ಮದುವೆಗೆ ಹೆಣ್ಣು ಅಥವಾ ಗಂಡು ಹುಡುಕ್ಕೊಳ್ವಾಗ ಈ 9 ತಪ್ಪು ಆಗಬಾರದು ನೋಡಿ

ಯಾಕಂದ್ರೆ ಇದು ಜೀವನದಲ್ಲಿ ಬಹಳ ಮುಖ್ಯವಾದ ತಿರುವು

ಆ ಮೀಟಿಂಗ್ ನಡೀವಾಗ ಹುಡುಗ-ಹುಡುಗಿ ತಲೇಲಿ ಏನೇನೋ ಆಸೆಗಳು ತುಂಬಿರುತ್ತವೆ. ಅದೆಲ್ಲದರ ಮಧ್ಯದಲ್ಲಿ ಮಿದುಳು ಸ್ವಲ್ಪ ಜಾಸ್ತಿ ಕೆಲಸ ಮಾಡಬೇಕು. ಇಲ್ಲಾಂದ್ರೆ ಎಡವಟ್ಟಾಗೋ ಸಾಧ್ಯತೆ ಇದೆ. ಇಲ್ಲಿ ನೋಡಿ, ಮದುವೆಗೆ ಹೆಣ್ಣು ಅಥವಾ ಗಂಡು ನೋಡುವಾಗ ಸಾಮಾನ್ಯವಾಗಿ ಜನ ಮಾಡೋ 9 ತಪ್ಪುಗಳು ಇಲ್ಲಿವೆ. ಇವುಗಳು ಆಗದೆ ಇರೋಹಂಗೆ ನೋಡ್ಕೊಂಡ್ರೆ ನಿಮ್ಮ ದಾಂಪತ್ಯ ಜೀವನ ಚೆನ್ನಾಗಿರುತ್ತೆ…

1) ಪ್ರೀತಿ-ಪ್ರೇಮದ ಗುಂಗಲ್ಲಿ ಬೇರೆ ಎಲ್ಲ ಮರೆತು ಮದುವೆ ಆಗೋದು

ನಿಜಕ್ಕೂ ಇನ್ನೊಬ್ಬರನ್ನ ಪ್ರೀತಿಸೋದು ಅನ್ನೋದು ಒಂಥರಾ ವಿಸ್ಮಯಾನೇ. ಆದರೆ ಮದುವೆಗೆ ಅದೊಂದೇ ಸಾಕಾಗಲ್ಲ. ಎಷ್ಟೋ ಸರ ಗಂಡು-ಹೆಣ್ಣು ತುಂಬಾ ಪ್ರೀತಿಸ್ತಾ ಇರ್ತಾರೆ, ಆದರೆ ಅದು ಇದು ಜಗಳ ಆಗಿ ಬೇರೆ ಆಗೋಗ್ತಾರೆ. ಆಗ ಗೊತ್ತಾಗುತ್ತೆ, ಈ‌ ಪ್ರೀತಿ-ಪ್ರೇಮ ಅನ್ನೋದೇನು ತಂದೆತಾಯಿಗೂ ಮಕ್ಕಳಿಗೂ ಇರೋ ಸಂಬಂಧದ ತರಹ ಅಲ್ಲ ಅಂತ. ಅದೆನೇ ಇರಲಿ, ಮಕ್ಕಳು, ಧರ್ಮ, ಕೆಲಸ ಗಿಲಸ ಅಂತ ನಿಜವಾದ ಜೀವನ ಮಾಡಬೇಕದಾಗ ಬರೀ ಈ ಪ್ರೀತಿ ಸಾಕಾಗಲ್ಲ. ಆದ್ದರಿಂದ ಬರೀ ಪ್ರೀತಿ ಪ್ರೀತಿ ಅನ್ಕೊಂಡು ಮದುವೆ ಮಾಡ್ಕೊಳೋದು ಪೆದ್ದತನಾನೇ ಆಗುತ್ತೆ. ಅದೂ ಇರಬೇಕು, ಆದರೆ ಅದೊಂದೇ ಸಾಲದು.

ಮೂಲ

2) ಸಂಪಾದನೆ ನೋಡದೆ ಮದುವೆ ಆಗೋದು

ದುಡ್ಡಿಗೋಸ್ಕರ ಮದುವೆ ಆಗಬೇಕಾಗಿಲ್ಲ, ಆದರೆ ಮದುವೆ ಅಂದಮೇಲೆ ದುಡ್ಡು ಬೇಕೇ ಬೇಕು. ಗಂಡು ಅಥವಾ ಹೆಣ್ಣಿನ ಸಂಪಾದನೆ ಎಷ್ಟು ಅನ್ನೋದು ಮುಖ್ಯವಾದ ಪ್ರಶ್ನೇನೇ. ನಿಮಗೆ ಒಳ್ಳೇ ಸಂಬಳ ಇದ್ದರೂ ಕೇಳಿಕೊಳ್ಳೋದ್ರಲ್ಲಿ ತಪ್ಪಿಲ್ಲ. ಆಮೇಲೆ ದುಡ್ಡಿನ ವಿಷಯಕ್ಕೆ ಜಗಳ ಆಗೋದು ತಪ್ಪಿಸಬಹುದು. ಹಾಗೆ ಎಷ್ಟೋ ಮದುವೆಗಳು ಮುರಿದು ಹೋಗಿವೆ. ಹೆಂಡತಿಗೆ ಗಂಡನಿಗಿಂತ ಜಾಸ್ತಿ ಸಂಬಳ ಇದೆ ಅಂದಾಗ, ಅಥವಾ ಗಂಡನಿಗೆ ಸಾಕಷ್ಟು ಸಂಬಳ ಬರ್ತಿಲ್ಲ ಅಂತ ಹೆಂಡತಿಗೆ ಅನ್ನಿಸಿದಾಗ ಇಂಥ ತೊಂದರೆಗಳು ಆಗಿರೋದನ್ನ ನೀವು ಕೇಳೇ ಇರ್ತೀರಿ. ಇವೆಲ್ಲ ಯಾಕೆ?

ಮೂಲ

3) ವ್ಯಕ್ತಿ ಬದಲು ಅವಳ/ನ ಡಿಗ್ರಿ, ಕೆಲಸ ಅಥವಾ ವಾಸವಾಗಿರೋ ದೇಶವನ್ನ ಮದುವೆ ಆಗೋದು

ಉದಾಹರಣೆಗೆ ನಮ್ಮಲ್ಲಿ ಇಂಜಿನಿಯರ್ನ ಅಥವಾ ಡಾಕ್ಟರ್ನ ಮದುವೆ ಆಗಬೇಕು ಅನ್ನೋದಿದೆ. ಹಾಗೇ ಸರ್ಕಾರಿ ಕೆಲಸದಲ್ಲಿ ಇರೋರ್ನ ಮದುವೆ ಆದರೆ ಒಳ್ಳೇದು ಅಂತಾನೂ ಇದೆ. ಇನ್ನು ಫಾರಿನ್ ಹುಡುಗ/ಹುಡುಗಿ ಸಿಕ್ಕರೆ ಸಾಕು ಅನ್ನೋರು ತುಂಬ ಜನ ಇದಾರೆ. ಈ ತರಹ ಮದುವೆ ಮಾಡ್ಕೊಳೋದು ಒಳ್ಳೇದಲ್ಲ. ನಿಜಕ್ಕೂ ಈ‌ ಡಿಗ್ರಿ ಅಥವಾ ಕೆಲಸದಿಂದ ದುಡ್ಡೊಂದು ಸಿಗಬಹುದೇ ಹೊರತು ಒಳ್ಳೇ ಹೆಂಡತಿ/ಗಂಡ ಸಿಗೋದು ಗ್ಯಾರಂಟಿ ಏನಲ್ಲ. ಡಿಗ್ರಿ ಅಥವಾ ಕೆಲಸದ ಬಗ್ಗೆ ತುಂಬ ಗಮನ ಕೊಡೋರ್ನ ಮದುವೆ ಆಗಕ್ಕೂ ಹೋಗಬೇಡಿ. ಅವರಿಗೆ ನೀವು ಬೇಕಾಗಿಲ್ಲ.

ಮೂಲ

4) ನನಗೆ ಹೊಂದ್ತಾಳಾ/ನಾ ಅನ್ನೋದಕ್ಕಿಂತ ಅವಳ/ನ ಸಾಧನೆಗಳ ಕಡೆ ಜಾಸ್ತಿ ಗಮನ ಕೊಡೋದು

ಜೀವನದಲ್ಲಿ ಎತ್ತರಕ್ಕೆ ಏರಿರೋರೆಲ್ಲ ನಿಮಗೆ ಹೊಂದ್ತಾರೆ ಅಂತಿಲ್ಲ. ನಿಮಗೂ ಅವರಿಗೂ ಒಳ್ಳೇ ಸಂಬಂಧ ಬೆಳೆಯುತ್ತೆ ಅಂತೇನಿಲ್ಲ. ಯಾರಿಗಾದರೂ ಪ್ರತಿ ವರ್ಷ ಪ್ರಮೋಶನ್ ಸಿಗ್ತಿದೆ ಅನ್ಕೊಳಿ. ಅದು ಕೇಳಕ್ಕೆ ಚೆನ್ನಾಗಿದೆ ನಿಜ, ಆದರೆ ಆ ಪಾಲ್ಟಿ ರಾತ್ರಿ ಮನೇಗೇ ಬರದೆ ಇರಬಹುದು - ಕೆಲಸ ಕೆಲಸ ಅಂತ! ತುಂಬ ಫಾರಿನ್ ಟ್ರಿಪ್ ಹೊಡೀತಿದ್ರೂ ಅಷ್ಟೇನೇ - ಮನೆಯಲ್ಲೇ ಇಲ್ಲದಿರೋ ಹೆಂಡತಿ ಅಥವಾ ಗಂಡನ್ನ ಕಟ್ಕೊಂಡ್ ಏನ್ ಪ್ರಯೋಜನ?

ಮೂಲ

5) ನಿಮ್ ತರಹದೋರ್ನೇ ಹುಡುಕೋದು

ಒಂದೊಂದ್ಸಲ ಇದು ಎಲ್ಲರಿಗೂ ಅನ್ನಿಸುತ್ತೆ.… ನಂಗೆ ನನ್ ತರಹದೋಳೇ/ನೇ ಬೇಕು ಅಂತ. ಆದರೆ ಇದೂ ಸರಿಯಾದ ಚಿಂತನೆ ಅಲ್ಲ. ಗಂಡ ಹೆಂಡ್ತಿ ಇಬ್ಬರೂ ಎಲ್ಲಾದರಲ್ಲೂ ಒಂದೇ ತರಹ ಯೋಚನೆ ಮಾಡ್ತಿದ್ರೆ ಜೀವನ ಬೇಜಾರಾಗೋಗುತ್ತೆ. ಅದರ ಬದಲಾಗಿ ಒಬ್ಬರ ಕೊರತೆಗಳ್ನ ಇನ್ನೊಬ್ಬರು ಪೂರೈಸೋಹಂಗಿದ್ದರೆ ಒಳ್ಳೇದು. ಅಲ್ವಾ?

ಮೂಲ

6) ವ್ಯತ್ಯಾಸಗಳ ಕಡೆ ಗಮನ ಕೊಡದೆ ಇರೋದು

ನಿಮ್ ತರಹದೋರ್ನೇ ಹುಡುಕೋದು ಎಷ್ಟು ತಪ್ಪೋ ಇದೂ ಅಷ್ಟೇ‌ ತಪ್ಪು. ವ್ಯತ್ಯಾಸಗಳೂ ತೀರಾ ಜಾಸ್ತಿ ಇರಬಾರದು. ಎತ್ತು ಏರಿಗೆ ಎಳೆದರೆ ಕೋಣ ನೀರಿಗೆ ಎಳೆದಂಗೆ ಪ್ರತಿ ದಿನದ ಜೀವನ ಆಗೋದ್ರೆ ಹೆಂಗೆ? ಯೋಚನೆ ಮಾಡಿ.

ಮೂಲ

7) ಎದ್ದು ಕಾಣ್ತಿರೋ ತೊಂದರೆಗಳ್ನ ನೋಡದಂಗೆ ಇದ್ದುಬಿಡೋದು

ಕೆಲವೊಮ್ಮೆ ಆ ವ್ಯಕ್ತಿಯ ಆರೋಗ್ಯ ಚೆನ್ನಾಗಿಲ್ಲದೆ ಇರಬಹುದು. ಈಗಲಂತೂ ಲೈಂಗಿಕ ಆರೋಗ್ಯದ ವಿಷಯದಲ್ಲಿ ಇಂಥ ಸಾಕಷ್ಟು ಕೇಸುಗಳು ಆಗೋಗಿವೆ. ಅಥವಾ ಏನಾದರೂ ಮಾನಸಿಕ ಆರೋಗ್ಯದ ತೊಂದರೆ ಇರಬಹುದು. ಅಥವಾ ಅವಳ/ನ ಲವರ್ ಯಾರಾದರೂ‌ ಇರಬಹುದು, ಅಥವಾ ಬಲವಂತದಿಂದ ಮದುವೆ ಆಗ್ತಿರಬಹುದು…. ಇಂಥ ತೊಂದರೆಗಳು ಎದ್ದು ಕಾಣ್ತಿದ್ದಾಗಲೂ ಕೆಲವರು ಕಾಣ್ತಾನೇ ಇಲ್ಲ ಅನ್ನೋಹಂಗೆ ಇದ್ದುಬಿಡ್ತಾರೆ. ನೋಡಕ್ಕೆ ಚೆನ್ನಾಗಿದಾಳೆ/ನೆ ಅಂತಾನೋ ಅಥವಾ ಮತ್ತೊಂದು ಕಾರಣದಿಂದಾನೋ ಹೋಗಿ ಮದುವೆ ಆಗಿಬಿಡ್ತಾರೆ. ಆಮೇಲೆ ಒಂದೊಂದಾಗಿ ತೊಂದರೆ ಶುರು. ಯಾಕಪ್ಪ ಬೇಕು?

ಮೂಲ

8) ನೋಡಕ್ಕೆ ಚೆನ್ನಾಗಿರೋದನ್ನೇ ತೀರಾ ದೊಡ್ಡದು ಮಾಡ್ಕೊಳೋದು

ಇದರ ಬಗ್ಗೆ ಅಂತೂ ಹೆಚ್ಚು ಹೇಳಲೇ ಬೇಕಾಗಿಲ್ಲ. ಜನ ಮೊದ್ಲು ಎಡವಿ ಬೀಳೋದು ಇದರಲ್ಲೇ. ನಿಜಕ್ಕೂ ನೋಡಿದರೆ ನೋಡಕ್ಕೆ ಚೆನ್ನಾಗಿದ್ದ ಮಾತ್ರಕ್ಕ ವೈವಾಹಿಕ ಜೀವನ ಚೆನ್ನಾಗಿರುತ್ತೆ ಅನ್ನಕ್ಕಾಗಲ್ಲ. ಹೆಂಡ್ತಿ/ಗಂಡ ಹಿಂಗಿರಬೇಕು ಅಂತ ನಿಮ್ಮ ಅನಿಸಿಕೆ ಏನೇ ಇರಲಿ, ನಿಮಗೆ ಕೆಲಸ ಹೋದಾಗಲೋ ಅಥವಾ ಮನೇಲಿ ಏನಾದರೂ ಅನಾಹುತ ಆದಾಗಲೋ ಆ ಮುದ್ದಾದ ಮುಖದಿಂದ ಉಪಯೋಗ ಎಷ್ಟಿದೆ? ಯೋಚನೆ ಮಾಡಿ. ನೋಡಕ್ಕೆ ಚೆನ್ನಾಗಿದ್ದು ಒಳಗೇನೇ ಏನಾದರೂ ಆರೋಗ್ಯದ ತೊಂದರೆ ಇದ್ದರೆ? ಅಥವಾ ಬಹಳ ಜಗಳದ ಸ್ವಭಾವ ಇದ್ದರೆ? ಯೋಚನೆ ಮಾಡಿ.

ಮೂಲ

9) ಮೇಲ್ಮೇಲಿನ ನಡವಳಿಕೆ ನೋಡಿ ಮದುವೆ ಆಗೋದು

ಕೆಲವರು ಮೇಲೆ ಕಾಣೋಹಂಗೆ ಎಲ್ಲಾ ತುಂಬ ಅಚ್ಚುಕಟ್ಟಾಗಿ ಮಾಡ್ತಾರೆ. ತುಂಬಾ ನಯವಾಗಿ ಮಾತಾಡೋದು, ಹಂಚಿಕೊಂಡು ತಿನ್ನೋದು, ಬೈ-ಗೀದೇ ಇರೋದು, ಹೀಗೆ. ಆದರೆ ಮೇಲೆ ಮಾಡಿದ್ದನ್ನೇ‌ ಒಳಗೂ ಮಾಡ್ತಾರೆ ಅನ್ನೋ ಗ್ಯಾರಂಟಿ ಯಾರು ಕೊಡೋರು? ಎಷ್ಟೋ ಮಂದಿ ಇದರಲ್ಲಿ ಎಡವಿದಾರೆ. ಅಷ್ಟೇ ಅಲ್ಲ, ಸಮಯ ಅಂದಾಗ ಈ ಒಳ್ಳೇ ನಡವಳಿಕೆ ಒಂದರಿಂದಾನೇ ಏನೂ ಆಗೋಗಲ್ಲ. ಆದ್ದರಿಂದ ಯೋಚನೆ ಮಾಡಿ.

ಮೂಲ

ಆಯ್ಕೆ ಮಾಡ್ಕೊಳ್ವಾಗ ಹುಷಾರಾಗಿರ್ರಪ್ಪಾ. ಇದು ದೊಡ್ಡ ತೀರ್ಮಾನ.

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ:

ನಿಮ್ಮ ಮೆಚ್ಚಿನ ಅಂತೆಕಂತೆ ಈಗ YouTube ನಲ್ಲಿ

ಈ ಬಟನ್ ಒತ್ತಿ subscribe ಮಾಡಿಕೊಳ್ಳಿ:
 

ದೇವರು ನನಗ್ಯಾಕೆ ಇಷ್ಟು ಕಷ್ಟ ಕೊಟ್ಟಿದಾನೆ ಅನ್ನಿಸಿದಾಗ ಈ 22 ಸತ್ಯಗಳ್ನ ನೆನಪು ಮಾಡ್ಕೊಳಿ

ಕಷ್ಟ ಯಾವತ್ತೂ ಕ್ಷಣಿಕ ಕಣ್ರೀ

ಕಷ್ಟ ಬಂದಾಗ ವೆಂಕಟರಮಣನ ಹತ್ತಿರ ಹೋಗೋದು ಇದ್ದೇ ಇದೆ. ಅದರ ಜೊತೆಗೆ ನೀವು ಯೋಚನೆ ಮಾಡೋ ದಿಕ್ಕು ಕೂಡ ಬದಲಾಗಬೇಕಿದೆ. ಕೆಳಗೆ ಕೊಟ್ಟಿರೋ 21 ಪಾಯಿಂಟ್ಗಳ್ನ ನೆನಪಿಡಿ, ಆಗ ನಿಮ್ಮ ಕಷ್ಟ ಕಡಿಮೆ ಆಗೋದ್ರಲ್ಲಿ ಸಂದೇಹ ಇಲ್ಲ:

1. ನಿಮ್ಮನ್ನ ನೀವು ಬದಲಾಯಿಸಿಕೋಬೋದು. ನಿಮ್ಮ ಜೀವನದಲ್ಲಿ... ನಿಮ್ಮ ವ್ಯಕ್ತಿತ್ವದಲ್ಲಿ... ನಿಮಗೆ ಇಷ್ಟವಿಲ್ಲದಿರೋದು ಏನೇನಿದೆಯೋ ಅದರಲ್ಲಿ ಪ್ರತಿಯೊಂದನ್ನೂ ಬದಲಾಯಿಸ್ಕೋಬೋದು.

ಎಷ್ಟೋ ಸಲ ಪ್ರಪಂಚ ನಮಗೆ ಕೊಡೋ ಸಂದೇಶಾನೇ ಬೇರೆ. ನೀನು ಇರೋದೇ ಹೀಗೆ, ನೀನು ಉದ್ಧಾರ ಆಗಲ್ಲ ಅಂತೆಲ್ಲ ಹೇಳ್ತಾ ಇರುತ್ತೆ. ಆದರೆ ಅದೆಲ್ಲ ಸುಳ್ಳು. ನೀವು ಮನಸ್ಸು ಮಾಡಿದರೆ ನಿಮ್ಮನ್ನ ನೀವು ಬದಲಾಯಿಸಿಕೋಬೋದು. ಆದರೆ ಅದಕ್ಕೆ ಮೊದಲಾಗಿ ನಿಮಗೆ ಏನ್ ಬದಲಾಗಬೇಕು ಅನ್ನೋದು ಗೊತ್ತಿರಬೇಕು. ಅದರ ಬಗ್ಗೆ ಸರಿಯಾಗಿ ಯೋಚನೆ ಮಾಡುದ್ರೆ ಹೇಗೆ ಬದಲಾಯಿಸಿಕೋಬೇಕು ಅನ್ನೋದೂ ಸುಲಭವಾಗಿ ನಿಮಗೇ ಅರ್ಥ ಆಗುತ್ತೆ.

2. ನೀವು ಸಂತೋಷವನ್ನ ನಿಮ್ಮ ನೆನ್ನೆಗಳಲ್ಲಿ ಅಥವಾ ನಾಳೆಗಳಲ್ಲಿ ಹುಡುಕಬೇಕಾಗಿಲ್ಲ. ಅದು ಈ ಕ್ಷಣದಲ್ಲೇ ಇದೆ.

ಇದನ್ನಂತೂ ಬಹಳ ಕೇಳಿರ್ತೀರಿ. ಅದರೆ ಇದು ನೂರಕ್ಕೆ ನೂರು ನಿಜ. ಸಂತೋಷ ಅನ್ನೋದು ಒಂದು ಮನಃಸ್ಥಿತಿ ಅಷ್ಟೇ. ಸಂತೋಷವಾಗಿದೀನಿ ಅನ್ಕೊಂಡ್ರೆ ಇದೀರಿ, ಇಲ್ಲ ಅನ್ಕೊಂಡ್ರೆ ಇಲ್ಲ. ನಿಮ್ಮ ಸುತ್ತ ಮುತ್ತ ತಿರುಗಿ ನೋಡಿ, ಅದರಲ್ಲೆಲ್ಲ ಸಂತೋಷ ಅಡಗಿದೆ. ನಿಮ್ಮೊಳಗೆ ನೀವೇ ಇಣುಕಿ ನೋಡಿ, ಅಲ್ಲೂ ಅಡಗಿದೆ.

3. ನಿಮಗೆ ಗೊತ್ತಿಲ್ಲದೆ ನಿಮ್ಮಿಂದ ಸ್ಫೂರ್ತಿ ಪಡ್ಕೊಂಡೋರು ಕೂಡ ಇರ್ತಾರೆ.

ನೀವು ಅನ್ಕೊಂಡಿರಬಹುದು, ನೀವು ಪೂರ್ತಿ ವೇಸ್ಟು ಅಂತ. ಆದರೆ ಹಾಗೇನಿಲ್ಲ. ನಿಮ್ಮ ಈ ಉಪಯೋಗವಿಲ್ಲದ ಚಿಂತನೆಯ ಸುಳಿಯಲ್ಲಿ ಸಿಕ್ಕಿಕೊಂಡು ನಿಮಗೇನೇ ನಿಮ್ಮಲ್ಲಿರೋ ಒಳ್ಳೆ ಗುಣಗಳು ಕಾಣಿಸ್ತಾ ಇರಲ್ಲ, ಅಷ್ಟೇ. ಅದು ಬೇರೆಯವರಿಗೆ ಕಾಣಿಸ್ತಾ ಇರುತ್ತೆ. ಉದಾಹರಣೆಗೆ ನೀವು ಬಹಳ ವಿನಯದಿಂದ ನಡ್ಕೋತಾ ಇರಬಹುದು. ಆ ವಿನಯವನ್ನ ಜನ ಗಮನಿಸದೆ ಇರೋದಿಲ್ಲ. ಅದು ನನಗೂ ಇದ್ದರೆ ಒಳ್ಳೇದು ಅಂತ ಅನ್ಕೊಳೋರೂ ಇರ್ತಾರೆ.

4. ಕಷ್ಟ ಪಡೋದ್ರಿಂದ ನೀವು ಇನ್ನಷ್ಟು ಗಟ್ಟಿ ಆಗ್ತೀರಿ.

ಬೆಟ್ಟ ಹತ್ತೋದ್ರಿಂದ ಕೈಕಾಲು ಗಟ್ಟಿ ಆಗುತ್ತೆ. ಕಷ್ಟ ಅಂತ ಸುಮ್ನೆ ಕೂತಿದ್ದರೆ ಆಗುತ್ತಾ? ಆದ್ದರಿಂದ ಪಡಬೇಕು ಕಣ್ರೀ, ಕಷ್ಟ ಪಡಬೇಕು. ಪೂರ್ತಿ ಸುಖದಲ್ಲೆ‌ ಬೆಳೆದೋರು ಕಷ್ಟದಲ್ಲಿ ಬೆಳದೋರಷ್ಟು ಗಟ್ಟಿ ಅಲ್ಲ.

5. ನೀವು ಮಾಡಿರೋ ತಪ್ಪುಗಳಿಗೆ ಇನ್ನೊಂದು ಹೆಸರಿದೆ: "ಅನುಭವ". ತಪ್ಪುಗಳು 'ಏನ್ ಮಾಡಬಾರದು' ಅಂತ ಹೇಳಿ ಕೊಡುತ್ತವೆ ತಾನೆ? ಆದ್ದರಿಂದ ತಪ್ಪು ಒಂಥರಾ ಗುರು ಇದ್ದಂಗೆ!

ಅಯ್ಯೋ... ಜೀವನದಲ್ಲಿ ತಪ್ಪಾಗಿ ಹೋಗಿದೆ ಅಂತ ತಲೆ ಮೇಲೆ ಕೈ ಕಟ್ಟಿ  ಕೂತ್ಕೊಂಡ್ರೆ ಏನ್ ಉಪಯೋಗ? ಅದರಿಂದ ಕಲಿಯೋದು ಕಲೀರಿ, ಆ ತಪ್ಪಿಗೆ "ನಮಸ್ಕಾರ ಗುರುವೇ" ಅಂತ ಹೇಳಿ ಮುಂದಿನ ದಾರಿ ನೋಡಿ.

6. ನಿಮ್ಮ ಜೀವನದ ದಿಕ್ಕನ್ನೇ ಬದಲಾಯಿಸಿಬಿಡುವಂಥ ವ್ಯಕ್ತಿಯೊಬ್ಬ ನಿಮಗೆ ಯಾವಾಗ ಬೇಕಾದರೂ ಸಿಗಬಹುದು

ಆ ವ್ಯಕ್ತೀನ ನೀವು ಇಲ್ಲೀವರೆಗೆ ಭೇಟಿ ಮಾಡಿಲ್ಲ, ಅಷ್ಟೇ. ಅಥವಾ ಭೇಟಿ ಮಾಡಿದ್ದರೂ ಫಿಲಮ್ಮಲ್ಲಿ ತೋರಿಸೋ ಹಾಗೆ ನಿಮಗೆ ಗೊತ್ತಾಗಿಲ್ಲ, ಅಷ್ಟೇ. ನಿಮ್ಮ ಕಣ್ಣು ಬಿಟ್ಟಿದ್ದರೆ ಇವತ್ತಲ್ಲ ನಾಳೆ ಆ ವ್ಯಕ್ತಿ ಸಿಕ್ಕೇ ಸಿಗ್ತಾನೆ/ಳೆ.

7. ಈಗ ನೀವು ಎಷ್ಟೇ ಕಷ್ಟದಲ್ಲಿದ್ದರೂ... ಎಷ್ಟೇ‌ ನೋವು ಅನುಭವಿಸ್ತಾ ಇದ್ದರೂ... ಇಷ್ಟು ಮಾತ್ರ ನೆನಪಿಡಿ: ಪರಿಸ್ಥಿತಿ ಇನ್ನೂ ಕೆಟ್ಟದಾಗಿರಬಹುದಿತ್ತು! ಅಷ್ಟೇ ಅಲ್ಲ, ನೀವು ಪಡ್ತಿರೋ ಕಷ್ಟ ಶಾಶ್ವತವೇನಲ್ಲ.

ಸುಖ, ದುಃಖ ಎರಡೂ ಇದ್ದು ಹೋಗುವಂಥದ್ದು. ಆದ್ದರಿಂದ ಕಷ್ಟದಲ್ಲಿದೀನಿ, ನೋವು ಅನುಭವಿಸ್ತಾ ಇದೀನಿ ಅಂತ ತುಂಬಾ ನೊಂದುಕೊಬೇಡಿ. ಉದಾಹರಣೆಗೆ... ಆಕ್ಸಿಡೆಂಟ್ ಆಗಿ ಕಾಲು ಮುರಿದಿದ್ದರೆ ಇನ್ನೂ ದೊಡ್ಡ ಅನಾಹುತ ತಪ್ಪಿದೆ ಅಂತ ಸಂತೋಷವಾಗಿರಿ. 2 ತಿಂಗಳಲ್ಲಿ ನಡೆಯೋ ಹಾಗೆ ಆಗುತ್ತೆ ಅಂತ ಡಾಕ್ಟರ್ ಹೇಳಿದರೆ ಸಂತೋಷ ಪಡಿ.

8. ವಯಸ್ಸು, ಜಾತಿ, ಧರ್ಮ, ಲಿಂಗ, ನೋಟ, ದುಡ್ಡು, ನಿಮ್ಮ ಡಿಗ್ರೀ... ಇದ್ಯಾವುದೂ ಮುಖ್ಯವಲ್ಲ. ನೀವು ಮಾಡೋ ಕೆಲಸ, ನಿಮ್ಮ ಮೇಲೆ ನಿಮಗಿರೋ ನಂಬಿಕೆ - ಇವೆರಡೇ ಮುಖ್ಯ.

ನಿಮ್ಮ ಕೆಲಸಾನೇ ಮುಖ್ಯ ಕಣ್ರೀ. ಇವತ್ತಿಂದ ಸರಿಯಾಗಿ ದುಡಿಯೋ ಛಲ ನಿಮಗಿದ್ದರೆ, ನಿಮ್ಮ ಮೇಲೆ ನಿಮಗೆ ನಂಬಿಕೆ ಇದ್ದರೆ ನಿಮ್ಮ ವಯಸ್ಸು ಜಾತಿ ಗೀತಿ ಎಲ್ಲಾ ಅಷ್ಟು ಮುಖ್ಯ ಅಲ್ಲ.

9. ಇವತ್ತು ತೀರಾ ಕಷ್ಟ ಅನ್ನಿಸ್ತಾ ಇದ್ರೆ ನೆನಪಿಡಿ: ನಾಳೆ ಅನ್ನೋದೂ ಇದೆ. ಕಾಯಿರಿ.

ಎಷ್ಟೋ ಸಮಸ್ಯೆಗಳು ತಮ್ಮಷ್ಟಕ್ಕೆ ತಾವೇ ಸ್ವಲ್ಪ ಸಮಯ ಕೊಟ್ಟರೆ ಮಾಯ ಆಗೋಗ್ತವೆ. ಸ್ವಲ್ಪ ತಾಳ್ಮೆ ಇರಲಿ. ಎಲ್ಲಾ ಇವತ್ತೇ ಸರಿಯಾಗ್ಬೇಕು ಅಂತ ಯಾಕ್ ಅನ್ಕೋತೀರಿ?

10. ನಿಮಗೆ ಗೊತ್ತಿಲ್ಲದೆ ನಿಮ್ಮ ತರಹ ಅದು ಮಾಡಬೇಕು, ಇದು ಮಾಡಬೇಕು, ನಿಮ್ಮ ತರಹ ಇರಬೇಕು ಅನ್ಕೊಳೋರಿರ್ತಾರೆ.

ಹೌದು ಕಣ್ರೀ, ನೀವು ಒಂಥರಾ ರೋಲ್ ಮಾಡೆಲ್ಲು. ನಿಮಗೂ ಒಳ್ಳೇ ಅಭ್ಯಾಸಗಳಿವೆ. ನಿಮ್ಮಿಂದಾನೂ ಜನ ಕಲೀತಾರೆ. ಬೇಕಾದರೆ ನೀವೇ ಕೂತ್ಕೊಂದು ಲೆಕ್ಕ ಹಾಕಬಹುದು, ಯಾರ್ಯಾರು ಅಂತ.

11. ನೀವು ಯಾವುದರ ಬಗ್ಗೆ ಯೋಚ್ನೆ ಮಾಡ್ತೀರೋ ಅದು ನಿಮ್ಮ ಜೀವನಕ್ಕೆ ಹರ್ಕೊಂಡ್ ಬರುತ್ತೆ. ಆದ್ದರಿಂದ ಯಾವಾಗಲೂ ಒಳ್ಳೇ ಯೋಚನೆ ಮಾಡಿ.

ಇದೊಂದು ವಿಚಿತ್ರವಾದ ಸತ್ಯ. "ಅಸ್ತು ದೇವತೆಗಳು" ಅಂತ ಇರ್ತಾರೆ ಅಂತಾರೆ. ಅವರು ಎಲ್ಲಾದಕ್ಕೂ "ಆಸ್ತು, ಅಸ್ತು" ಅಂತಿರ್ತಾರಂತೆ ಅಂತ ನೀವು ಕೇಳಿರಬಹುದು. ಇದೇನು ಬರೀ ಬೊಕ್ಕಳೆ ಅಲ್ಲ. ನಿಜಕ್ಕೂ ನಮ್ಮ ಮನಸ್ಸು ಏನು ಕೆಳುತ್ತೋ ಅದು ಆಗುತ್ತೆ ಅಂತ ಈಗ ಪ್ರಪಂಚದಲ್ಲೆಲ್ಲ ಮಾತಾಡ್ತಿದಾರೆ.

12. ಚಿಕ್ಕ ಚಿಕ್ಕ ಗೆಲುವುಗಳ್ನ ಮರೀಬೇಡಿ, ಅವುಗಳಿಂದಲೇ ದೊಡ್ಡದನ್ನ ಸಾಧಿಸಕ್ಕಾಗೋದು.

ನೀವು ಹಾಕ್ಕೊಂಡಿರೋ ಗುರಿ ದೊಡ್ಡದೇ ಇರಬಹುದು, ಆದ್ರೆ ಎಲ್ಲಾ ಒಂದೇ ಸಲ ಆಗಲ್ಲವಲ್ಲ? ಏಣಿ ಹತ್ತಬೇಕಾದರೆ ಒಂದೊಂದಾಗಿ ಕೋಲಿನ ಮೇಲೆ ಕಾಲು ಇಟ್ಕೊಂಡು ಹೋಗಬೇಕು ತಾನೇ? ಒಂದೇ ಸಲಕ್ಕೆ ಮೇಲೆ ಹೋಗಬೇಕು ಅಂದ್ರೆ?

13. ಹಿಂದಿನ ಸೋಲುಗಳಿಗೆ ನಿಮ್ಮ ಅನುಮತಿ ಇಲ್ಲದೆ ನಿಮ್ಮ ಭವಿಷ್ಯ ತೀರ್ಮಾನಿಸೋ ಶಕ್ತಿ ಇಲ್ಲ. ಆದ್ದರಿಂದ ಅದರಿಂದ ಕಲೀಬೇಕಾದ್ದು ಕಲಿತು ಮುಂದ್-ಮುಂದಕ್ಕೆ ಹೋಗ್ತಾ ಇರಿ.

ಆಗಿದ್ದರ ಬಗ್ಗೆ ಬರೀ ಗೊಳೋ ಅಂತ ಕೂತಿದ್ರೆ ಏನ್ ಉಪಯೋಗ? ಅದರ ಬದಲು ಕಲಿಯೋದು ಕಲೀರಿ, ಮುಂದೆ ಏನ್ ಮಾಡ್ಬೇಕು ಅಂತ ಯೋಚ್ನೆ ಮಾಡಿ. ಆಗಲೇ ಹೇಳಿದ್ವಲ್ಲ, ತಪ್ಪು ಒಂಥರಾ ಗುರು ಇದ್ದಂಗೆ ಅಂತ?

14. ನಿಮ್ಮ ಹತ್ತಿರ ಯಾವುದು ಇಲ್ಲ ಅನ್ನೋ ಯೋಚನೆ ಬಿಟ್ಟು ಯಾವುದು ಇದೆ ಅನ್ನೋದರ ಬಗ್ಗೆ ಯೋಚನೆ ಮಾಡಿ, ಆಗ ನಿಮಗೇ ಗೊತ್ತಾಗುತ್ತೆ, ನೀವೇನು ಅಷ್ಟು ಕೆಟ್ಟದಾಗಿರೋ ಜೀವನ ಮಾಡ್ತಿಲ್ಲ ಅಂತ.

ನನ್ನ ಹತ್ತಿರ ಕಾರ್ ಇಲ್ಲ, ಸ್ವಂತ ಮನೆ ಇಲ್ಲ... ಅಂತ ಅತ್ಕೊಂಡ್ ಕೂತ್ಕೊಂಡ್ರೆ ಅವೆಲ್ಲ ಸಿಕ್ಕಿ ಬಿಡುತ್ತಾ? ಅದರ ಬದಲು ಬೈಕೂ ಇಲ್ಲದಿರೋರು, ಬಾಡಿಗೆ ಮನೇನೂ ಇಲ್ಲದಿರೋರು ಇದಾರೆ ಅಂತ ನೆನಪಿಟ್ಟುಕೊಳ್ಳಿ. ಇವತ್ತಲ್ಲ ನಾಳೆ ನಿಮಗೆ ಕಾರೂ‌ ಸಿಗುತ್ತೆ, ಸ್ವಂತ ಮನೇನೂ ಮಾಡ್ಕೋತೀರಿ. ನೀವು ಅನ್ಕೊಂಡಿರೋಷ್ಟು ಬಡವರೇನು ನೀವಲ್ಲ.

15. ಸಾಮಾನ್ಯವಾಗಿ ರೋಗ ಬರೋದೇ ಸರಿಯಾಗಿಲ್ಲದಿರೋ ಜೀವನಶೈಲಿಯಿಂದ, ಒತ್ತಡದಿಂದ. ನಿಮ್ಮ ಅಭ್ಯಾಸಗಳ್ನ ಬದಲಾಯಿಸಿಕೊಳ್ಳಿ, ಆಗ ಆರೋಗ್ಯದಿಂದ ಇರ್ತೀರಿ.

ಸಾಮಾನ್ಯವಾಗಿ ರೋಗ ಬಂದ್ರೆ ಅದು ನಿಮ್ಮ ತಪ್ಪೇ. ಮೇಲೆ ಹೇಳಿದಂಗೆ ಆ ತಪ್ಪಿಂದ ಕಲೀಬೇಕಾದ್ದನ್ನ ಕಲೀರಿ, ಅಷ್ಟೇ.

16. ನಿಮ್ಮ ತರಹ ಬೇರೆ ಯಾರೂ ಇಲ್ಲ. ನಿಮ್ಮ ನಿಮ್ಮತನವನ್ನ ಬೇರೆ ಯಾರೂ ಕಿತ್ಕೊಂಡ್ ಹೋಗಕ್ಕಾಗಲ್ಲ.

ನಿಮಗೆ ನಿಮ್ಮದೇ ಆದ ಪ್ರತಿಭೆ ಇದೆ. ನ್ಯೂನತೆಗಳೂ ಇವೆ. ನಿಮ್ಮ ತರಹಾನೇ ಬೇರೆ ಯಾರಿದಾರೆ ಹೇಳಿ? ನೀವು ಪ್ರಪಂಚದಲ್ಲಿ ಮಾಡಕ್ಕಾಗೋದನ್ನ ಬೇರೆ ಯಾರ ಕೈಯಲ್ಲೂ ಮಾಡಕ್ಕಾಗಲ್ಲ ಅಂತ ನೆನಪಿಡಿ. ಈ "ಶಕ್ತಿ"ಯನ್ನ ಯಾರೂ ಕಿತ್ಕೊಂಡ್ ಹೋಗಕ್ಕೂ ಆಗಲ್ಲ.

17. ಜೀವನದಲ್ಲಿ ಅವಕಾಶಗಳಿಗೆ ಬರ ಇಲ್ಲ. ನಿಮ್ಮ ಮುಂದೆ ಬಂದು ನಿಂತಾಗ ನಿಮಗೆ ಅದು ಅವಕಾಶ ಅಂತ ಅರ್ಥ ಆಗಬೇಕು, ನೀವು ಅದನ್ನ ತೊಗೋಬೇಕಷ್ಟೆ.

ಎಲ್ಲ ನಾವು ಅನ್ಕೊಂಡಂಗೆ ಕಣ್ರೀ. ನನಗೆ ಎಲ್ಲಾ ಕಟ್ಟದಾಗುತ್ತೆ ಅನ್ಕೊಂಡ್ರೆ ಕೆಟ್ಟದೇ ಆಗುತ್ತೆ. ಒಳ್ಳೇದಾಗುತ್ತೆ ಅನ್ಕೊಂಡ್ರೆ ಒಳ್ಳೇದಾಗುತ್ತೆ. ಎಣ್ಣೆ ಬಂದಾಗ ಕಣ್ಣು ಮುಚ್ಕೊಂಡು ಕೂತ್ಕೋಬೇಡಿ.

18. ಅನವಶ್ಯಕವಾಗಿ ಅವಸರ ಪಟ್ಕೋಬೇಡಿ. ಸರಿಯಾಗಿ ಯೋಚನೆ ಮಾಡಿ ನೋಡಿ, ಸರಿಯಾಗಿ ಪ್ಲಾನ್ ಮಾಡಿ ನೋಡಿ, ಆಗ ನಿಮಗೇ ಅರ್ಥ ಆಗುತ್ತೆ. ಹಾಗಂತ ಟೈಂ ವೇಸ್ಟ್ ಮಾಡಬೇಡಿ.

ಇತ್ತೀಚೆಗೆ ಪ್ರತಿಯೊಂದಕ್ಕೂ ಅವಸರ ಮಾಡ್ಕೋತಿದೀವಿ ಅನ್ನಿಸಲ್ವಾ ನಿಮಗೆ? ಇದೊಂಥರ ವಿಚಿತ್ರ. ನಿಜಕ್ಕೂ ಅಷ್ಟೆಲ್ಲ ಅವಸರ ಬೇಕಾಗೇ ಇರಲ್ಲ. ಆದರೂ ಬೇಗ್-ಬೇಗ ಆಗಬೇಕು ಅನ್ನೋ ಹುಚ್ಚು. ಯಾಕ್ ಬೇಕು? ಅದರ ಬದಲು ಸರಿಯಾಗಿ ಪ್ಲಾನ್ ಮಾಡ್ಕೊಂಡ್ರೆ ರೋಗ ಬರಲ್ಲ ರೀ.

19. ನಿಮಗೆ ಇಷ್ಟವಿಲ್ಲದಿರೋ ಕೆಲಸವನ್ನ ಜೀವನ ಇಡೀ ಮಾಡಬೇಕು ಅಂತೇನಿಲ್ಲ. ನಿಜಕ್ಕೂ ನಿಮ್ಮ ಬಾಸ್ ನೀವೇನೇ. ಕಾಲ ಕೂಡಿ ಬಂದಾಗ ಬಿಟ್ಟು ಬೇರೆ ಕೆಲಸ ಹುಡುಕ್ಕೊಳಿ.

ನಮ್ಮ ಹಿಂದಿನ ಪೀಳಿಗೆಯೋರು ಸಿಕ್ಕಿರೋ ಒಂದ್ ಕೆಲಸಕ್ಕೆ ಇಡೀ ಜೀವನ ಕೊಡ್ತಿದ್ರು. ಆದ್ರೆ ಈಗ ಹಾಗೆ ಮಾಡಬೇಕಗಿಲ್ಲ. ದಿನಾ ಕೆಲಸಕ್ಕೆ ಹೋಗಬೇಕಲ್ಲಪ್ಪ, ಆ ಕಷ್ಟ ಪಡಬೇಕಲ್ಲಪ್ಪ ಅಂತ ಹೋಗ್ತಾ ಇದ್ರೆ ನಿಮಗೆ ಬೇರೆ ದಾರಿ ಇದೆ. ನಿಮ್ಮ ಯೋಗ್ಯತೆ ಎಂಥದ್ದು, ನಿಮಗೆ ಎಂಥ ಕೆಲಸ ಬೇಕು ಅಂತ ಯೋಚನೆ ಮಾಡ್ತಾ ಇರಿ. ಸಿಕ್ಕಾಗ ಹಾರಿಕೊಳ್ಳಿ.

20. ಬೇರೆಯೋರು ಹೇಳಿದ್ದನ್ನೇ ತಲೆ ಮೇಲೆ ಕೂಡಿಸಿಕೊಂಡು ನಿಮ್ಮ ಜೀವನದ ಗುರಿ ಮಾಡ್ಕೋಬೇಕಾಗಿಲ್ಲ. ನಿಮ್ಮ ಗುರಿ ನೀವೇ ಕಂಡಿಡ್ಕೊಳಿ.

ಎಲ್ಲಾರೂ ಅವರವರಿಗೆ ಬೇಕಾದಂಥ ಗುರಿ ಇಟ್ಕೊಂಡಿರ್ತಾರೆ. ನಿಮ್ಮದು ನೀವು ಇಟ್ಕೊಳಿ. ಇಲ್ಲಾಂದ್ರೆ ನಿಮಗೆ ಜೀವನದಲ್ಲಿ ಕಷ್ಟ ಖಂಡಿತ. ಇನ್ನೊಬ್ಬರ ಬಟ್ಟೆ ಹಾಕ್ಕೊಂಡಂಗೆ ಅದು - ಎಲ್ಲೆಲ್ಲೋ ಟೈಟು, ಎಲ್ಲೆಲ್ಲೋ ಲೂಸು!

21. ನಾಳೆ ಏನಾಗುತ್ತೆ ಅಂತ ಯಾರಿಗೂ ಖಡಾಖಂಡಿತವಾಗಿ ಗೊತ್ತಿಲ್ಲ. ಒಳ್ಳೇದಾಗುತ್ತೆ ಅಂತ ಬೇಕಾದ್ರೂ ಅನ್ಕೋಬೋದು, ಕೆಟ್ಟದಾಗುತ್ತೆ ಅಂತ ಬೇಕಾದ್ರೂ ಅನ್ಕೋಬೋದು.

ನೀವೇ ಕೆಟ್ಟದು ಯೋಚನೆ ಮಾಡ್ಕೊಂಡ್ರೆ ಹೇಗೆ? ಆಗಲೇ ಹೇಳಿದ್ವಲ್ಲ, "ಅಸ್ತು ದೇವತೆಗಳು" ಅಂತ ಇರ್ತಾರೆ ಅಂತ? ನನಗೆ ಕೆಟ್ಟದಾಗುತ್ತೆ ಅನ್ಕೊಂಡ್ರೆ "ಆಸ್ತು" (ಹಂಗೇ ಆಗಲಿ)‌ ಅಂತಾರೆ ಅವರು. ನನಗೆ ಒಳ್ಳೇದಾಗುತ್ತೆ ಅನ್ಕೊಂಡ್ರೆ ಅದಕ್ಕೂ "ಅಸ್ತು" ಅಂತಾರೆ. ನಿಮಗೆ ಒಳ್ಳೇದೇ ಆಗಬೇಕು ತಾನೆ?

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ: