಕ ಆಪ್, ಗೇಮ್ಸ್ ಡೌನ್ಲೋಡ್ ಮಾಡ್ಕೊಳದು. ಫೋನ್ಗೂ ವಾಂತಿ ಬರೋವಷ್ಟು ಅದರ ಹೊಟ್ಟೆ ತುಂಬ್ಸೋದು ಆಮೇಲಿಂದ ಹೊಸದಾಗಿ ಏನೂ ಹಾಕ್ಕೊಳ್ಳಕ್ಕೆ ಆಗ್ತಿಲ್ಲ ಅಂತ ಬಾಯಿ ಬಡ್ಕೊಳದು. ಇದಕ್ಕೆಲ್ಲಾ ಪರಿಹಾರ ಅಂದ್ರೆ ಆಗಿದಾಂಗ್ಗೇ ಫೋನ್ ಮೆಮೋರಿನ ಖಾಲಿ ಮಾಡಿ, ಡೇಟಾ ಬ್ಯಾಕ್ ಅಪ್ ತೊಗೊಳೋದು. ಡೇಟಾ ಬ್ಯಾಕ್ ಅಪ್ ಅಂದ್ರೆ ಸುಮಾರು ಜನ ಅಯ್ಯೋ ಗಂಟೆಗಟ್ಲೆ ತೊಗೊಳೋ ಕೆಲ್ಸ ಅಲ್ವ ಅಂದ್ಕೊತಾರೆ. ಆದ್ರೆ ಇತ್ತೀಚಿನ ಟೆಕ್ನಾಲಜಿ ಬಳುಸ್ಕೊಂಡು ಸುರಕ್ಷಿತವಾಗಿ ನಮ್ ಫೋಟೋ, ವೀಡಿಯೋ ಹೀಗೆ ಎಲ್ಲಾ ಡೇಟಾನೂ ಬ್ಯಾಕ್ ಅಪ್ ಮಾಡ್ಕೊಂಡು ಫೋನ್ ಮೆಮೋರಿ ಯಾವತ್ತೂ ತುಂಬದೇ ಇರೋ ಹಾಗೆ ನೋಡ್ಕೊಬೋದು. ಅಂಥ ಒಂದಷ್ಟು ಐಡಿಯಾಗಳ್ನ ಅಂತೆಕಂತೆ ನಿಮ್ಗೋಸ್ಕರ ಇಲ್ಲಿ ಹೇಳ್ತಿದೆ. ಓದ್ಕೊಂಡು ಉಪಾಯನ ಬಳುಸ್ಕೊಳಿ. ಫೋನ್ ಕೈಯ್ಯಲ್ಲಿ ಯಾವತ್ತೂ 'ಮೆಮೋರಿ ಫುಲ್', 'ಲೆಸ್ ಸ್ಟೋರೇಜ್ ಸ್ಪೇಸ್' ಅಂತ ಬೈಸ್ಕೊಬೇಡಿ.

 

ಆಪ್ ಬಳಸಿದಾಗ ಬರೋ ಕೇಚ್ ಡೇಟಾ ಕ್ಲಿಯರ್ ಮಾಡಿ


ಯಾವ್ದಾದ್ರೂ ಆಪ್ ಡೌನ್ಲೋಡ್ ಮಾಡ್ಕೊಂಡು ಬಳಸುವಾಗ, ಪ್ರತೀಸಲ ಅದರ ಕೇಚ್ ಮೆಮೋರಿನಲ್ಲಿ ಬೇಡದೇ ಇರೋ ಒಂದಷ್ಟು ಡೇಟಾ ಬಂದು ಕೂತಿರತ್ತೆ. ಯಾವ್ ಉಪ್ಯೋಗನೂ ಇಲ್ಲ. ಆದ್ರೆ ಇದು ಫೋನ್ ಮೆಮೋರಿ ತಿಂತಿದೆ ಅಂತ ಎಷ್ಟೋಂದ್ ಸಲ ಗೊತ್ತಾಗಲ್ಲ. ಆಗಾಗ ಇದನ್ನ ಕ್ಲಿಯರ್ ಮಾಡ್ತಾ ಇದ್ರೆ, ಖಂಡಿತಾ ಕೆಲವು ಕಿಲೋಬೈಟ್, ಅಥ್ವ ಒಂದಷ್ಟು ಮೆಗಾ ಬೈಟ್ ಜಾಗ ಖಾಲಿ ಆಗತ್ತೆ. ಇದನ್ನ ಕ್ಲಿಯರ್ ಮಾಡೋ ವಿಧಾನ, ಸೆಟ್ಟಿಂಗ್ಸ್ -> ಸ್ಟೋರೇಜ್ -> ಕೇಚ್ಡ್ ಡೇಟಾ ಮೇಲೆ ಗಟ್ಟಿಯಾಗಿ ಒತ್ತಿ, ಡಿಲೀಟ್ ಆಪ್ಷನ್ ಕೇಳಿದಾಗ, ಓಕೆ. ಕೊಡಿ. ಒಂದೇ ಸಲ ಅಷ್ಟೂ ಡೇಟಾ ಕ್ಲಿಯರ್ ಆಗತ್ತೆ.

ಡೌನ್ಲೋಡ್ ಫೋಲ್ಡರ್ ಕ್ಲಿಯರ್ ಮಾಡಿ


ಎಷ್ಟೊಂದ್ ಸಲ ನಯಾಪೈಸ ಕೆಲ್ಸಕ್ ಬರ್ದೇಯಿರೋದ್ನೆಲ್ಲಾ ಬಿಟ್ಟಿಯಾಗ್ ಕೊಟ್ಟಿದರೆ ಅಂತ ಡೌನ್ಲೋಡ್ ಮಾಡ್ಕೊತಿವಿ. ಅಥ್ವ, ಯಾವ್ದೋ ಹಾಡಿನ ಎಮ್ ಪಿ ತ್ರಿ ಫೈಲ್ ಡೌನ್ಲೋಡ್ ಮಾಡಕ್ಕೆ ಹೋಗಿ ಅದ್ರ ಎಚ್ ಟಿ ಎಮ್ ಎಲ್ ಫೈಲ್ ಡೌನ್ಲೋಡ್ ಮಾಡಿರ್ತೀವಿ. ಇಂಥ ಕೆಲ್ಸಗಳಿಂದ ಡೌನ್ಲೋಡ್ ಫೋಲ್ಡರಲ್ಲಿ ಕಸಕಡ್ಡಿನೇ ತುಂಬಿರತ್ತೆ. ಅದನ್ನೆಲ್ಲಾ ಆಗಾಗ ಮರೀದೆ ಕ್ಲಿಯರ್ ಮಾಡ್ಬೇಕು. ಡೌನ್ಲೋಡ್ ಫೋಲ್ಡರ್ಗೆ ಹೋಗಿ, ಮೇಲೆ ಬಲತಿದಿನಲ್ಲಿ ಕೊಟ್ಟಿರೋ ಮೂರು ಚುಕ್ಕೆ ಇರೋ ಮೆನು ಮೇಲಿ ಕ್ಲಿಕ್ ಮಾಡಿ, ಇರೋ ಎಲ್ಲಾ ಫೈಲನ್ನೂ ಅದರ ಸೈಝ್ ಪ್ರಕಾರ ಪಟ್ಟಿ ಮಾಡೋ ಮಾಡೋ ಆಪ್ಷನ್ ಆರುಸ್ಕೊಳಿ. ಆ ಪಟ್ಟಿ ನೋಡ್ತಾ ಹೋದ್ರೆ ಗೊತ್ತಾಗತ್ತೆ. ಯಾವ್ ಫೈಲ್ ತುಂಬಾ ಜಾಗ ಆಕ್ರಮಿಸ್ಕೊಂಡಿದೆ ಅಂತ ಅವುಗಳಲ್ಲಿ ಬೇಡದೇಯಿರೋದು ಇದ್ರೆ, ಅದರ ಮೇಲೆ ಗಟ್ಟಿಯಾಗಿ ಒತ್ತಿ ಹಿಡ್ಕೊಂಡು ತ್ರ್ಯಾಶ್ ಗೆ ತಳ್ಳಿ.

ಬ್ಯಾಕ್ ಅಪ್ ಆಗಿರೋ ಫೋಟೋಗಳ್ನ ಅಳಿಸಿಹಾಕಿ


ಫೋಟೋಗಳ್ನ ಸ್ಟೋರ್ ಮಾಡಕ್ಕೆ, ಗೂಗಲ್ ಅವರ ಹೊಸ ಫೋಟೋ ಆಪ್ ತುಂಬಾ ಸಹಕಾರಿ. ಫೋಟೋ ಲೈಬ್ರರಿನ ಪೂರ್ತಿಯಾಗಿ, ಸುರಕ್ಷಿತವಾಗಿನಮ್ ಆನ್ಲೈನ್ ಗೂಗಲ್ ಅಕೌಂಟ್ಗೆ ವರ್ಗಾಯಿಸತ್ತೆ. ಇದಾದಮೇಲೆ ಫೋನಲ್ಲಿರೋ ಫೋಟೋಗಳ್ನ ಏನ್ ಇಟ್ಕೊಂಡ್ ಉಪ್ಪಿನಕಾಯಿ ಹಾಕ್ಬೇಕಾ? ಅಳಿಸಿಹಾಕ್ಬೇಕು. ಫೋಟೋ ಆಪ್ಗೆ ಹೋಗಿ, ಮೇಲೆ ಎಡತುದಿನಲ್ಲಿ ಇರೋ ಮೂರು ಚುಕ್ಕೆಗಳ ಮೆನುನ ಕ್ಲಿಕ್ ಮಾಡಿ, ಫ್ರೀ ಅಪ್ ಡಿವೈಸ್ ಸ್ಟೋರೇಜ್ ಅನ್ನೋ ಆಪ್ಷನ್ ಆರುಸ್ಕೊಂಡ್ರೆ, ಎಷ್ಟು ಫೋಟೋ ಇದೆ ಫೋನಲ್ಲಿ ಅಂತ ತೋರ್ಸತ್ತೆ. ಬೇಕಾದ್ದನ್ನ ಇಟ್ಕೊಂಡು, ಬ್ಯಾಕ್ ಅಪ್ ಆಗಿರೋದ್ರಿಂದ ಲೋಕಲ್ ಸ್ಟೋರೇಜಿಂದ ಡಿಲೀಟ್ ಮಾಡ್ಬೋದು.

ಕಿವಿಮಾತು : ನೀವು ಫೋಟೋನ ಹೈ ಡೆಫನಿಷನ್ ಸೆಟ್ಟಿಂಗ್ನಲ್ಲಿ ತೆಗೆದಿದ್ರೆ, ಆಗ ಹಿಂದೆಮುಂದೆ ನೋಡದೇ ಡಿಲೀಟ್ ಮಾಡಂಗಿಲ್ಲ. ಹಾಗೇನಾದ್ರೂ ಮಾಡಿದ್ರೆ, ಫೋಟೋ ಒರಿಜಿನಲ್ ಸೆಟ್ಟಿಂಗ್ ಸೇವ್ ಆಗಿರಲ್ಲ, ಪರ್ಮನೆಂಟಾಗಿ ಆ ಫೋಟೋ ಗುಣಮಟ್ಟ ಹೋಗಿಬಿಡತ್ತೆ. ಹಾಗಾಗಿ ಅಂಥ ಫೋಟೋಗಳ್ನ ಬೇರೆಯಾಗಿ ಬ್ಯಾಕ್ ಅಪ್ ತೊಗೊಂಡು ಆಮೇಲೆ ಡಿಲೀಟ್ ಮಾಡ್ಬೇಕು.

ಡೌನ್ಲೋಡ್ ಮಾಡಿರೋ ಹಾಡಿನ ಪಾಡ್ಕಾಸ್ಟ್, ಹಾಡುಗಳ್ನ ಸರಿಯಾಗಿ ನಿರ್ವಹಣೆ ಮಾಡಿ


ಗೂಗಲ್ನ 'ಪ್ಲೇ ಮ್ಯೂಸಿಕ್' ಅನ್ನೋ ಆಪ್, ಹಾಡುಗಳ್ನ ಸ್ಟೋರ್ ಮಾಡೊದಕ್ಕೆ ಇರೋ ತೊಂದ್ರೆ ನಿವಾರ್ಸತ್ತೆ. ಇದು ಎರಡು ಆಪ್ಷನ್ ಕೊಡತ್ತೆ. ಒಂದು, ಗೂಗಲ್ ಪ್ಲೇ ಸಾಂಗ್ಸ್ ಪಟ್ಟಿನಲ್ಲಿ ಇರೋ ನಿಮಗಿಷ್ಟವಾದ ಹಾಡುಗಳ್ನ ಡೌನ್ಲೋಡ್ ಮಾಡ್ಕೊಳದು ಅಥ್ವ ಆಪ್ ಸ್ವತಃ ನಿಮ್ಗೋಸ್ಕರ ತಾನೇ ಹಾಡುಗಳ್ನ ಆರಿಸಿ ಪ್ಲೇ ಮಾಡೋದು. ಈ ಎರಡೂ ಆಯ್ಕೆನಲ್ಲಿ ಫೋನ್ ಮೆಮೋರಿ ತುಂಬಾ ಉಳಿಯತ್ತೆ. ಇನ್ನು ಪಾಡ್ಕಾಸ್ಟ್ ವಿಷ್ಯದಲ್ಲೂ ಹಾಗೇನೇ. ಪ್ಲೇ ಮ್ಯೂಸಿಕ್ನಲ್ಲಿ ಡೀಫಾಲ್ಟ್ ಆಯ್ಕೆ ಒಂದಿದೆ. ಇತ್ತೀಚೆಗೆ ಚಂದಾದಾರರಾಗಿರೋ ಮೂರು ಹಾಡುಗಳ್ನ ತಂತಾನೇ ಡೌನ್ಲೋಡ್ ಮಾಡ್ಕೊಳದು. ಇದನ್ನ ಸೆಟ್ಟಿಂಗ್ಸ್ನಲ್ಲಿ ಸೆಟ್ ಮಾಡಿ ಬಿಟ್ರೆ ಸಾಕು. ಅದೇ ಹಾಡುಗಳ್ನ ನಿರ್ವಹನೆ ಮಾಡತ್ತೆ. ನೀವೇನಾದ್ರೂ ಜಾಸ್ತಿ ಹಾಡುಗಳ್ನ ಆಯ್ಕೆ ಮಾಡ್ಕೊಂಡಿದ್ರೆ, ಫೋನಲ್ಲಿ ಅದಕ್ಕೋಸ್ಕರ ಜಾಸ್ತಿ ಜಾಗ ಮಾಡ್ಕೊಡಕ್ಕೂ ಸಹಾಯ ಮಾಡತ್ತೆ. ಈಗಾಗ್ಲೇ ಎಷ್ಟು ಮೆಮೋರಿ ಇದಕ್ಕೋಸ್ಕರ ಮೀಸಲಾಗಿದೆ ಅಂತ ತಿಳ್ಕೊಂಡು ಅದನ್ನ ಸರಿಯಾಗಿ ನಿರ್ವಹಣೆ ಮಾಡಕ್ಕೆ ಈ ಉಪಾಯ ಬಳಸ್ಬೊದು.ಪ್ಲೇ ಮ್ಯೂಸಿಕ್ ಆಪ್ಗೆ ಹೋಗಿ, ಮೆಲೆ ಎಡತುದಿನಲ್ಲಿರೋ ಮೂರು ಚುಕ್ಕೆ ಮೆನು ಕ್ಲಿಕ್ ಮಾಡಿ -> ಸೆಟ್ಟೀಂಗ್ಸ್-> ಮ್ಯಾನೇಜ್ ಡೌನ್ಲೋಡ್ಸ್ ಆಯ್ಕೆ ಮಾಡಿ.ಅಲ್ಲಿ ಯಾವ್ದಾದ್ರೂ ಹಾಡು ಅಳಿಸಿಹಾಕಬೇಕು ಅಂದ್ರೆ, ಹೆಸರಿನ ಪಕ್ಕದಲ್ಲೇ ಇರೋ ಆರೆಂಜ್ ಬಣ್ಣದ ಡೌನ್ಲೋಡ್ ಬಟನ್ ಮೇಲೆ ಒತ್ತಿ, ನಿಮ್ ಎಡಕ್ಕೆ ಸ್ವೈಪ್ ಮಾಡಿದ್ರೆ ಲೋಕಲ್ ಫೋನ್ ಸ್ಟೋರೇಜ್ ಇಂದ ಅಳಿಸಿಹೋಗತ್ತೆ.

ಕಿವಿಮಾತು : ಇದೇ ಉಪಾಯನ 'ಪ್ಲೇ ಮೂವೀಸ್' ಮತ್ತೆ 'ಟಿವಿ' ಆಪ್ಗೂ ಬಳಸ್ಬೊದು.

ಗೂಗಲ್ ಮ್ಯಾಪಲ್ಲಿರೋ ಆಫ್ಲೈನ್ ಏರಿಯಾಗಳ್ನ ಅಳಿಸಿಹಾಕಿ

 

ಒಂದ್ ಜಾಗನ ಹುಡುಕಕ್ಕೆ ಮತ್ತೆ ದಿಕ್ಕು ತೋರ್ಸಕ್ಕೆ, ಗೂಗಲ್ ಮ್ಯಾಪ್ ಅವರ ಹೊಸ ವರ್ಷನಲ್ಲಿ ಬಿಟ್ಟಿರೋ ಫೀಚರ್ ಚೆನ್ನಾಗಿದೆ. ಆನ್ಲೈನಲ್ಲಿ ಮ್ಯಾಪ್ ಡೌನ್ಲೋಡ್ ಮಾಡ್ಕೊಂಡು, ಆಫ್ಲೈನಲ್ಲೂ ಬಳಸ್ಬೋದು. ಆದ್ರೆ ಇದು ಬಕಾಸುರ. ಫೋನ್ ಮೆಮೋರಿನ ಎದ್ವಾ ತದ್ವಾ ತಿಂದುಹಾಕತ್ತೆ. ಏರಿಯಾ ಸೈಝ್ಗೆ ತಕ್ಕ ಹಾಗೆ, ಗೀಗಾಬೈಟ್ಗೂ ಮೀರಿ ಸ್ಟೋರೇಜ್ ದಂಡ ಆಗತ್ತೆ. ಪರಿಹಾರ ಅಂದ್ರೆ, ಮ್ಯಾಪ್ ಬಳಸಿ ಆದಮೇಲೆ, ಗೂಗಲ್ ಮ್ಯಾಪ್ ಆಪ್ಗೆ ಹೋಗಿ, ಮೇಲೆ ಎಡತುದಿನಲ್ಲಿರೋ ಮೂರುಚುಕ್ಕೆ ಮೆನುನ ಕ್ಲಿಕ್ ಮಾಡಿ, ಆಫ್ಲೈನ್ ಮಾಡಿ. ಆಗ ಪ್ರತೀಸಲ ಮ್ಯಾಪ್ ಡೌನ್ಲೋಡ್ ಮಾಡಿದಾಗಲೂ ಎಷ್ಟು ಸ್ಟೋರೇಜ್ ಬಳುಸ್ಕೊಂಡಿದೆ ಅಂತ ಗೊತ್ತಾಗತ್ತೆ. ಬೇಡದೇ ಇರೋ ಮ್ಯಾಪ್ ಮೇಲೆ ಗಟ್ಟಿಯಾಗಿ ಕ್ಲಿಕ್ ಮಾಡಿ ಅದನ್ನ ಡೀಲೀಟ್ ಮಾಡಿ.

ಕಮ್ಮಿ ಬಳಸೋ ಆಪ್ ಅನ್ಲೋಡ್ ಮಾಡಿ

ಎಷ್ಟೋ ಸಲ, ಯಾವ್ದೋ ಆಪ್ ಡೌನ್ಲೋಡ್ ಮಾಡುವಾಗ, ಜೊತೆಗೆ ಬಾಲಂಗೋಚಿ ಥರ ಇನ್ನೊಂದಿಷ್ಟು ಆಪ್ಗಳು ಬಂದಿರತ್ತೆ. ಗಡಿಬಿಡಿನಲ್ಲಿ ಗಮನಿಸಿರಲ್ಲ. ಇನ್ನೂ ಕೆಲವು ಸಲ ಯಾವ್ದೋ ಒಂದೇ ಒಂದು ಉಪ್ಯೋಗಕ್ಕೆ ಆಪ್ ಡೌನ್ಲೋಡ್ ಮಾಡಿರ್ತೀವಿ. ಆದ್ರೆ ಯಾವತ್ತೂ ಅದನ್ನ ಬಳಸಿರಲ್ಲ. ಅಂಥವೆಲ್ಲಾ ಗುಡ್ಡೆಯಾಗಿ, ಫೋನ್ ಮೆಮೋರಿ ತುಂಬಿರತ್ತೆ. ತಕ್ಷಣ ಡಿಲೀಟ್ ಮಾಡ್ಕೊಂಡ್ರೆ ಒಳ್ಳೇದು. ಪ್ಲೇ ಸ್ಟೋರ್ ಆಪ್ ತೆಗೆದು, ಮೇಲೆ ಬಲತುದಿನಲ್ಲಿರೋ ಮೂರು ಚುಕ್ಕೆ ಮೆನು ಮೇಲೆ ಕ್ಲಿಕ್ ಮಾಡಿ, 'ಮೈ ಆಪ್ಸ್ ಅಂಡ್ ಗೇಮ್ಸ್' ಆಯ್ಕೆ ಮಾಡ್ಕೊಳೀ. ನಂತರ ಅದರಲ್ಲಿ ಇರೋ ಇನ್ಸ್ಟಾಲ್ಡ್ ಆಪ್ಷನ್ ಆರುಸ್ಕೊಳಿ. ಆಗ ನಿಮ್ ಫೋನಲ್ಲಿ ಇನ್ಸ್ಟಾಲ್ ಆಗಿರೋ ಎಲ್ಲಾ ಆಪ್ಗಳ ಪಟ್ಟಿ ಬರತ್ತೆ. ಮತ್ತೆ ಮೇಲೆ ಬಲತುದಿನಲ್ಲಿರೋ ಮೂರುಚುಕ್ಕೆ ಮೆನುಗೆ ಹೋಗಿ, 'ಲಾಸ್ಟ್ ಯೂಸ್ಡ್' ಆಪ್ಷನ್ ಪ್ರಕಾರ ಸಾರ್ಟ್ ಮಾಡಿ. ಈಗ ಅದೇ ಪಟ್ಟಿ, ತುಂಬಾ ಬಳಕೆ ಮಾಡೋ ಆಪ್ನಿಂದ, ಅಪರೂಪಕ್ಕೆ ಬಳಸೋ ಆಪ್ ಆರ್ಡರ್ನಲ್ಲಿ, ಮೇಲಿಂದ ಕೆಳಕ್ಕೆ ಬರತ್ತೆ. ಪಟ್ಟಿಯ ಕೆಳಕ್ಕೆ ಹೋಗಿ, ಯಾವೆಲ್ಲಾ ಆಪ್ಗಳು ಬೇಡ್ವೋ ಅದನ್ನ 'ಅನ್ ಇನ್ಸ್ಟಾಲ್' ಮಾದ್ತಾ ಬನ್ನಿ. ಮೆಮೋರಿ ಕ್ಲಿಯರ್ ಆಗತ್ತೆ.

ಇನ್ನೂ ಒಂದಷ್ಟು ಆಪ್ಗಳೇ ಇವೆ. ಅವು ಆಗಾಗ, ನಾವ್ ಯಾವ್ ಆಪ್ ತುಂಬಾ ಬಳಕೆ ಮಾಡ್ತಾ ಇದೀವಿ? ಯಾವ್ದು ಬಳಸ್ತಿಲ್ಲ. ಯಾವ್ದು ಉಪ್ಯೋಗಕ್ಕೆ ಬರತ್ತೆ? ಬರಲ್ಲ ಅಂತ ಸೂಚನೆ ಕೊಡ್ತಿರತ್ತೆ. ಅದರ ಆಧಾರದಮೇಲೂ ಆಪ್ ನಿರ್ವಹಣೆ ಮಾಡ್ಬೋದು. ಒಟ್ನಲ್ಲಿ. ಇದ್ದಕ್ಕಿದ್ದಂಗೇ ಯಾಕೋ ಫೋನು ನಿಧಾನ ಆಯ್ತು, ಫೋನೇ ಸರಿಯಿಲ್ಲ ಅಂತ ಬೈಕೊಳೋ ಬದ್ಲು, ತೀರಾ ಅವಶ್ಯಕ ಅನ್ನಿಸಿದಾಗ್ಲೇ ಮೆಮೋರಿ ಇಲ್ಲ, ಸ್ಟೋರೇಜ್ ಸ್ಪೇಸ್ ಕಮ್ಮಿ ಇದೆ ಅಂತ ಒದ್ದಾಡೋ ಬದ್ಲು, ಆಗಾಗಫೋನ್ ಮೆಮೋರಿ ಕ್ಲಿಯರ್ ಮಾಡಕ್ಕೆ ಅಂತನೇ ಸ್ವಲ್ಪ ಸಮಯನ ಮೀಸಲಿಟ್ರೆ, ಅದ್ಯಾಕ್ ಫೋನ್ ಚೆನ್ನಾಗಿ ಕೆಲ್ಸ ಮಾಡಲ್ವೋ ಹೇಳಿ.

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ:

ನಮ್ಮ ಜೀವನದ ಆಗುಹೋಗುಗಳಿಗೆ ಈ 16 ಅಭ್ಯಾಸಗಳು ಹೇಗೆ ಕಾರಣ ತಿಳ್ಕೊಳಿ

ಒಳ್ಳೇದೋ ಕೆಟ್ಟದ್ದೋ ಏನೇ ಇರ್ಲಿ…

ನಾವು ಒಂದು ಕೆಲಸಾನ ಪದೇ ಪದೇ ಮಾಡ್ತಿದ್ದಾಗ ಅದು ಯಾವಾಗ ನಮ್ಮ ಅಭ್ಯಾಸ ಆಗುತ್ತೋ ಗೊತ್ತೇ ಆಗಲ್ಲ. ಈ ಅಭ್ಯಾಸಗಳೇ ನಮ್ಮ ವ್ಯಕ್ತಿತ್ವಾನ ಹೇಳೋದು. ಈ ಅಭ್ಯಾಸಗಳು ನಾವು ಮಾತಾಡದೆ ಇದ್ರೂ ನಾವು ಏನು ಹೇಳ್ಬೇಕು ಅನ್ಕೋಡಿರ್ತಿವೋ ಅದನ್ನ ತಿಳಿಸುತ್ತೆ. ಉದಾಹರಣೆಗೆ ದಿನ ಬೆಳಗ್ಗೆ ಕಾಫಿ ಕುಡಿಯೋದು, ಪಕ್ಕದಲ್ಲಿ ಕೂತಿರೋವ್ರ ಕುರ್ಚಿ ಮೇಲೆ ಕಾಲಿಡೋದು, ಉಗುರು ಕಚ್ಚೋದು, .. ಹೀಗೆ.

ಹಿಂದೆ ಇದನ್ನೆಲ್ಲಾ ನೋಡಿ ಒಬ್ಬ ಮನುಷ್ಯ ಹೇಗೆ ಅಂತ ತಿಳ್ಕೋತಿದ್ರು, ಅದಕ್ಕಿಂತ ಆಶ್ಚರ್ಯ ಏನು ಅಂದ್ರೆ ಇದು ನಮ್ಮ ಜೀವನ ಹೇಗಿರುತ್ತೆ ಅಥವಾ ಹೇಗಾಗುತ್ತೆ ಅಂತಾನೂ ತೋರ್ಸುತ್ತೆ . ನಮ್ಮ ದಿನ ನಿತ್ಯದ ಅಭ್ಯಾಸಗಳು ಒಳ್ಳೇದೋ ಕೆಟ್ಟದ್ದೋ ಏನೇ ಇರ್ಲಿ ಅದ್ರಿಂದ ಏನು ಪರಿಣಾಮ ಆಗುತ್ತೆ, ನಮ್ಮ ಜೀವನದ ಬಗ್ಗೆ ಏನು ಹೇಳುತ್ತೆ ಅಂತ ಓದಿ ತಿಳ್ಕೊಳಿ. ಅಂತೆಕಂತೆ ನಿಮಗೋಸ್ಕರ ಈ 16ರ ಪಟ್ಟಿ ಮಾಡಿದೆ.   

1. ಬಚ್ಚಲನ್ನ ಕ್ಲೀನಾಗಿ ಇಟ್ಕೊಳ್ದೆ ಇರೋದು  

ಯಾರು ತಮ್ಮ ಬಚ್ಚಲು ಮನೆ ಕ್ಲೀನಾಗಿಟ್ಟುಕೊಳ್ಲವೋ, ಬಚ್ಚಲು ಮನೇಲಿ ಅಲ್ಲಲ್ಲೇ ಬಟ್ಟೆ ಬಿಸಾಕಿರೋದು ಮಾಡ್ತಾರೋ ಅಂತವ್ರಿಗೆ ವೃತ್ತಿ ಜೀವನದಲ್ಲಿ ಒಳ್ಳೇದಾಗಲ್ವಂತೆ. ವೃತ್ತಿಯಲ್ಲಿ ಮುಂದುವರಿಯಕ್ಕೆ ತುಂಬಾ ಕಷ್ಟ ಪಡ್ಬೇಕಾಗುತ್ತಂತೆ. ಇದು ನಮ್ಮ ವ್ಯವಹಾರ, ಕೆಲಸ ಕಾರ್ಯಗಳಲ್ಲಿ ಏನಾಗುತ್ತೆ ಅಂತ ತೋರ್ಸುತ್ತೆ. 

2. ಕಾಲು ಎಳ್ಕೊಂಡು ಓಡಾಡೋದು / ನೆಲ ಸವರಿಕೊಂಡು ಓಡಾಡೋದು

ಕಾಲು ಎಳ್ಕೊಂಡು ಓಡಾಡೋದನ್ನ ಕೆಟ್ಟ ಅಭ್ಯಾಸ ಅಂತ ತುಂಬಾ ಜನ ಹೇಳ್ತಾರೆ. ಇದ್ರಿಂದ ನಾವು ಸಾಧಿಸಬೇಕಾಗಿರೋ ಗುರಿ ಮೇಲೆ ನಾವೇ ಧೂಳು  ಬೆಳ್ಕೊಂಡು ಬಂದು ಹಾಕಿ ಮುಳುಗಿಸ್ತೀವಿ. ನಮ್ಮ ಗುರಿ ನಾವು ಮುಟ್ಟಲ್ಲ ಅಂತ ತೋರ್ಸುತ್ತೆ.

3. ತಿಂದ ತಟ್ಟೆ ಹಾಗೆ ಇಡೋದು

ತುಂಬಾ ಜನ ತಾವು ಊಟ ಮಾಡಿದಮೇಲೆ ತಿಂದ ತಟ್ಟೆ, ಚಮಚ ಇವನ್ನೆಲ್ಲ ಯಾರಾದ್ರೂ ಬಂದು ತೊಗೊಂಡು ಹೋಗಿ ತೊಳೀಲಿ ಅಂತ ಕಾಯ್ತಿರ್ತಾರೆ. ಇಂತವರು ಪ್ರಯತ್ನಗಳನ್ನ ತುಂಬಾನೇ ಕಡೆಗಣಿಸ್ತಾರೆ ಅಷ್ಟೇ ಅಲ್ಲ ಯಶಸ್ಸನ್ನು ಪಡೆದು ಅದನ್ನ ಕಾಪಾಡ್ಕೊಳಕ್ಕೆ ತುಂಬಾ ಕಷ್ಟ ಪಡ್ತಾರೆ.ನಮ್ಮ ಜೀವನದಲ್ಲಿ ಯಾವ ಮಟ್ಟದಲ್ಲಿ ಯಶಸ್ಸು ಕಾಣ್ತಿದೀವಿ ಅಂತ ಇದು ತೋರ್ಸುತ್ತೆ. ಊಟ ಮಡಿದ ತಟ್ಟೆ, ಚಮಚ, ಅಷ್ಟೇ ಅಲ್ಲ ಊಟ ಮಡಿದ ಜಾಗ ಕ್ಲೀನ್ ಮಾಡಿದ್ರೆ ಒಳ್ಳೇದು ಅಂತಾರೆ.

4. ಹೊರಗೆ ಹೋಗಿ ಸುತ್ತಾಡಿಕೊಂಡು ಬಂದ್ಮೇಲೆ ಕೈಕಾಲು, ಮುಖ ತೊಳೀದೆ ಇರೋದು

ಕೆಲವೊಬ್ರು ದಿನವಿಡೀ ಕೆಲಸ ಅಥವಾ ಇನ್ನ್ಯಾವುದೋ ಕಾರಣಕ್ಕಾಗಿ ಸುತ್ತಾಡಿಕೊಂಡು ಮನೆಗೆ ಬರ್ತಾರೆ. ಹಾಗೆ ಬಂದ ತಕ್ಷಣ ಕೈಕಾಲು ಮುಖ ತೊಳ್ಕೊಬೇಕು. ಹೀಗೆ ಮಾಡೋದ್ರಿಂದ ನೀವು ಹೊರಗೆ ಹೋಗಿ ಬಂದಾಗ ನಿಮ್ಮ ಜೊತೆ ಬರೋ ನಕಾರಾತ್ಮಕ ಶಕ್ತಿಯಿಂದ ನಿಮ್ಮ ಒತ್ತಡ ಕಮ್ಮಿಯಾಗಿ ಮನಃ ಶಾಂತಿ ಇರುತ್ತೆ. ಈ ಅಭ್ಯಾಸ ಇಲ್ದಿದ್ರೆ ಏನಾಗುತ್ತೆ ಅಂತ ಅರ್ಥ ಆಯ್ತಾ?

5. ಪೂಜೆ ಮಾಡೋ ಜಾಗ ಕ್ಲೀನ್ ಇಟ್ಕೊಳ್ಳೋದು

ಪ್ರತಿದಿನ ಅಲ್ದೆ ಇದ್ರೂ ಆಗಾಗ ದೇವರ ಕೋಣೆ, ಪೂಜೆ ಮಾಡೋ ಜಾಗ, ವಿಗ್ರಹಗಳನ್ನ ಇಟ್ಟಿದ್ರೆ ಅದನ್ನ ಕ್ಲೀನ್  ಮಾಡ್ತಿರ್ಬೇಕು. ಇದು ಕ್ಲೀನ್ ಇಲ್ಲ ಅಂದ್ರೆ ಮನೇಲಿ ಓದೋ ಮಕ್ಕಳಿದ್ರೆ ಅವರ ಓದಿನಲ್ಲಿ ತೊಂದರೆ ಆಗೋದು, ಹಣಕಾಸಿನ ವಿಚಾರದಲ್ಲಿ ತೊಂದರೆ ಆಗೋದು ಅಷ್ಟೇ ಅಲ್ಲ ಸಂಸಾರದಲ್ಲಿ ಜಗಳ, ಮನಸ್ತಾಪ ಆಗೋದನ್ನ ತೋರ್ಸುತ್ತೆ.

6. ರಾತ್ರಿ ತುಂಬಾ ಹೊತ್ತು ಎದ್ದಿರೋದು 

ಬೇಗ ಮಲಗಿ ಬೇಗ ಏಳ್ಬೇಕು ಅಂತ ಹೇಳೋದನ್ನ ಕೇಳಿರ್ತೀರಿ. ರಾತ್ರಿ ಹೊತ್ತು ಮಲಗೋದು ಒಳ್ಳೇದು ಯಾಕೆ ಅಂದ್ರೆ ಚಂದ್ರನ ಬೆಳಕು ನಮ್ಮ ದೇಹದ ಆರೋಗ್ಯಕ್ಕೆ ಒಳ್ಳೇದು. ದೇಹ ತಂಪಾಗಿಡಕ್ಕೆ ಸಹಾಯ ಆಗುತ್ತೆ (ಈ ಹಿಂದೆ ನಾವು ಇದರಬಗ್ಗೆ ಒಂದು ಪ್ರಕ್ಯೆಕ ಬರಹ ಪ್ರಕಟಣೆ ಮಾಡಿದ್ದೀವಿ). ನಾವು ರಾತ್ರಿ ತುಂಬಾ ಹೊತ್ತು ಎದ್ದಿರೋದ್ರಿಂದ ಬಲವಂತವಾಗಿ ಚಂದ್ರನ ತನ್ನ ಕೆಲಸಾನ ಸ್ವಾಭಾವಿಕವಾಗಿ ಮಾಡದೇ ಇರೋ ಹಾಗೆ ಮಾಡ್ತೀವಿ. ಇದ್ರಿಂದ ಮಾನಸಿಕ ಒತ್ತಡ ಹೆಚ್ಚಾಗೋದಲ್ದೆ ನಮ್ಮ ಆರೋಗ್ಯದಮೇಲೂ ಕೆಟ್ಟ ಪರಿಣಾಮ ಬೀರುತ್ತೆ.

7. ಮನೆಗೆ ಬಂದವರಿಗೆ ಕುಡಿಯಕ್ಕೆ ನೀರು ಕೊಡೋದು

ಮನೆಗೆ ಬಂದವರಿಗೆ ಕೂರಕ್ಕೆ ಹೇಳಿ ಮೊದಲು ಕುಡಿಯಲು ನೀರು ಕೊಡಿ ಅಂತ ಹಿಂದಿನಿಂದಲೂ ಹೇಳ್ತ ಬಂದಿದ್ದಾರೆ. ಪ್ರತಿಯೊಬ್ಬರ ದೇಹದಲ್ಲೂ ಅವರದೇ ಆದ ಶಕ್ತಿ ಇರುತ್ತೆ. ಹೊರಗಿನಿಂದ ಬೇರೆಯವರು ಬಂದಾಗ ಅವರ ದೇಹದಲ್ಲಿರೋ ಶಕ್ತಿ ನಮ್ಮ ದೇಹದಲ್ಲಿರೋ ಶಕ್ತಿಗೆ ಅಡ್ಡಿಪಡಿಸುತ್ತೆ. ಹೊರಗಿನಿಂದ ಬಂದವರಿಗೆ ಕುಡಿಯಕ್ಕೆ ತಣ್ಣೀರು ಕೊಡೋದ್ರಿಂದ ಅವರ ದೇಹದ ಬಿಸಿ ತಣ್ಣಗಾಗಿ ನಮ್ಮ ಶಕ್ತಿಗೆ ಏನೂ ಅಡ್ಡಿ ಆಗಲ್ವಂತೆ.  ಈಗ ಗೊತ್ತಾಯ್ತ ಯಾಕೆ ಮೊದಲು ಕೊಡಿಯಾಕ್ಕೆ ನೀರು ಕೊಡ್ತಾರೆ ಅಂತ?

8. ಚಪ್ಪಲಿಗಳನ್ನ ಸಿಕ್ಕ ಸಿಕ್ಕ ಜಾಗದಲ್ಲೆಲ್ಲ ಬಿಡೋದು

ಕೆಲವೊಬ್ಬರಿಗೆ ಚಪ್ಪಲಿನ ಎಲ್ಲಿ ಅಂದ್ರೆ ಅಲ್ಲಿ ಬಿಡೋ ಅಭ್ಯಾಸ ಇರುತ್ತೆ. ಸರಿಯಾಗಿ ಒಂದು ಜಗದಲ್ಲಿ ಬಿಡಲ್ಲ. ಎಲ್ಲೆಲ್ಲೋ ಚಪ್ಪಲಿ ಬಿಡೋದ್ರಿಂದ ನಮ್ಮ ಶತ್ರುಗಳು ಹೆಚ್ಚಾಗ್ತಾರಂತೆ, ಅಷ್ಟೇ ಅಲ್ಲ ಇದು ಸಮಾಜದಲ್ಲಿ ನಮ್ಮ ಸ್ಥಿತಿ ಗತಿ ಏನು, ನಮ್ಮ ಸ್ಥಾನ ಮಾನ ಏನು ಅನ್ನೋದನ್ನ ತೋರ್ಸುತ್ತೆ.

9. ಅಡುಗೆ ಮನೆ ಕ್ಲೀನ್ ಆಗಿಲ್ದೇ, ಅಲ್ಲಿರೋ ಎಲ್ಲ ವಸ್ತುಗಳೂ ಹೆಗ್ಹೇಗೋ ಹರಡಿದ್ರೆ

ಅಡುಗೆ ಮನೆ ಕ್ಲೀನ್ ಆಗಿಲ್ದೇ, ಅಲ್ಲಿರೋ ಎಲ್ಲ ವಸ್ತುಗಳೂ ಹೆಗ್ಹೇಗೋ ಹರಡಿದ್ರೆ ಮುಂದೆ ಊಟ ಸಿಗೋದೂ ಕಷ್ಟ ಆಗುತ್ತಂತೆ. ಅಡುಗೆ ಮನೆ ಅನ್ನಪೂರ್ಣೇಶ್ವರಿ ಇರೋ ಜಾಗ, ಅದು ಕ್ಲೀನ್ ಆಗಿಲ್ಲ ಅಂದ್ರೆ ಅವಳು ನಮ್ಮ ಹತ್ರ ಇರಲ್ಲ ಅಂತಾರೆ. ಇನ್ನು ಕ್ಲೀನ್ ಆಗಿಲ್ಲ ಅಂದ್ರೆ ಆ ಜಾಗದಲ್ಲಿ ಅಡುಗೆ ಮಾಡಿ ತಿಂದ್ರೆ ನಮ್ಮ ಆರೋಗ್ಯದ ಗತಿ ಏನು ಅಂತ ನಿಮಗೇ ಗೊತ್ತಿರುತ್ತೆ.

10. ಗಿಡ ಮರಗಳಿಗೆ ನೀರು ಹಾಕೋದು

ಕೆಲವರಿಗೆ ಗಿಡ ಮರಗಳಿಗೆ ನೀರು ಹಾಕೋದು ಅಂದ್ರೆ ತುಂಬಾನೇ ಇಷ್ಟ. ಹೀಗೆ ಮಾಡೋವ್ರಿಗೆ ತಮ್ಮ ಸಂಸಾರದಲ್ಲಿ, ಪ್ರೀತಿ ಪ್ರೇಮದ ವಿಷಯದಲ್ಲಿ ಯಾವುದೇ ತೊಂದರೆ ಬರಲ್ವಂತೆ. ನಿಮ್ಮ ಮನೇಲಿರೋ ಗಿಡಗಳಿಗೆ ಆಗ್ಲಿ ಅಥವಾ ಮನೆ ಮುಂದಿರೋ ಗಿಡ ಮರಗಳಿಗೆ ಆಗ್ಲಿ ಆಗಾಗ ನೀರು ಹಾಕೋ ಅಭ್ಯಾಸ ಇದ್ರೆ ಒಳ್ಳೇದು.

 

 

11. ಹಾಸಿಗೆ, ಹೊದಿಕೆ ಸರಿಯಾಗಿ ಇಟ್ಕೊಳ್ದೆ ಇರೋದು

ಕೆಲವೊಬ್ರು ಆಗಾಗ ಬೆಡ್ ಶೀಟ್ ಚೇಂಜ್ ಬದಲಾಯಿಸಲ್ಲ, ಹಾಸಿಗೆಯಿಂದ ಎದ್ದಮೇಲೆ ಹಾಸಿಗೆ ಸುತ್ತಿಡದೆ ಇರೋದು, ಹೊದಿಕೆಗಳನ್ನ ಹಾಗೆ ಬಿಡೋದು ಮಾಡ್ತಾರೆ . ಹೀಗೆ ಮಾಡೋವ್ರಿಗೆ ಸೋಮಾರಿತನ ಇದ್ದೆ ಇರುತ್ತೆ, ಅಷ್ಟೇ ಅಲ್ಲ ಇಂತವರಿಗೆ ತಾವು ಮಾಡೋ ಕೆಲಸದ ಕಡೆ ಗಮನ ಇರಲ್ಲ. ಅವರು ಎಷ್ಟೇ ಕಷ್ಟ ಪಟ್ರು ಅವರ ಆಸೆ ಪೂರೈಸ್ಕೊಳ್ಳೋದು ಕಷ್ಟ.

12. ಜೋರಾಗಿ ಮಾತಾಡೋದು

ಕೆಲವೊಬ್ರು ತಮ್ಮ ಸಾಮಾನ್ಯ ಧ್ವನಿಗಿಂತ ಜೋರಾಗಿ ಮಾತಾಡ್ತಾರೆ. ಹೀಗೆ ಮಾಡೋದ್ರಿಂದ ಸಂಭಂದಗಳನ್ನ ಉಳಿಸಿಕೊಳ್ಳೋದಷ್ಟೇ ಅಲ್ಲ ನಮ್ಮ ಜೀವನದಲ್ಲಿ ವಿವೇಕದಿಂದ ಇರೋದಕ್ಕೂ ಕಷ್ಟ ಪಡ್ಬೇಕಾಗುತ್ತಂತೆ.

13. ಕಾಲುಗಳನ್ನ ಸರೀಗೆ ತೊಳೀದೆ ಇರೋದು

ಕೆಲವರು ತಮ್ಮ ದೇಹದ ಶುಚಿ ಕಡೆ ಗಮನ ಕೊಡೋದೇ ಇಲ್ಲ. ಅದರಲ್ಲೂ ಕಾಲಿನ ಬಗ್ಗೆ ಅಷ್ಟಾಗಿ ಕಾಳಜಿ ವಹಿಸಲ್ಲ. ನಿಜ ಹೇಳ್ಬೇಕು ಅಂದ್ರೆ ನಮ್ಮ ಇಡೀ ದೇಹದ ಭಾರ ಈ ಕಾಲಿನ ಮೇಲೆ ನಿಂತಿರೋದು. ಇದು ನಮ್ಮ ದೇಹದ ಆಧಾರ ಕಂಬದ ಹಾಗೆ. ಇದು ಕ್ಲೀನ್ ಆಗಿಲ್ದೇ ಇದ್ರೆ ನಮ್ಮ ಇಡೀ ದೇಹಕ್ಕೆ ಅಪಾಯ ಗ್ಯಾರಂಟಿ. ಇದು ಗೊತ್ತಿರೋದೇ.. ಅದ್ರಲ್ಲೇನಿದೆ ಹೊಸದು ಅಂದ್ರ... ಯಾರು ಕಾಲನ್ನ ಕ್ಲೀನ್ ಆಗಿ ಇಟ್ಕೊಳಲ್ವೋ ಅವರು ತಮ್ಮ ಮನೆತನದ ಗೌರವ ಹೆಚ್ಚಿಸೋ ಯಾವುದೇ ಕೆಲಸ ಮಾಡಲ್ಲ, ತಮ್ಮ ಮನೆತನಕ್ಕೆ ಬೆಲೆ ಕೊಡಲ್ಲ ಅಂತಾರೆ. ಇದ್ರಿಂದ ನಮ್ಮ ಭವಿಷ್ಯ ನೆಮ್ಮದಿಯಿಂದ ಇರಲ್ವಂತೆ.

14. ಹಿರಿಯರಿಗೆ ಗೌರವ ತೋರಿಸದೆ ಇರೋದು

ಯಾರು ತಮ್ಮ ಮನೆಯಲ್ಲಿರೋ ಹಿರಿಯರಿಗೆ ಗೌರವ ತೋರಿಸದೆ ಇರೋದು, ಅವರನ್ನ ಕೀಳಾಗಿ ನೋಡೋದು, ಅವರ ಬಗ್ಗೆ ಅಸಡ್ಡೆ ತೋರ್ಸೋದು ಮಾಡ್ತಾರೋ ಅಂತವರ ಮನೆ ಉದ್ದಾರ ಆಗಲ್ಲ. ಇದು ಸಂಸಾರ, ಸಮಾಜದಲ್ಲಿ ಸ್ಥಾನಮಾನ ಹಾಗೆ ನಮ್ಮ ವೃತ್ತಿ ಜೀವನಕ್ಕೂ ಅಪಾಯ ತರುತ್ತೆ. ಮನೆಯ ಹಿರಿಯರು ಸಂತೋಷವಾಗಿದ್ರೆ ಯಾವುದೇ ತೊದರೆ ಇರಲ್ಲ.

15. ಎಲ್ಲಿ ಅಂದ್ರೆ ಅಲ್ಲಿ ಉಗಿಯೋದು

ಕೆಲವೊಬ್ಬರಿಗೆ ಸಿಕ್ಕ ಸಿಕ್ಕ ಜಾಗದಲ್ಲೆಲ್ಲ ಉಗಿಯೋ ಅಭ್ಯಾಸ ಇರುತ್ತೆ. ಮನೆ ಸುತ್ತ ಮುತ್ತ, ಬೀದಿ, ಆಫೀಸ್ ಹೀಗೆ ಎಲ್ಲಾದ್ರೂ ಸರಿ ಉಗಿತಿರ್ತಾರೆ. ಹೀಗೆ ಪ್ರತಿಸಲ ಮಾಡಿದಾಗಲೂ ತಮ್ಮ ಯಶಸ್ಸು, ಸಮದಲ್ಲಿರೋ ಗೌರವ, ತಮ್ಮ ಸಿರಿ ಸಂಪತ್ತನ್ನ ಹೊರಗೆ ಉಗಿತಿರ್ತಾರೆ. ಈ ಅಭ್ಯಾಸ ಇರೋವ್ರು ಮುಂದಿನಸಳ ಉಗಿಯೋದಕ್ಕೆ ಮುಂಚೆ ಇದನ್ನ ನೆನಪಿಟ್ಕೊಳಿ.

16. ಮಾದಕ ವಸ್ತು ಹಾಗೂ ಹೆಂಡ ಸಾರಾಯಿ ಕುಡಿಯೋದು

ಮಾದಕ ವಸ್ತು ಹಾಗೂ ಹೆಂಡ ಸಾರಾಯಿ ಕುಡಿಯೋದು ಈ ಅಭ್ಯಾಸ ಇದ್ರೆ ಆರೋಗ್ಯ ಏನಾಗುತ್ತೆ ಅನ್ನೋದು ಗೊತ್ತಿರೋದೇ. ಈ ಅಭ್ಯಾಸ ಇರೋ ಜನ ಕಷ್ಟಪಟ್ಟು ಕೆಲಸ ಮಾಡಬಹುದು, ಆದರೆ ಅವರ ಪ್ರಯತ್ನದ ಫಲ ಅನುಭವಿಸಕ್ಕೆ ಅವಕಾಶ ಸಿಗಲ್ಲ.

ಹಿಂದಿನಕಾಲದಲ್ಲಿ ಒಳ್ಳೆ ಅಭ್ಯಾಸಗಳನ್ನ ಇಟ್ಕೊಂಡ್ರೆ ದೇವರಿಗೆ ಖುಷಿ ಆಗುತ್ತೆ, ಒಳ್ಳೇದಾಗುತ್ತೆ , ಇಂತ ಅಭ್ಯಾಸ ಬೆಳೆಸ್ಕೊಳಿ ಅಂತ ಹೇಳಿರ್ತಾರೆ. ಹಾಗೆ ಕೆಟ್ಟ ಅಭ್ಯಾಸಗಳ ಬಗ್ಗೆ ಹೇಳೋವಾಗ ಆ ಗ್ರಹದ  ಕೆಟ್ಟ ದೃಷ್ಟಿ ಬೀಳುತ್ತೆ, ಈ ಗ್ರಹದ ಕೆಟ್ಟ ದೃಷ್ಟಿ ಬೀಳುತ್ತೆ ಅಂತ ಹೇಳಿರ್ತಾರೆ. ಆದ್ರೆ ಹೀಗೆ ಸರಿಯಿಯಾಗಿ ಬಿಡಿಸಿ ಹೇಳಿರೋದು ಕಮ್ಮಿ.

ಈಗ ಇಲ್ಲಿ ನಮ್ಮ ಅಭ್ಯಾಸದಿಂದ ಏನಾಗುತ್ತೆ ಅಂತ ಹೇಳಿರೋದನ್ನ ಹಿಂದಿನವರು ಹೇಳ್ತಿದ್ದ ಮಾತಿಗೆ ಹೋಲಿಸಿ ನೋಡಿ ಯಾವ ಅಭ್ಯಾಸಕ್ಕೆ ಯಾವ ಗ್ರಹದ ಬಗ್ಗೆ, ಯಾವ ದೇವರ ಬಗ್ಗೆ ಹೇಳ್ತಿದ್ರು ಅಂತ ನಿಮಗೇ ಚೆನ್ನಾಗಿ ಅರ್ಥ ಆಗುತ್ತೆ.

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ: