ನಿಮ್ಮ ಮುಖ ನಿಮ್ಮ ಆರೋಗ್ಯದ ಬಗ್ಗೆ ಏನ್ಹೇಳತ್ತೆ ಅಂತ ತಿಳ್ಕೊಳಿ

ಮುಖ ಬರೀ ಮನಸ್ಸಿಗೆ ಮಾತ್ರ ಅಲ್ಲ, ಆರೋಗ್ಯಕ್ಕೂ ಕನ್ನಡಿ

ಮುಖ ಮನಸ್ಸಿನ್ ಕನ್ನಡಿ ಅಂತಾರೆ. ಆದ್ರೆ ಬರೀ ಮನಸ್ಸಲ್ಲ ಕಣ್ರಿ... ನಮ್ ಆರೋಗ್ಯ ಹೇಗಿದೆ? ದೇಹದಲ್ಲಿರೋ ಎಲ್ಲಾ ಪಾರ್ಟ್ಸೂ ನೆಟ್ಟಗ್ ಕೆಲ್ಸ ಮಾಡ್ತಿದ್ಯಾ ಅಂತಾನೂ ಹೇಳತ್ತೆ ನಮ್ ಮುಖ. ಸುಮಾರ್ ಜನ ಬೆಳಗಾದ್ ತಕ್ಷಣ ಮುಖ ಕನ್ನಡಿನಲ್ಲಿ ನೋಡ್ಕೊಂಡು, ಮೊಡವೆ ಬಂದಿದ್ರೆ ಅದೆಷ್ಟ್ ಬೈಕೊತಾರೋ. ಇನ್ನು ಕೆಲವ್ರು ವಯಸ್ಸಾಗ್ತಿರೋ ಲಕ್ಷಣಗಳು ಅಂದ್ರೆ ಕಣ್ ಕೆಳಗೆ ಚರ್ಮ ಜೋತ್ ಬಿದ್ದಿರದು, ಕಣ್ ಸುತ್ತಾ ಕಪ್ಪಾಗಿರದು... ಇದೆಲ್ಲಾ ನೋಡ್ಕೊಂಡು ಅಯ್ಯೋ ಅಂದ್ವಾಗಿದ್ ಮುಖ ಹೀಗ್ ಆಗ್ತಿದ್ಯಲ್ಲಾ ಅಂತ ಬೇಜಾರ್ ಮಾಡ್ಕೊತಾರೆ. ಇಲ್ಲಿ ಬರೀ ಸೌಂದರ್ಯದ ಪ್ರಶ್ನೆ ಅಲ್ಲ. ನಮ್ ದೇಹದ್ ಒಳಗಿನ ಅಂಗಾಗಗಳು ಸರೀಗ್ ಕೆಲ್ಸ ಮಾಡ್ತಿಲ್ಲ ಅಂತಾನೋ, ಯಾವ್ದೋ ಅಂಗಕ್ಕೆ ಏನೋ ಸೀರಿಯಸ್ಸಾಗೇ ತೊಂದ್ರೆ ಆಗಿದೆ ಅಂತಾನೋ ಅರ್ಥ ಬರತ್ತೆ. ಹಾಗಾಗಿ, ಪ್ರತೀ ಸಲ ಮೇಕಪ್ ಮಾಡ್ಕೊಳೋ ಮೊದ್ಲು ಮುಖದಲ್ಲಿ ಏನಾದ್ರೂ ಬದಲಾವಣೆ ಆಗಿದ್ಯಾ ಅಂತ ಚೆನ್ನಾಗಿ ಗಮನಿಸಿ ಆಮೇಲ್ ಮೇಕಪ್ ಮಾಡ್ಕೊಳಿ. ಇನ್ನು ಗಮನಿಸ್ಬೇಕಿರೋ ಬದಲಾವಣೆಗಳು ಏನು ಅಂತೀರಾ? ಕೆಳಗ್ ಪಟ್ಟಿ ಮಾಡ್ ಕೊಟ್ಟಿದೀವ್ ನೋಡಿ. ಏನೇನ್ ಬದಲಾವಣೆ ಆದ್ರೆ ಏನೇನ್ ತೊಂದ್ರೆ ಆಗಿರ್ಬೋದು ಅಂತ...ಓದ್ ನೋಡಿ. ಉಪ್ಯೋಗಕ್ ಬರತ್ತೆ.

1. ಹಣೆ

ನಿಮ್ ಹಣೇ ಮೇಲಿನ್ ಚರ್ಮ ಬಿಗಿಯಾಗಿದ್ಯಾ, ಕಂದೋಗಿದ್ಯ ಅಥ್ವ ಕೆಂಪಗಾಗಿದ್ಯಾ? ಹಾಗೇನಾದ್ರು ಇದ್ರೆ, ನಿಮ್ಮ ಪಚನ ಕ್ರಿಯೆ ಸರೀಗ್ ನಡೀತಿಲ್ಲ ಅಂತ ಅರ್ಥ. ಹಣೆಗ್ ಈ ತರ ತೊಂದ್ರೆಯಾಗಿದ್ರೆ ನಮ್ಗೆ ಲಿವರಲ್ಲಿ ಏನೋ ಸಮಸ್ಯೆ ಆಗಿದೆ ಅಂತ ತೋರ್ಸತ್ತೆ. ಗೊತ್ತೇ ಇದೆ ಅಲ್ವ, ನಮ್ ದೇಹದಿಂದ ವಿಷಕಾರಿ ಅಂಶಗಳ್ನ ಹೊರಗ್ ಹಾಕಕ್ಕೆ ಲಿವರ್ ಚೆನ್ನಾಗ್ ಕೆಲ್ಸ ಮಾಡೋದು ತುಂಬಾ ಮುಖ್ಯ. ಇನ್ನು ಲಿವರ್ ಜೊತೆ ಗಾಲ್ ಬ್ಲಾಡರ್ ಕೂಡ ಸರಿಯಾಗ್ ಕೆಲ್ಸ ಮಾಡ್ತಿಲ್ಲ ಅಂದ್ರೂ ಈ ತರ ಆಗ್ಬೋದು.

ಮೂಲ

2. ಕಣತಲೆ (ಟೆಂಪಲ್ಸ್)

ಕಣ್ಣುಗಳ ಪಕ್ಕ, ಹಣೆಗೂ ಕೆನ್ನೆಗೂ ಇರೋ ಮಧ್ಯದ್ ಭಾಗನೇ ಕಣತಲೆ. ಈ ಕಣತಲೆ ಏನಾದ್ರೂ ಕೆಂಪಾಗಿದ್ರೆ ಅಥ್ವ ಊದ್ಕೊಂಡಿದ್ರೆ, ಮೂತ್ರಪಿಂಡ ಮಿತಿಮೀರಿ ತುಂಬೋಗಿದೆ ಅಂತ ಅರ್ಥ. ದೇಹದಲ್ಲಿ ತುಂಬಾನೇ ವಿಷದ ಅಂಶ ಸೇರ್ಕೊಂಡಿದ್ರೆ ಹೀಗಾಗತ್ತೆ. ಆದ್ರೆ ಇನ್ನೂ ಒಂದ್ ಕಾರಣ ಇರ್ಬೋದು... ಮಾರ್ಕೆಟ್ನಲ್ಲಿ ಸಿಗೋ ಸಂಸ್ಕರಿಸಿದ ಆಹಾರ ಪದಾರ್ಥನ ಸಿಕ್ಕಾಪಟ್ಟೆ ತಿನ್ನೋದ್ರಿಂದಾನೂ ಈ ಥರದ ಚರ್ಮದ್ ತೊಂದ್ರೆ ಬರತ್ತೆ.

ಮೂಲ

3. ಕಣ್ಣುಗುಡ್ಡೆ

ನಮ್ಮ ದೇಹದಲ್ಲಿ ಬಿಳೀ ರಕ್ತ ಕಣಗಳು ಇರೋದೇ ರೋಗನಿರೋಧಕ ಶಕ್ತೀನ ನಮ್ಮಲ್ಲಿ ತುಂಬಿ, ಆರೋಗ್ಯಾನ ಚೆನ್ನಾಗಿ ಕಾಪಾಡಕ್ಕೆ. ಅಂಥಾ ಬಿಳಿ ರಕ್ತ ಕಣಗಳ್ನ ಉತ್ಪತ್ತಿ ಮಾಡೋದು, ಸಂಗ್ರಹಿಸಿ ಇಡೋದು ಸ್ಪ್ಲೀನ್ ಕೆಲ್ಸ. ಆದ್ರೆ ಯಾವಾಗ ಈ ಸ್ಪ್ಲೀನ್ ಸರಿಯಾಗ್ ಕೆಲ್ಸ ಮಾಡಲ್ವೋ, ಆಗ ಕಣ್ಣಿನ್ ಗುಡ್ಡೆ ಊದ್ಕೊಂಡು, ಕೆಂಪಗೆ ಕಾಣತ್ತೆ. ಅಥ್ವ ಮಾಮೂಲ್ಗಿಂತ ಏನೋ ವ್ಯತ್ಯಾಸ ಇದ್ಯಲ್ಲ ಅಂತನಾದ್ರೂ ಅನ್ಸತ್ತೆ. ಆಗ ಸಾಧ್ಯವಾದಷ್ಟು ಬೇಗ ಡಾಕ್ಟರ್ಗೆ ತೋರುಸ್ಬೇಕು. ಇಲ್ಲ ಅಂದ್ರೆ ತುಂಬಾ ಅಪಾಯ. 

ಮೂಲ

4. ಕಣ್ಣಿನ ಸುತ್ತಾ ಕಪ್ಪು ವೃತ್ತ

ಸಾಮಾನ್ಯವಾಗಿ ರಾತ್ರಿ ನಿದ್ದೆ ಸರಿಯಾಗ್ ಆಗ್ಲಿಲ್ಲ ಅಂದ್ರೆ ಈ ಕಪ್ಪು ವೃತ್ತ ಬರೋದ್ ಸಹಜ. ಆದ್ರೆ ಚೆನ್ನಾಗ್ ನಿದ್ದೆ ಮಾಡಿದ್ಮೇಲೆ ಅದು ಹೊರಟೋಗ್ಬೇಕು. ಅದು ಹೋಗ್ದೆ, ಕಂದೋಗಿ, ಮಾಸಲು ಬಣ್ಣ ಏನಾದ್ರು ಕಾಣ್ತಿದ್ರೆ, ಮೂತ್ರಪಿಂಡದಲ್ಲಿ ಏನೋ ಎಡವಟ್ಟಾಗಿದೆ ಅಂತ ಅರ್ಥ. ಇನ್ನು ಮಾನಸಿಕ ಒತ್ತಡ ತುಂಬಾ ಇದ್ರೆ, ಕಣ್ಣಿನ್ ಕೆಳಗಿನ್ ಚರ್ಮ ಜೋತು ಬೀಳತ್ತೆ. ಆದ್ರೆ ಮೊದ್ಲು ಮೊದ್ಲು ಕಪ್ಪು ವೃತ್ತ ಬಂದಾಗ ಅಯ್ಯೋ ನನ್ನ್ ಮೂತ್ರಪಿಂಡಕ್ ಏನೋ ಆಗೋಗಿದೆ ಅಂತ ಹೆದ್ರೋ ಅವಶ್ಯಕತೆ ಇಲ್ಲ ಕಣ್ರಿ. ಯಾಕಂದ್ರೆ ಊಟ ತಿಂಡಿ ಟೈಮಿಗ್ ಸರಿಯಾಗ್ ಮಾಡ್ದೇ ಇದ್ರೆ, ಪೌಷ್ಟಿಕವಾದ ಆಹಾರ ತಿಂತಾ ಇಲ್ಲ ಅಂದ್ರೂ ಹೀಗಾಗತ್ತೆ. ಜೊತೆಗೆ ಇನ್ನೊಂದ್ ವಿಷ್ಯ, ಯುವಕರಲ್ಲಿ ಕಣ್ಣಿನ್ ಕೆಳಗೆ 'ಕ್ರೋಸ್ ಫೀಟ್' ಆಗೋದನ್ನ ನೋಡಿರ್ತೀವಿ. ಆಗ ಅವ್ರಿಗೆ ಯಾವ್ದೋ ನೆಗೆಟಿವ್ ಭಾವನೆ, ಯೋಚ್ನೆ ಕಾಡ್ತಿದೆ ಅಂತ ಅರ್ಥ ಅಥ್ವ ಲಿವರ್ ತೊಂದ್ರೆನೂ ಇರ್ಬೋದು. ಯಾವ್ದಕ್ಕೂ ಡಾಕ್ಟರ್ ಹತ್ರ ತೋರ್ಸೋದ್ ಒಳ್ಳೇದು.

ಮೂಲ

5. ಕೆನ್ನೆ ಮೇಲ್ಭಾಗ ಮತ್ತೆ ಕೆನ್ನೆ ಮೂಳೆಗಳು

ಯಾರಿಗೆಲ್ಲಾ ಕೆನ್ನೆ ಮೇಲ್ಭಾಗದಲ್ಲಿ ಚರ್ಮದ ಬಣ್ಣ ಕಂದುಬಣ್ಣಕ್ ತಿರ್ಗಿರತ್ತೋ, ಚರ್ಮ ತೂತ್ ಬಿದ್ದಿರತ್ತೋ, ಅವ್ರಿಗೆ ಶ್ವಾಸಕೋಶದಲ್ಲಿ ಏನೋ ತೊಂದ್ರೆ ಆಗಿದೆ ಅಂತ ಅರ್ಥ. ನೀವ್ ನೋಡಿರ್ಬೋದು, ಸಾಮಾನ್ಯವಾಗಿ ಹೊಗೆ ಬಿಡೋರ್ಗೆ, ಅದೇ ಕಣ್ರಿ ಸ್ಮೋಕ್ ಮಾಡೋರ್ ಮುಖ ಹೀಗೇ ಇರತ್ತೆ. ಹಾಗಾಗಿ ಹುಷಾರಾಗಿರಿ.

ಮೂಲ

6. ಕೆನ್ನೆ ಕೆಳಭಾಗ

ಈ ಜಾಗದಲ್ಲಿ ಚರ್ಮದ ಬಣ್ಣ ಕಂದೋಗಿದ್ರೆ, ಅವ್ರು ಸಿಕ್ಕಾಪಟ್ಟೆ ಎಣ್ಣೆ ಪದಾರ್ಥ, ಕರಿದ್ ತಿಂಡಿ, ಚೀಸು, ಪನೀರ್... ಹೀಗೆ ಕೊಬ್ಬಿನಂಶ ಜಾಸ್ತಿ ಇರೋ ಆಹಾರ ತಿಂತಿದಾರೆ ಅಂತ ಗೊತ್ತಾಗತ್ತೆ. ಇದ್ರಿಂದ ಪಾಪ ಹೊಟ್ಟೆಗೂ ಓವರ್ ಟೈಂ ಕೆಲ್ಸ. ಇನ್ನು ಕಂದುಬಣ್ಣದ್ ಜೊತೆ ಆ ಭಾಗದ್ ಮಾಂಸಖಂಡಾನೂ ಶಕ್ತಿ ಇಲ್ದೇ ಜೋತ್ ಬಿದ್ದಿದ್ರೆ, ಅವ್ರಿಗೆ ಆಹಾರ ಜೀರ್ಣ ಆಗೋದ್ರಲ್ಲೂ ತೊಂದ್ರೆ ಇದೆ ಅಂತ ಅರ್ಥ. ಇಲ್ಲಿ ಇನ್ನೊಂಥರಾ ತೊಂದ್ರೆನೂ ಕಾಣುಸ್ಬೋದು. ಏನಪ್ಪ ಅಂದ್ರೆ, ಈ ಕೆನ್ನೆ ಕೆಳಭಾಗ್ದಲ್ಲಿ ಊತ, ಮೊಡವೆ ಇದ್ರೆ, ಅವ್ರಿಗೆ ಕೆಲವೊಂದು ಆಹಾರ ಪದಾರ್ಥಗಳು ದೇಹಕ್ಕೆ ಒಗ್ಗಲ್ಲ, ಅಲರ್ಜಿ ಆಗತ್ತೆ ಅಂತ ತಿಳ್ಸತ್ತೆ. ಅದ್ಯಾವ್ದು? ಏನ್ ತಿಂದಾಗ್ ಮೊಡವೆ ಏಳ್ತಿದೆ ಅಂತ ಗಮನಿಸ್ಕೊಂಡು ತಿಂದ್ರೆ, ಒಂದ್ ಮಟ್ಟಕ್ಕೆ ಈ ತೊಂದ್ರೆ ತಡಿಬೋದು.

ಮೂಲ

7. ಮೂಗಿನ ಮೇಲ್ಭಾಗ ಮತ್ತು ಮೂಗಿನ ಹೊಳ್ಳೆಗಳು

ಮೂಗಿನ್ ಚರ್ಮ ಜೋತ್ ಬಿದ್ದಿದ್ರೆ ಅಥ್ವ ಊದ್ಕೊಂಡಿದ್ರೆ, ಥೈರಾಯಿಡ್ ಗ್ರಂಥಿ ಸರಿಯಾಗ್ ಕೆಲ್ಸ ಮಾಡ್ತಿಲ್ಲ ಅಂತ ಅರ್ಥ ಕಣ್ರಿ. ಇನ್ನು ಮೂಗಿನ್ ಹೊಳ್ಳೆ ಸುತ್ತಾ ಊತ ಇದ್ರೆ, ಸಾಮಾನ್ಯ ಆಸ್ತಮ ರೋಗಿಗಳಲ್ಲಿ ಕಾಣೋ ಶ್ವಾಶಕೋಶ ಹಿಗ್ಗಿರೋ ಖಾಯಿಲೆ ಇರ್ಬೋದು. ಹಾಗೇನೇ ಮೂಗಿನ್ ಹೊಳ್ಳೆ ಸುತ್ತಾ ಚರ್ಮ ಕೆಂಪಾಗಿದ್ರೆ, ಶ್ವಾಸನಾಳದಲ್ಲಿ ಸೋಂಕಾಗಿರ್ಬೋದು. ಸೋ, ಮೂಗಲ್ಲಿ ಇಂಥದ್ದೇನಾದ್ರೂ ಬದಲಾವಣೆ ಕಂಡ್ರೆ ತಡಮಾಡ್ದೇ ಡಾಕ್ಟರ್ ಹತ್ರ ಹೋಗಿ. ಶ್ವಾಸಕೋಶಕ್ಕೆ ಸಂಬಂಧ ಪಟ್ಟ ತೊಂದ್ರೆ ಅಲ್ವ. ಜಾಸ್ತಿ ನಿಧಾನ ಮಾಡ್ಬಾರ್ದು.

8. ಮೂಗಿನ ತುದಿ

ಕೆನ್ನೆ ಕೆಂಪಾದ್ರೆ, ನಾಚಿಕೆ ಅಂತ ಹೇಗ್ ಹೇಳ್ತರೋ, ಅದೇ ಥರ ಮೂಗಿನ್ ತುದಿ ಕೆಂಪಾದ್ರೆ ,' ಅಬ್ಬಾ ಇವ್ರಿಗೆ ಮೂಗಿನ್ ತುದೀಲೇ ಕೋಪ' ಅನ್ನೋ ಮಾತಿದೆ. ಆದ್ರೆ ಅವೆಲ್ಲಾ ಬರೀ ಕಾಲೆಳಿಯಕ್ಕೆ ಅಷ್ಟೇ. ನಿಜ್ವಾದ್ ವಿಷ್ಯ ಏನಪ್ಪ ಅಂದ್ರೆ, ಮೂಗಿನ್ ತುದಿ ಕೆಂಪಾಗಿದ್ರೆ, ಹೃದಯಕ್ ಸಂಬಂಧ ಪಟ್ಟ ಏನೋ ತೊಂದ್ರೆ ಇದೆ ಅಂತ. ಹಾಗಾಗಿ, ಮೂಗೇನಾದ್ರೂ ಗಿಣಿ ಮೂತಿ ತರ ಆಗಿದ್ರೆ, ಆದಷ್ಟು ಬೇಗ ಡಾಕ್ಟರ್ ಹತ್ರ ಹೋಗ್ ತೋರ್ಸಿ. ಕೆಂಪು ಮೂಗು ಗಿಣೀಗ್ ಮಾತ್ರ ಚಂದ. ನಮ್ಗೆಲ್ಲಾ ಅದು ರೋಗದ್ ಲಕ್ಷಣ.

ಮೂಲ

9. ಮೂಗು ಮತ್ತೆ ಮೇಲ್ತುಟಿ ಮಧ್ಯದ ಭಾಗ

ತುಂಬಾನೇ ಮಾನಸಿಕ ಒತ್ತಡ ಇದ್ರೆ, ಆಗ ಈ ಜಾಗ್ದಲ್ಲಿ ಸುಕ್ಕು ಬೀಳತ್ತೆ. ಬರೀ ಮಾನಸಿಕವಾಗಿ ಅಲ್ಲ, ದೇಹಕ್ಕೆ ಆಯಾಸ ಆಗಿದ್ರೂ, ಈಸ್ಟ್ರೋಜನ್ ಹಾರ್ಮೋನ್ ಲೆವೆಲ್ ಹೆಚ್ಚುಕಮ್ಮಿಯಾಗಿ, ಸಂತಾನೋತ್ಪತ್ತಿಗೆ ಸಂಬಂಧ ಪಟ್ಟ ಅಂಗಗಳ ತೊಂದ್ರೆಗ್ ಕಾರಣ ಆಗತ್ತೆ. ಅದೇ ಈ ಥರ ಮೂಗಿನ್ ಕೆಳಗೆ ಕಾಣಿಸ್ಕೊಂಡು ಎಚ್ಚರಿಕೆ ಕೊಡುತ್ತೆ. ಅದನ್ನ ಅರ್ಥ ಮಾಡ್ಕೊಂಡು, ಕೆಲ್ಸ ಮಾಡುವಾಗ, ಯೋಚ್ನೆ ಹಚ್ಕೊಳುವಾಗ ಚೂರು ನಿಗಾ ಇಟ್ಕೊಬೇಕು.

ಮೂಲ

10. ತುಟಿಗಳು

ಸಣ್ಣ ಕರುಳು ಹೇಗ್ ಕೆಲ್ಸ ಮಾಡ್ತಿದೆ ಅಂತ ಹೊರ್ಗಡೆ ನಮಗ್ ತೋರ್ಸೋದೇ ನಮ್ಮ ತುಟಿಗಳು. ಹೇಗೆ ಅಂತೀರ? ತುಟಿ ಮೇಲೆ ಹರ್ಪಿಸ್ ಗುಳ್ಳೆಗಳಾದ್ರೆ, ಪದೇ ಪದೇ ಹುಣ್ಣಾಗ್ತಿದ್ರೆ ಮತ್ತೆ ತುಟಿ ಬಣ್ಣ ಕಂದೋಗ್ತಿದ್ರೆ, ಅದೇ ಗುರುತು. ಇವೆಲ್ಲಾ ಸಣ್ಣ ಕರುಳಲ್ಲಿ ತೊಂದ್ರೆ ಈಗ್ತಾನೇ ಶುರುವಾಗ್ತಿದೆ ಅಂತ ತೋರ್ಸತ್ತೆ. ಅದೇ ಕೆಳತುಟಿ ಏನಾದ್ರು ಮಾಮೂಲ್ ಆಕಾರಕ್ಕಿಂತ ದೊಡ್ದದಾಗಿ ಊದ್ಕೊಂಡಿದ್ರೆ, ಖಂಡಿತಾ ಕರುಳು ಸರೀಗ್ ಕೆಲ್ಸ ಮಾಡ್ತಿಲ್ಲ ಅಂತ. ಇನ್ನು ತುಟಿ ತುಂಬಾ ಒಣಗಿದಂಗೆ, ನೀರಸವಾಗಿದ್ರೆ, ರಕ್ತ ಸಂಚಾರ ಚೆನ್ನಾಗ್ ಆಗ್ತಿಲ್ಲ ಅಂತ ಅರ್ಥ. ಜೊತೆಗೆ ಸ್ಲೀನ್, ಮೂತ್ರಕೋಶ, ಲಿವರ್ ಅಥ್ವ ಕರುಳಿನಲ್ಲಿ ಏನೋ ಎಡವಟ್ಟಾಗಿದೆ ಅಂತಾನೂ ಇರ್ಬೋದು.

11. ಗಲ್ಲ

ಹೆಣ್ಮಕ್ಳಿಗೆ ಋತುಸ್ರಾವದ ಎರಡ್ನೇ ಭಾಗದಲ್ಲಿ, ಗಲ್ಲದ ಮೇಲೆ ಮೊಡವೆ ಆಗೋದು ಸಹಜ. ದೇಹದಲ್ಲಾಗೊ ಹಾರ್ಮೊನ್ ಲೆವೆಲ್ ಬದಲಾವಣೆಯಿಂದ ಹೀಗಾಗತ್ತೆ. ಆದ್ರೆ ಇದ್ದಕ್ಕಿದ್ದಂಗೇ ಕಲೆಗಳು, ನೆರಿಗೆಗಳು ಕಾಣಿಸ್ಕೊಂಡ್ರೆ, ದೇಹದ ಕೆಲವು ಅಂಗಾಂಗಗಳು ಸರೀಗ್ ಕೆಲ್ಸ ಮಾಡ್ತಿಲ್ಲ ಅಂತ ಅರ್ಥ. ಇನ್ನು ಗಂಡಸ್ರಲ್ಲಿ, ಗಲ್ಲ ಜೋತ್ ಬೀಳೋದು, ನೆರಿಗೆ ಬರೋದು ಆದ್ರೆ, ಪ್ರಾಸ್ಟೇಟ್ ಗ್ರಂಥಿ ಎನ್ಲಾರ್ಜ್ ಆಗಿದೆ ಅನ್ನೋದ್ರ ಸಂಕೇತ.

ಮೂಲ

ಕನ್ನಡಿ ಮುಂದೆ ಅಲಂಕಾರಕ್ಕೆ ಅಂತ ಗಂಟೆ ಗಟ್ಲೆ ಕಾಲ ಕಳೀತೀವೆ. ಹಾಗೇ ಇನ್ಮುಂದೆ, ದಿನದಲ್ಲಿ ಒಂದ್ 10 ನಿಮಿಷ ಆದ್ರೂ ಇಂಥಾ ರೋಗ ತರೋ ಲಕ್ಷಣಗಳು ಏನಾದ್ರೂ ಮುಖದಲ್ಲಿ ಕಾಣತ್ತ ಅಂತ ನೋಡ್ಕೊಳೋದು ವಾಸಿ ಅಲ್ವಾ? ಅದಕ್ಕೆ ಒಳ್ಳೆ ಸಮಯ ಯಾವ್ದು ಗೊತ್ತಾ? ದಿನದ್ ಕೆಲ್ಸ ಎಲ್ಲಾ ಮುಗ್ದು, ಇನ್ನೇನ್ ಮಲಗ್ಬೇಕು ಅನ್ನುವಾಗ, ಚೆನ್ನಾಗಿ ಮುಖ ತೊಳ್ದು, ಕನ್ನಡಿನಲ್ಲಿ ನೋಡ್ಕೊಳಿ. ಕರೆಕ್ಟಾಗಿ ಗೊತ್ತಾಗತ್ತೆ. ಹಾಗೇ ಅಂತ, ಸುಮ್ಸುಮ್ನೆ ಇಲ್ದೇ ಇರೋ ಲಕ್ಷಣಗಳನ್ನ ಊಹಿಸ್ಕೊಂಡ್ಬಿಡ್ಬೇಡಿ ಮತ್ತೆ!

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ:

ಈ 10 ಚಿಕ್ಕ ಚಿಕ್ಕ ಬದಲಾವಣೆ ಮಾಡ್ಕೊಂಡ್ರೆ ನಿಮ್ಮ ಜೀವನ ದೊಡ್ಡ ರೀತೀಲಿ ಬದಲಾಗತ್ತೆ ಅನ್ನೋದ್ರಲ್ಲಿ ಸಂದೇಹಾನೆ ಇಲ್ಲ

ಒಂದೊಂದ್ಸರ್ತಿ ಊಹೂಂ ಅನ್ನೋಕ್ಕೂ ಗೊತ್ತಿರ್ಬೇಕು

ಜೀವನ ಅದರ ಎಲ್ಲ ರೂಪದಲ್ಲೂ ಕೆಲವೊಮ್ಮೆ ನಮಗೆ ಎಷ್ಟು ಮಾಡಿದ್ರೂ ಅಷ್ಟೇ ಅನ್ನೋ ಭಾವನೆ ಬರೋಹಾಗೆ ಮಾಡಬಹುದು. ಆದ್ರೆ ಜೀವನದಲ್ಲಿ ಒಂದೊಂದ್ಸರ್ತಿ ಎಷ್ಟೇ ಕಷ್ಟ ಬಂದ್ರೂ ಮನಸ್ಸಿದ್ದರೆ ಮಾರ್ಗ ಇದ್ದೇ ಇದೆ ಅನ್ನೋದು ನೆನಪಿರ್ಲಿ.

ಈ 10 ವಿಷಯದ ಬಗ್ಗೆ ಗಮನ ಕೊಟ್ರೆ ನಿಮ್ಮ ಜೀವನ ಬದಲಾಯಿಸಿಕೊಳ್ಳೋದಕ್ಕೆ ಸಹಾಯ ಆಗುತ್ತೆ. ಆದ್ರೆ ಒಂದು ನೆನಪಿರ್ಲಿ... ಇವೆಲ್ಲಾ ಝಟ್ ಪಟ್ ಅಂತ ಆಗೋ ಬದಲಾವಣೆಗಳಲ್ಲ... ಸಮಯ ಹಿಡಿದೇ ಹಿಡಿಯತ್ತೆ. ಆದ್ರೆ ಕೊನೇಲಿ ಖುಷಿಯಾಗೋದು ಖಂಡಿತಾ. 

1. ಬೆಳಗ್ಗೆ ಲೇಟಾಗಿ ಏಳೋ ಬದ್ಲು ಬೇಗ ಏಳೋ ಅಭ್ಯಾಸ ಮಾಡ್ಕೊಳಿ

ಹಲವಾರು ಸಂಶೋಧನೆ, ಅಧ್ಯಯನಗಳಿಂದ ಗೊತ್ತಾಗಿರೋದು ಏನಪ್ಪಾ ಅಂದ್ರೆ ಬೆಳಗ್ಗೆ ಬೇಗ ಎದ್ದವರು ಬೇರೆಯವರಿಗಿಂತ ಕೆಲಸ ತುಂಬಾ ಚೆನ್ನಾಗಿ ಮಾಡ್ತಾರೆ, ತುಂಬಾ ಖುಷಿಯಾಗೂ ಇರ್ತಾರೆ ಅಂತ. ದಿನದಲ್ಲಿ ಕೆಲವೇ ಗಂಟೆಗಳು ನಮಗೆ ಸಿಗೋದು, ಅದ್ರಲ್ಲಿ ನಿದ್ದೆಯಲ್ಲೇ ಹೆಚ್ಚು ಸಮಯ ಹಾಳಾದ್ರೆ ನಿಮಗೆ ಬೇರೆದಕ್ಕೆ ಇನ್ನೆಲ್ಲಿಂದ ಟೈಮ್ ಸಿಗುತ್ತೆ?

ಇನ್ನು ನಿಮ್ಮ ಆಫೀಸ್ 24 ಗಂಟೇನೂ ಕೆಲಸ ಮಾಡೊತರದ್ದಾದ್ರೆ, ಬೆಳಗ್ಗೆ ಬೇಗ ಹೋಗಿ, ಬೇಗ ವಾಪಸ್ ಬಂದ್ರೆ ನಿಮ್ಮ ಸ್ವಂತಕ್ಕೆ, ಮನೆಯವರ ಜೊತೆ ಕಳೆಯೋದಕ್ಕೆ... ಹೀಗೆ ಎಲ್ಲದಕ್ಕೂ ನಿಮಗೆ ಸಾಕಷ್ಟು ಟೈಮ್ ಸಿಗುತ್ತೆ.

ಮೂಲ

2. ಎಲ್ಲದಕ್ಕೂ ಸರಿ, ಆಯ್ತು, ಮಾಡ್ತೀನಿ ಅಂತ ಒಪ್ಕೊಳೋ ಬದ್ಲು ಆಗಾಗ ಇಲ್ಲ, ಮಾಡಕ್ಕಾಗಲ್ಲ ಅಂತ ಹೇಳೋ ಅಭ್ಯಾಸ ಬೆಳೆಸ್ಕೊಳಿ

ಎಲ್ಲ ಟೈಮಲ್ಲೂ ಸರಿ, ಆಯ್ತು , ಮಾಡ್ತೀನಿ ಅಂತ ಒಪ್ಕೋಳೋದು ಸರಿಯಲ್ಲ. ಹೀಗೆ ಒಪ್ಕೋಳೋದ್ರಿಂದ ನಿಮ್ಮ ಮಾಡ್ಬೇಕಾಗಿರೋ ಕೆಲಸದ ಪಟ್ಟಿಗೆ ಇನ್ನಷ್ಟು ಸೇರುತ್ತೆ, ಕೆಲಸದಲ್ಲಿ ಎಷ್ಟು ಮುಳುಗಿ ಹೋಗ್ತೀರಾ ಅಂದ್ರೆ ನಿಮಗೆ ಅಂತ ಸ್ವಲ್ಪ ಬಿಡುವು ಮಾಡ್ಕೊಳೋದು ತುಂಬಾ ಕಷ್ಟ ಆಗುತ್ತೆ.

ಆಗಾಗ ಸಮಯಕ್ಕೆ ತಕ್ಕಂತೆ ನೀವು ಇಲ್ಲ, ಆಗಲ್ಲ, ಅಂತ ಹೇಳೋ ರೂಢಿ ಮಾಡ್ಕೊಂಡ್ರೆ ಅನವಶ್ಯಕವಾಗಿ ನೀವು ಹೇಳಿದ್ದಕ್ಕೆಲ್ಲ ಒಪ್ಪಿಕೊಂಡು ಕೆಲಸ ಮಾಡ್ತೀರಾ ಅಂತ ಗೊತ್ತಿದ್ದೇ ನಿಮಗೆ ಕೆಲಸ ಹೇಳ್ತಾರಲ್ಲ... ಅದೆಲ್ಲಾ ನಿಲ್ಲುತ್ತೆ. ನಿಮ್ಮ ಕೆಲಸ, ಟೈಮ್ ಎಲ್ಲ ನಿಮ್ಮ ನಿಯಂತ್ರಣದಲ್ಲಿರುತ್ತೆ.

3. ಯಾವಾಗ್ಲೂ ಕೈಯ್ಯಲ್ಲಿ ಮೊಬೈಲ್ ಫೋನ್ ಹಿಡ್ಕೊಂಡು ಕೂರೋ ಬದ್ಲು ಹೊರಗೆ ಹೋಗಿ ಸುತ್ತಾಡ್ಕೊಂಡು ಬನ್ನಿ

ಈಗಿನ ಟೆಕ್ನಾಲಜಿಯಿಂದ ನಮಗೆ ತುಂಬಾನೇ ಉಪಯೋಗ ಆಗಿದೆ. ಆದ್ರೆ ಇತ್ತೀಚಿಗೆ ನಾವು ಅದ್ರಲ್ಲಿ ಎಷ್ಟು ಮುಳ್ಗಿರ್ತಿವಿ ಅಂದ್ರೆ ಅದು ಇಲ್ಲ ಅಂದ್ರೆ ನಮಗೆ ಕೈಕಾಲೇ ಓಡಲ್ಲ ಅನ್ನೋ ಹಾಗೆ ಆಡ್ತೀವಿ. ಅದ್ರಲ್ಲೂ ಈ ಸ್ಮಾರ್ಟ್ ಫೋನ್ ಬಂದ್ಮೇಲಂತೂ ನೆಟ್ವರ್ಕ್ ಸಿಕ್ಕಿಲ್ಲ, ಇಂಟರ್ನೆಟ್ ಕನೆಕ್ಟ್ ಆಗ್ತಿಲ್ಲ ಅಂದ್ರೆ ಏನೋ ಕಳ್ಕೊಂಡಿರೋವ್ರ ಹಾಗೆ ಪರದಾಡ್ತಿವಿ ( ನಮ್ಮ ಹತ್ತಿರದವರು ದೂರ ಆದಾಗ್ಲೂ ಹೀಗೆ ನಾವು ಆಡಿರಲ್ವೇನೋ). ಈ ಮೊಬೈಲ್ ಹತ್ತಿರ ಇದ್ದಷ್ಟೂ ನಾವು ಆಗಾಗ ಅದನ್ನ ನೋಡೋದು, ಅಲ್ಲೇನಾಗ್ತಿದೆ, ಇಲ್ಲೇನಾಗ್ತಿದೆ ಅಂತ ಹುಡುಕಾಡೊ ಪ್ರಯತ್ನ ಮಾಡ್ತಾ ಇರ್ತೀವಿ.

ಆಗಾಗ ಈ ಮೊಬೈಲ್ ಮನೇಲೆ ಬಿಟ್ಟು ಕನಿಷ್ಠ 10 -15 ನಿಮಿಷನಾದ್ರೂ ಪ್ರಶಾಂತವಾಗಿರೋ ಜಾಗಕ್ಕೆ ಹೋಗಿ ಸುತ್ತಾಡಿಕೊಂಡು ಬನ್ನಿ. ನೀವು ಇಲ್ಲಿವರ್ಗೂ ಯೋಚನೆ ಮಾಡಿರದ ವಿಚಾರಗಳು ನಿಮಗೆ ಹೊಳೆಯುತ್ತೆ. ಈ ವಿಷಯಗಳು ನಿಮ್ಮ ತಲೆಗೆ ಹೋದಾಗ ನೀವು ಯೋಚನೆ ಮಾಡೋ ರೀತೀನೂ ಬದ್ಲಾಗತ್ತೆ. ಇದು ನಿಮಗೆ ಒಂಥರಾ ಖುಷಿ, ಉತ್ಸಾಹ ತುಂಬುತ್ತೆ.

ಮೂಲ

4. ನಿಮ್ಮನ್ನ ನೀವು ತೆಗಳ್ಕೊಳೋ ಬದ್ಲು ಹೊಗಳ್ಕೊಳಿ

ಸ್ವಯಂ ಟೀಕೆ ಒಂದು ಒಳ್ಳೆ ಸ್ವಭಾವಾನೆ, ಯಾಕೆ ಅಂದ್ರೆ ನಿಮ್ಮನ್ನ ನೀವು ಟೀಕೆ ಮಾಡ್ಕೊಳ್ತಾ ಇದ್ರೆ ನಿಮಗೆ ಸಿಕ್ಕ ಸಣ್ಣ ಪುಟ್ಟ ಗೆಲುವಿಗೇ ಸುಮ್ಮನಿದ್ದು ವಿಶ್ರಾಂತಿ ತೊಗೊಳಕ್ಕೆ ಅದು ಬಿಡಲ್ಲ, ಯಾವಾಗ್ಲೂ ಇನ್ನೂ ಮುಂದೆ ಸಾಗೋ ಹಾಗೆ ಮಾಡತ್ತೆ.

ಆದ್ರೆ ಬರಿ ಟೀಕೆ ಮಾಡ್ತಿದ್ರೆ ಆಗಲ್ಲ, ನೀವು ನಿಮ್ಮ ಸಾಧನೆ, ಯಶಸ್ಸಿನ ಬಗ್ಗೆ ಹೆಮ್ಮೆ ಪಟ್ಕೊಳಕ್ಕೆ ಆಗಾಗ ಹೊಗಳಿಕೇನೂ ಬೇಕು. ಇಲ್ಲ ಅಂದ್ರೆ ನಿಮ್ಮ ಸಾಧನೆ ಬಗ್ಗೆ ನಿಮಗೆ ಮೆಚ್ಚುಗೆ, ಸಮಾಧಾನ ಏನೂ ಇರಲ್ಲ.

5. ರಜಾ ಅಂತ ಹೆಚ್ಚು ಮಲ್ಕೊಳೋ ಬದ್ಲು ಬೇಗ ಎದ್ದು ವ್ಯಾಯಾಮ ಮಾಡಿ

ಬಾಕಿದಿನ ಎಲ್ಲ ಬೇಗ ಎದ್ದು ಹೋಗ್ತೀವಿ, ಇವತ್ತಾದ್ರೂ ಜಾಸ್ತಿ ಮಲಗೋಣ ಅಂತ ಮಲಗೋದು ಬಿಡಿ. ಈ ರಜಾ ದಿನದ ಅದ್ರಲ್ಲೂ ವಾರಾಂತ್ಯದ 48 ಗಂಟೆ ತುಂಬಾನೇ ಮುಖ್ಯ. ಅದು ನಿಮಗೆ ಅಂತ ಇರೋ ಟೈಮ್. ಅದರ ಉಪಯೋಗ ಸರಿಯಾಗಿ ಮಾಡ್ಕೊಳಿ.

ಮಲಗಿ ಸಮಯ ಹಾಳುಮಾಡದೆ ಬೇರೆ ದಿನ ಮಾಡಕ್ಕೆ ಆಗದಿದ್ದ ವ್ಯಾಯಾಮ ಮಾಡಿ, ಬೇಗೆ ತಿಂಡಿ ಊಟ ಮುಗಿಸಿದ್ರೆ ಸಂಜೆ ಹೊತ್ತು ನಿಮ್ಮ ಮನೆಯವರ, ಸ್ನೇಹಿತರ ಜೊತೆ ಆರಾಮಾಗಿ ಇರೋದಕ್ಕೆ ಸಮಯ ಸಿಗುತ್ತೆ. ಲೇಟಾಗಿ ಇದ್ದಷ್ಟೂ ಸಮಯ ಕಮ್ಮಿ ಸಿಗುತ್ತೆ.

ಮೂಲ

6. ಕೂಲ್ ಡ್ರಿಂಕ್ಸ್ ಬದ್ಲು ನೀರು ಕುಡಿಯೋ ಅಭ್ಯಾಸ ಮಾಡ್ಕೊಳಿ

ಇತ್ತೀಚೆಗಂತೂ ಎಲ್ಲರೂ ಈ ಕೂಲ್ ಡ್ರಿಂಕ್ಸ್ ಕುಡಿಯೋದು ಹೆಚ್ಚು. ಇದ್ರಿಂದ ಸಕ್ಕರೆ ಕಾಯಿಲೆನೂ ಬರೋದು ಹೆಚ್ಚಾಗಿದೆ. ಅಷ್ಟೇ ಅಲ್ಲ ನಿಮ್ಮ ಹಲ್ಲು ಹಾಳು ಮಾಡೋದ್ರಲ್ಲೂ ಇದು ಎತ್ತಿದ ಕೈ. ಒಂದು ಅಧ್ಯಯನದ ಪ್ರಕಾರ, ಪ್ರತಿ 10 ಜನರಲ್ಲಿ ಒಬ್ರಿಗೆ  ಈ ಕೂಲ್ ಡ್ರಿಂಕ್ಸ್ ಕುಡಿಯೋದ್ರಿಂದ ಸಕ್ಕರೆ ಕಾಯಿಲೆ ಬಾರೋ ಸಾಧ್ಯತೆ ಹೆಚ್ಚಾಗ್ತಿದೆಯಂತೆ. ಅದನ್ನ ಬಿಟ್ಟು ನೀರು ಕುಡಿಯೋ ಅಭ್ಯಾಸ ಮಾಡ್ಕೊಳಿ.

ಇದ್ರಿಂದ ನಿಮ್ಮ ಹಲ್ಲು ಚೆನ್ನಾಗಿರೋದು ಮಾತ್ರ ಅಲ್ಲ, ಚರ್ಮದ ಆರೋಗ್ಯಕ್ಕೂ ಒಳ್ಳೇದು. ಈ ಕಾರಣಗಳು ನಿಮಗೆ ಕೂಲ್ ಡ್ರಿಂಕ್ಸ್ ಬಿಡೋದಕ್ಕೆ ಸರಿಯಾದದ್ದಲ್ಲ ಅನ್ನಿಸಿದ್ರೆ, ಒಂದು ಹಲ್ಲನ್ನ ಈ ಕೂಲ್ ಡ್ರಿಂಕ್ಸ್ ಒಳಗೆ ಹಾಕಿ ಒಂದು ರಾತ್ರಿ ಇಡೀ ಇಟ್ಟು ಮರುದಿನ ನೋಡಿ, ಅದರ ಗತಿ ಏನಾಗಿರುತ್ತೆ ಅಂತ ತಿಳ್ಕೊಂಡು ಆಮೇಲೆ ನೀವೇ ನಿರ್ಧಾರ ಮಾಡ್ಕೊಳಿ.

7. ಹಿಂದೆ ಆಗಿದ್ದನ್ನ ನೆನಸ್ಕೊಂಡು ಕೊರಗೋ ಬದ್ಲು ಮುಂದೆ ಏನ್ ಮಾಡ್ಬೋದು ಅಂತ ಪ್ಲಾನ್ ಮಾಡಿ

ಹಿಂದಿನ ನೆನಪುಗಳು ಎಷ್ಟೇ ನಮಗೆ ಖುಷಿ ಕೊಡುವಂತದ್ದಾಗಿದ್ರೂ ಅದ್ರಲ್ಲೇ ಮುಳಿಗಿರಬಾರ್ದು. ಅದು ಮುಗಿದು ಹೋಗಿರೋ ಕ್ಷಣ. ಇದು ಕೆಟ್ಟ ನೆನಪುಗಳಿಗೂ ಅನ್ವಯಿಸತ್ತೆ.

ನೀವು ನಿಮ್ಮ ಮುಂದಿನ ಗುರಿ ಏನು ಅಂತ ನಿರ್ಧಾರ ಮಾಡಿದ ಮೇಲೆ ನಿಮ್ಮ ಹಿಂದಿನ ನೆನಪುಗಳ ಬಗ್ಗೆ ಯೋಚ್ನೆ ಮಾಡೋದು ಕಮ್ಮಿ ಆಗುತ್ತೆ. ಎಲ್ಲಿ ವರೆಗೂ ನಾವು, ಹಿಂದೆ ಆಗಿದ್ರ ಬಗ್ಗೆ ತಲೆ ಕೆಡಿಸ್ಕೊತಿರ್ತೀವೋ , ಆಗ ನಮ್ಮ ಭವಿಷ್ಯ ಕಳೆದು ಹೋಗುತ್ತೆ. 

ಮೂಲ

8. ನನ್ನ್ ಕೈಯ್ಯಲ್ಲಿ ಏನೂ ಸಾಧಿಸಕ್ಕಾಗಲ್ಲ ಅಂತ ಕೈ ಚಲ್ಲೋ ಬದ್ಲು ಒಂದು ಕೊನೆ ಸರ್ತಿ ಪ್ರಯತ್ನ ಮಾಡಿ

ವಯಸ್ಸಾದಷ್ಟೂ ಕನಸುಗಳನ್ನ, ನಮ್ಮ ಗುರಿಗಳನ್ನ ಸಾಧಿಸಕ್ಕಾಗಲ್ಲ ಅಂತ ಕೈ ಬಿಡೋದೇ ಹೆಚ್ಚು. ಹೀಗೆ ನಮ್ಮ ಕನಸನ್ನ ಬಿಡೋ ಬದಲು ಯಾವುದಾದ್ರೂ ಸುಲಭವಾಗಿ ಸಾಧಿಸಬಹುದಾದ ಮೈಲಿಗಲ್ಲಿನ ಬಗ್ಗೆ ಯೋಚಿಸಿ. ಇಂತ ಕನಸಿನ, ಗುರಿ ಬಗ್ಗೆ ಯೋಚಿಸಿ, ಅದನ್ನ ಸಾಧಿಸಕ್ಕೆ ತುಂಬಾ ಹತ್ತಿರ ಹೋಗ್ತಿದ್ದೀವಿ ಅನ್ನಿಸದಾಗ ನಿಮಗೆ ತುಂಬಾನೇ ಖುಷಿ ಸಿಗುತ್ತೆ. ಮಕ್ಕಳು ಏನಾದ್ರು ಸಾಧನೆ ಮಾಡಿದಾಗ ಖುಷಿ ಪಡ್ತಾರಲ್ಲ ಆ ರೀತಿಯ ಖುಷಿ, ಸಮಾಧಾನ ಸಿಗುತ್ತೆ.

9. ಯಾವಾಗ್ಲೂ ಡಯೆಟ್ಟು ಅಂತ ತಲೆ ಕೆಡಿಸ್ಕೊಳೋ ಬದ್ಲು ಒಂದೊಂದ್ಸರ್ತಿ ರುಚಿಯಾಗಿರೋ ಊಟ ತಿಂಡಿ ತಿನ್ನಿ

ಪ್ರತಿಯೊಬ್ಬರ ಜೀವನದಲ್ಲೂ ಊಟ ತಿಂಡಿಗೆ ತಮ್ಮದೇ ಆದ ಪದ್ಧತಿ ಇರುತ್ತೆ. ಅದ್ರಲ್ಲೂ ನಮ್ಮ ದೇಹಕ್ಕೆ, ಆರೋಗ್ಯಕ್ಕೆ ಸರಿ ಹೊಂದೋ ಡಯಟ್ ಊಟ ತಿಂಡೀನ ಇಷ್ಟ ಇಲ್ಲ ಅಂದ್ರೂ ಬಲವಂತವಾಗಿ ತಿನ್ತಿರ್ತೀವಿ.

ಇದೆಲ್ಲ ಇದ್ದಿದ್ದೇ, ಆಗಾಗ ನಿಮಗಿಷ್ಟ ಆಗೋ ಸ್ವೀಟ್, ಐಸ್ ಕ್ರೀಮ್, ಪಿಜ್ಜಾ, ಬರ್ಗರ್ ಎಲ್ಲಾನೂ ತಿನ್ನಿ, ಆದ್ರೆ ಆಮೇಲೆ ಸರಿಯಾಗಿ ವ್ಯಾಯಾಮ ಮಾಡೋದನ್ನ ಮರೀಬೇಡಿ.

ಮೂಲ

10. ಯಾವಾಗ್ಲೂ ಕುಂಟ ನೆಪ ಕೊಡೋ ಬದ್ಲು ತಪ್ಪಾಗಿದ್ರೆ ಪ್ರಾಮಾಣಿಕವಾಗಿ ಒಪ್ಕೊಳಿ

ಪ್ರಾಮಾಣಿಕತೆ ಒಳ್ಳೇದು ಅಲ್ವ? ಕೆಲವೊಂದು ಸಲ ಅದು ನಿಮಗೆ ನೋವನ್ನೂ ಕೊಡಬಹುದು, ಆದ್ರೆ ನಿಮ್ಮಲ್ಲಿ ಬದಲಾವಣೆ ಬರ್ಬೇಕು, ನೀವು ಸುಧಾರಿಸ ಬೇಕು ಅಂದ್ರೆ ನೀವು ಪ್ರಾಮಾಣಿಕವಾಗಿರ್ಬೇಕು. ನೀವು ಪ್ರಾಮಾಣಿಕವಾಗಿರಕ್ಕೆ ಶುರು ಮಾಡಿದ್ರೆ, ನಿಮ್ಮ ಸಾಮರ್ಥ್ಯನೂ ಹೆಚ್ಚಾಗುತ್ತೆ. ಇದನ್ನ ತಿಳ್ಕೊಳೋ ಒಳ್ಳೆ ಸುಲಭ ವಿಧಾನ ಅಂದ್ರೆ ನೀವು ಪ್ರತಿಯೊಂದು ಕೆಲಸ ಮುಗಿಸಿದಾಗಲೂ ನೀವು ಮಾಡಿರೋ ಪ್ರಯತ್ನದ ಬಗ್ಗೆ ಪ್ರಶ್ನೆ ಮಾಡ್ಕೊಳಿ. ನೀವು ಯಾವುದಾದ್ರೂ ಪ್ರಾಜೆಕ್ಟ್ ಗೆ ಕೆಲಸ ಮಾಡ್ತಾ ಇದ್ರೆ, ನಿಮ್ಮ ಜೊತೇಲಿರೋ ಕೆಲಸಗಾರರಿಂದ ನಿಮ್ಮ ಸುಧಾರಣೆ ಬಗ್ಗೆ ತಿಳ್ಕೊಳಿ.

ಈ ಸಣ್ಣಪುಟ್ಟ ಬದಲಾವಣೆಗಳನ್ನ ಮಾಡ್ಕೊಂಡ್ರೆ ನಮ್ಮ ಜೀವನ ಬದಲಾಗೋದ್ರಲ್ಲಿ ಯಾವುದೇ ಅನುಮಾನ ಇಲ್ಲ!

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ: