ಹೇಗಪ್ಪಾ ಕೇಳೋದು ಅಂತ ಮದುವೆ ಮುಂಚೆ ಈ 12 ಪ್ರಶ್ನೆಗಳ್ನ ಅವರ ಹತ್ತಿರ ಕೇಳದೆ ಇರಬೇಡಿ

ಆಮೇಲೆ ಕಷ್ಟ ಪಡೋರು ನೀವೇ

ಮುಂಚೆ ಎಲ್ಲಾ ಮದ್ವೆ ಅಂದ್ರೆ ಜನ್ಮಜನ್ಮದ ಅನುಬಂಧ ಅಂತಿದ್ರು. ಇವತ್ತು ಅಂಥ ಡೈಲಾಗ್ ಹೊಡ್ಯೋರು ಕಡಿಮೆ. ಮದುವೆ ಆದ ಮೇಲೆ ಆಗೊವರೆಗೆ ಇದ್ದ ಜೋಶ್ ಉಳಿಯಲ್ಲ. ಮೂರು ಗಂಟು ಮೊಟ್ಟಮೊದಲ ಆಕರ್ಷಣೆ ಒಂದರ ಮೇಲೇ ನಿಂತಿರಲ್ಲ... ಅದಕ್ಕೇ ನೀವು ಮದ್ವೆ ಆಗ್ಬೇಕು ಅಂತಿರೋರನ್ನ ಮದುವೆಗೆ ಮುಂಚೆನೇ ಈ 12 ಪ್ರೆಶ್ನೆ ಕೇಳ್ಕೊಂಬಿಡಿ. ಹೇಗಪ್ಪಾ ಕೇಳೋದು ಅಂತ ಯೋಚನೆ ಮಾಡೋದು ಸ್ವಲ್ಪ ಕಡಿಮೆ ಮಾಡಿ. ಮದುವೆ ಮುಂಚೆ ಕೇಳಿದರೆ ಕೇಳಿದಹಂಗೆ. ಆಮೇಲೆ ತುಂಬ ಲೇಟಾಗೋಗುತ್ತೆ. ನೇರವಾಗಿ ಇಲ್ಲಿರೋಹಾಗೇ ಕೇಳಿ ಅಂತ ನಾವು ಹೇಳ್ತಿಲ್ಲ, ಈ ಪ್ರಶ್ನೆಗಳಿಗೆ ಉತ್ತರ ಸಿಗೋಹಾಗೆ ನೋಡ್ಕೊಳಿ. ಪ್ರಶ್ನೆಗಳಿಗೆ ಬರೋಣ್ವಾ?

1. ನಿಮ್ಮ ಸಂಬಳ ಎಷ್ಟು?

ನಿಮ್ಮ ಗಳಿಕೆ, ಉಳಿಕೆ, ಖರ್ಚಿನ ಬಗ್ಗೆ ಒಬ್ಬರಿಗೊಬ್ಬರು ಚೆನ್ನಾಗಿ ಮಾತಾಡ್ಕೊಳೋದು ಒಳ್ಳೇದು. ಕೊನೆ ತನಕ ಜೊತೆಲಿರಬೇಕಾದಾಗ ನಂಬಿಕೆ ಇರಬೇಕು. ದುಡ್ಡಿನ ವಿಷಯಕ್ಕೆ ಜಗಳ ಆದರೆ ಅದು ಎಲ್ಲಿಂದ ಎಲ್ಲಿಗೋ ಹೋಗುತ್ತೆ.

2. ನಿಮ್ಮ ಪ್ರಕಾರ ತಿಂಗಳಿಗೆ ಎಷ್ಟು ಉಳಿಸಬೇಕು?

ಕೆಲವರಿಗೆ ದುಡ್ಡು ಉಳಿಸೋದು ಅಂದ್ರೆ ಏನೂಂತಾನೇ ಗೊತ್ತಿರಲ್ಲ. ಇನ್ನೂ ಕೆಲವರಿಗೆ ಖರ್ಚು ಮಾಡೋದು ಅಂದ್ರೆ ಏನೂಂತ ಗೊತ್ತಿರಲ್ಲ. ಹೀಗಿರುವಾಗ ಒಬ್ಬರಿಗೊಬ್ಬರು ಇದರ ಬಗ್ಗೇನೂ ಮಾತಾಡ್ಕೊಳೋದು ವಾಸಿ.

3. ನನ್ನ ಬಗ್ಗೆ ನಿಮಗೆ ನಿಜವಾಗಲೂ ಗೊತ್ತಾ?

ಕೆಲವರು ಯಾರ್ನ ಮದುವೆ ಆಗ್ತಿದೀನಿ ಅಂತ ಗೊತ್ತಿಲ್ಲದಿದ್ದರೂ ಮದುವೆ ಆಗಕ್ಕೆ ಮುಂದೆ ಬರ್ತಾರೆ, ಆದರೆ ಅದು ಸರಿಯಲ್ಲ. ಆಮೇಲೆ ತೊಂದರೆ ಕೊಡುತ್ತೆ. 'ನನಗೆ ನೀನು ಹಿಂಗೆ ಅಂತ ಮೊದಲೇ ಗೊತ್ತಿದ್ದರೆ ಖಂಡಿತ ಮದುವೆ ಆಗ್ತಿರಲಿಲ್ಲ' ಅನ್ನೋ ಮಾತೆಲ್ಲ ಬರುತ್ತೆ. ಅವೆಲ್ಲ ಯಾಕೆ?

4. ನಾನು ಹೇಗಿದೀನೋ ಹಾಗೆ ಒಪ್ಕೋತೀರಾ?

ನಾವು ಬದಲಾಗ್ತಾನೇ ಇರ್ತೀವಿ. ಪ್ರತಿ ದಿನ ಬದಲಾಗ್ತೀವಿ. ಆದರೂ ಬೇರೆಯೋರು ಹೇಗೆ ಬದಲಾಗಬೇಕು ಅಂತ ಬಯಸುತ್ತಾರೋ ಹಾಗೆ ಬದಲಾಗದೆ ಇರಬಹುದು. ಆದ್ದರಿಂದ ಇದನ್ನ ಕೇಳಿಬಿಡೋದು ವಾಸಿ. ಆಗ ಅವನು/ಅವಳು ನಿಮ್ಮ ಭವಿಷ್ಯದ ಬಗ್ಗೆ ಏನು ಯೋಚನೆ ಮಾಡಿದಾನೆ/ಳೆ ಅಂತ ಗೊತ್ತಾಗುತ್ತೆ.

5. ಜೀವನದಲ್ಲಿ ನೀವ್ ಮಾಡ್ಬೇಕು ಅಂತಿರೋ ದೊಡ್ಡ ಸಾಧನೆ ಏನು?

ಕನಸುಗಳಿರೋ ವ್ಯಕ್ತಿ ಜೊತೆ ಬದುಕೋದು ಒಂದು ಥ್ರಿಲ್ಲು. ಹಾಗಂತ ಆ ಕನಸಿನಲ್ಲಿ ನೀವು ಹೊಂದ್ಕೊಂಡ್ ಹೋಗಕ್ಕಾಗತ್ತೆ ಅಂತ ಗೊತ್ತಿಲ್ಲದಿದ್ದರೂ ನಂಬಿಕೊಳ್ಳಬೇಡಿ. ಆ ಕನಸು ಏನು ಅಂತ ಮೊದಲು ಅರ್ಥ ಮಾಡ್ಕೊಳಿ. ಕೇಳಿ.

6. ಮದುವೆ ಆದ ಮೇಲೆ ನೀವು ನನ್ನಿಂದ ಏನ್ ಬಯಸ್ತೀರಿ?

ನಾವ್ ಏನೋ ಅನ್ಕೊಂಡು ಮದುವೆ ಆಗಿ ಆಮೇಲೆ ನಂಗೆ ಹೀಗಿರಬೇಕಿತ್ತು, ಹಾಗಿರಬೇಕಿತ್ತು ಅಂದ್ರೆ ಕಷ್ಟ. ಮೊದ್ಲೇ ಇದೆಲ್ಲಾ ಮಾತಾಡ್ಕೊಂಡಿದ್ರೆ ಒಳ್ಳೇದು.

7. ನಿಮಗೇನಾದ್ರು ಕೆಟ್ಟಭ್ಯಾಸ, ಆರೋಗ್ಯದ ಸಮಸ್ಯೆ ಇದ್ಯಾ?

ಆ ಸಮಸ್ಯೆ ಚಿಕ್ಕದೊ, ದೊಡ್ದದೊ.. ಏನೇ ಆಗಿರ್ಲಿ ಮೊದಲೇ ಗೊತ್ತು ಮಾಡ್ಕೊಳಿ. ಇವತ್ತು ಚಿಕ್ಕದಾಗಿರೋ ಸಮಸ್ಯೆ ಮುಂದೆ ದೊಡ್ಡದಾಗಿ ಬೆಳೆದು ಮದುವೆನೇ ಮುರಿದುಬೀಳುತ್ತೆ ಕಣ್ರೀ.

8. ನಾನು ಚೆನ್ನಾಗಿದೀನಾ?

ದೈಹಿಕ ಸಂಬಂಧವಿಲ್ಲದಿದ್ದರೆ ಅದೆಂಥ ಮದುವೆ? ಆದ್ದರಿಂದ ನಿಮ್ನ ಮದುವೆ ಆಗೋರ್ಗೆ ನೀವು ಚೆನ್ನಾಗಿದೀರಿ ಅನ್ನಿಸಬೇಕು. ಎಂಥಾ ಆಧ್ಯಾತ್ಮಿಕ ವ್ಯಕ್ತಿಗಳಾಗಿದ್ದರೂ ಕಾಮವಿಲ್ಲದ ಮದುವೆ ಮದುವೇನೇ ಅಲ್ಲ.

9. ನಮ್ಮ ಮನೆಯೋರು, ಸ್ನೇಹಿತರ ಬಗ್ಗೆ ನಿಮಗೇನನ್ನಿಸುತ್ತೆ?

ಮದುವೆ ಇಬ್ಬರ ನಡುವೆಯೆ ನಡೆದ್ರೂ, ಎರಡೂ ಕುಟುಂಬಗಳೂ ಹಾಗೂ ಸ್ನೇಹಿತರೊಂದಿಗೆ ನಿಕಟ ಸಂಬಂಧ  ಇರುತ್ತೆ. ಎಲ್ಲಾನ್ನೂ ಮ್ಯಾನೇಜ್ ಮಾಡೋದು ಕಷ್ಟ. ನಿಮ್ಮನ್ನ ಮದುವೆ ಆಗೋರು ನಿಮ್ಮ ಸ್ನೇಹಿತರ ಜೊತೆ ಮತ್ತೆ ಮನೆಯೋರ ಜೊತೆ ಹೊಂದ್ಕೊಂಡ್ ಹೋಗೋಹಾಗಿದ್ರೆ ನಿಮ್ಮ ಜೀವನ ಸುಲಭವಾಗಿರುತ್ತೆ.

10. ನಿಮ್ಮನೇಲಿ ಪೂಜೆ ಗೀಜೆ ಜಾಸ್ತಿನಾ? ಬಹಳ ಸಂಪ್ರದಾಯಸ್ಥರಾ?

ಈ ವಿಷಯಗಳಲ್ಲಿ ಮೊದಮೊದಲು ಎಲ್ಲಾ ಚೆನ್ನಾಗೇ ಇರುತ್ತೆ. ನಿಧಾನವಾಗಿ ಒಬ್ಬರಮೇಲೊಬ್ಬರಿಗೆ ಬೇಜಾರ್ ಶುರುವಾಗುತ್ತೆ. ಒಬ್ಬರ ನಂಬಿಕೆನೇ ಇನ್ನೊಬ್ರಿಗೆ ಇಲ್ದೇ ಹೋದ್ರೂ, ಕೊನೆ ಪಕ್ಷ, ಇಬ್ರಿಗೂ ಇನ್ನೊಬ್ರ ನಂಬಿಕೆ ಬಗ್ಗೆ ಗೊತ್ತಿರಬೇಕು. ಅಲ್ದೇ ಒಬ್ರ ನಂಬಿಕೇನ ಇನ್ನೊಬ್ರು ಗೌರವಿಸಬೇಕು.

11. ಮದ್ವೆ ಆದ್ಮೇಲೆ ಅಕಸ್ಮಾತ್ ನಂಗೂ ನಿಮ್ಗೂ ಯಾವ್ದಾದ್ರೂ ವಿಷ್ಯದಲ್ಲಿ ಸರಿ ಹೋಗ್ದೇ ಹೋದ್ರೆ ಏನ್ ಮಾಡ್ತಿರಾ?

ಈ ಪ್ರಶ್ನೆಗೆ ಏನ್ ಉತ್ರ ಕೊಡ್ತಾರೆ ಅಂತ ನೋಡ್ಕೊಳಿ. ಔರು ನಿಮ್ಮನ್ನ ಬಿಡೋ ಮಾತು ಆಡ್ತಾರೆ ಅಂದ್ರೆ ಔರು ನಿಮ್ಮಿಬ್ಬರ ಸಂಬಂಧದ ಬಗ್ಗೆ ತುಂಬಾ ಸೀರಿಯಸ್ಸಾಗಿಲ್ಲ ಅಂತ ಅರ್ಥ.

12. ಮಕ್ಕಳು?

ಇದಂತೂ ಬಹಳ ಮುಖ್ಯವಾದ ವಿಷಯ. ಈ ಪ್ರಶ್ನೆಯಿಂದ ಇವರನ್ನ ಮದುವೆ ಮಾಡ್ಕೊಂಡ್ರೆ ನಿಮ್ಮ ಮುಂದಿನ ಜೀವನ ಹೇಗಿರುತ್ತೆ ಅನ್ನೋದರ ಒಂದು ಅತಿ ಮುಖ್ಯವಾದ ಭಾಗ ಗೊತ್ತಾಗೋಗುತ್ತೆ. ಅವರಿಗೆ ಮಕ್ಕಳು ಇಷ್ಟ ನಾ? ಅವರ  ಆರೋಗ್ಯ ಎಲ್ಲಾ ರೀತಿಯಲ್ಲೂ ಚೆನ್ನಾಗಿದ್ಯಾ? ಮಕ್ಕಳ ಕಂಡರೆ ಅವರಿಗೆ ಇಷ್ಟ ನಾ? ಇವೆಲ್ಲ ಈಗಲೇ ಕೇಳ್ಕೊಳೋದು ವಾಸಿ.

ಮದುವೆ ಅಂದಮೇಲೆ ಮನಸ್ಸಿಗೆ ಎಷ್ಟೋ ಪ್ರಶ್ನೆಗಳು ಬರುತ್ವೆ. ಎಷ್ಟೋ ಜನ ದುಡುಕಿ ಬಿಡ್ತಾರೆ. ಮುಂದೆ ಕೇಳಿದ್ರಾಯ್ತು, ಕೇಳಿದ್ರೆ ಏನಂದುಕೊಳ್ಳುತ್ತಾರೊ... ಮದುವೆ ನಿಂತ್ಹೋದ್ರೆ... ಅಂತೆಲ್ಲಾ ಹೆದರಬೇಡಿ. ಸುಮ್ನೆ ಇದ್ದು ನಿಮಗೆ ನೀವೇ ಮೋಸ ಮಾಡ್ಕೋಬೇಡಿ.

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ:

ನಿಮ್ಮ ಮೆಚ್ಚಿನ ಅಂತೆಕಂತೆ ಈಗ YouTube ನಲ್ಲಿ

ಈ ಬಟನ್ ಒತ್ತಿ subscribe ಮಾಡಿಕೊಳ್ಳಿ:
 

ಅವಳು ನಿನ್ನವಳೇ ಆಗಿದ್ದರೆ ಈಗಾಗಲೇ ಈ 23 ಗುರುತುಗಳಲ್ಲಿ ಕೆಲವಾದರೂ‌ ಕಂಡಿರಬೇಕು

ಕಂಡಿದ್ದರೆ ನಿನ್ನ ಜೀವನಸಂಗಾತಿ ಅವಳೇ

ಜೀವನದಲ್ಲಿ ಇಂತ ಅದ್ಭುತ ನಡಿಯೋದು ಒಂದೇ ಒಂದು ಸತಿ. ನಿಮ್ಮ ಜೀವನಕ್ಕೆ ಬೆಳಕ್ ತರ ಬಂದು, ನಿಮ್ಮ ಸುಖ ದುಃಖದಲ್ಲೆಲ್ಲ ಜೊತೆಗಿದ್ದು, ಇವಳೇ ನಿಮ್ಮ ಸಂಗಾತಿ ಇರ್ಬೋದೆನೋ ಅಂತ ಅನ್ನಿಸ್ತಿದ್ರೆ, ಅವ್ಳಲ್ಲಿ ಈ ಕೆಳ್ಗಿರೊ ಗುಣಗಳಿದ್ರೆ ಡೌಟೇ ಬೇಡ ಅವ್ಳು ನಿಮ್ ಹುಡ್ಗಿ...

1. ಅವಳು ನಿಮ್ಮ್ ಜೊತೆ ಇದ್ದಾಗ ನಿಮಗೆ ಏನೋ ಒಂದು ಪ್ರೇರಣೆ, ನಿನ್ನೆಗಿಂತ ನನ್ನ ಜೀವನ ಇನ್ನು ಚೆನಾಗ್ ಆಗ್ಬೇಕು, ಕಷ್ಟ ಪಟ್ಟು ಜೀವನದಲ್ಲಿ ಇನ್ನು ಮೇಲೇರಬೇಕು ಅಂತ ಅನ್ನಿಸತ್ತೆ.

2. ಏಯ್ ಗಟ್ಟಿ ಗಂಡಸು ಮಾರ್ರೆ ನಾನು, ಯಾವ್ ಸೆಂಟಿಮೆಂಟು ನನ್ನತ್ರ ನಡಿಯಲ್ಲ, ಕಲ್ಲು ಬಂಡೆ ಥರ ನಾನು ಅಂತಿದ್ದ ನಿಮ್ಮನ್ನ, ಈ ಹುಡುಗಿ ಹೋಗ್ತಾಹೋಗ್ತಾ ಕರ್ಗೋಗೊ ಹಾಗೆ ಮಾಡ್ಬಿಡ್ತಾಳೆ. ಅವ್ಳು ನಿಮ್ಮಲ್ಲಿ ಪ್ರೀತಿ, ವಾತ್ಸಲ್ಯ, ಸಂತೋಷ ಒಂತರ ಎಲ್ಲ ಭಾವನೆ ನಿಮ್ಮಲ್ಲಿ ಶುರು ಆಗೋ ಹಾಗೆ ಮಾಡಿರ್ತಾಳೆ. ಅವ್ಳಿಗೆ ನಿಮ್ ಕಣ್ಣಲ್ಲೂ ನೀರ್ ಹಾಕ್ಸೋ ತಾಕತ್ತಿರತ್ತೆ... ಇಂತ ಭಾವನೆಗಳು ನಿಮ್ಗೆ ಮುಂಚೆ ಅನುಭವಕ್ಕೆ ಬಂದಿರಲ್ಲ.

3. ಇದೊಂತರ ವಿಚಿತ್ರ. ಅವ್ಳ ಖುಷಿ ನಿಮಗೆ ಖುಷಿ ಕೊಡತ್ತೆ. ಅವಳ ಒಂದು ನಗು ಸಾಕು ನಿಮಗೆ ಸಿಕ್ಕಾಪಟ್ಟೆ ಖುಷಿಯಾಗಿರಕ್ಕೆ, ಅವ್ಳ ನಗು ಕಾರಣ ನಿಮ್ಗೆ ಬೇಕಿರಲ್ಲ, ಅವ್ಳ್ ನಕ್ರೆ ಸಾಕು.

4. ನಿಮ್ಮ ಎಲ್ಲ ಯೋಚನೆ, ನಿಮ್ಮ ಟೆನ್ಷನ್ನು ಎಲ್ಲ ದೂರ ಆಗಕ್ಕೆ ಅವಳ ಒಂದೇ ಒಂದು ನಗು ಸಾಕು. ಆ ಒಂದ್ ಕ್ಷಣ ಏನೋ ಒಂತರ ನೆಮ್ಮದಿ ಸಿಗೊಹಾಗ್ ಮಾಡತ್ತೆ.

ಮೂಲ

5. ಅವಳ ನಗು ನಿಮಗೆ ಖುಷಿ ತರತ್ತೆ ಅಂತ ಯಾವಾಗ್ಲೂ ಅವ್ಳು ನಿಮ್ಮತ್ರ ನಗ್ತನೇ ಇರ್ಬೇಕಿಲ್ಲ... ಅವ್ಳ್ ಜೊತೆ ಟೈಮ್ ಸ್ಪೆಂಡ್ ಮಾಡೊ ಭಾಗ್ಯ ನಿಮ್ಗೆ ಸಿಕ್ಕಿದ್ರೆ ಸಾಕಾಗಿರತ್ತೆ. ಅವ್ಳ್ ಜೊತೆ ಇರೋ ಅಷ್ಟೂ ಹೊತ್ತು ನಿಮ್ಗೆ ಮಧುರವಾದ ಕ್ಷಣ ಅನ್ನಿಸ್ತಿರತ್ತೆ.

6. ಎರಡು ದೇಹ ಒಂದೇ ಜೀವ ನಿಮ್ಮದು ಅನ್ನಿಸತ್ತೆ.

7. ಅವಳ ಎಲ್ಲ ಭಾವನೆ ನಿಮಗೆ ಆಕರ್ಷಕವಾಗಿರತ್ತೆ, ಅವಳ ಬಗ್ಗೆ ಪೂರ್ತಿ ತಿಳ್ಕೊಬೇಕು ಅಂತ ಅನ್ನಿಸತ್ತೆ ನಿಮಗೆ... ಅವ್ಳಲ್ಲಿರೊ ಒಳ್ಳೇದು, ಕೆಟ್ಟದ್ದು ಮತ್ತೆ ಸುಮಾರಾಗಿರೊ ವಿಚಾರ್ವೆಲ್ಲ ನಿಮ್ಗೆ ಓಕೆ ಆಗೋಗಿರತ್ತೆ... ಅವ್ಳನ್ನ ನೀವು ಆರಾಧಿಸಕ್ಕೆ ಶುರು ಮಾದ್ಬಿಟ್ಟಿರ್ತೀರ.

8. ಅವಳು ನಿಮ್ಮ ಕಡೆ ನಡ್ಕೊಂಡು ಬರ್ತಿದ್ರೆ ನಿಮ್ ಕಣ್ಣಿಗೆ ಬೇರೇನೂ ಕಾಣಲ್ಲ... ಎಲ್ಲ ಮಂಜ್ ಮಂಜು ಆಗೋಗತ್ತೆ... ಬರಿ ಅವಳೊಬ್ಬಳೇ... ನಿಮ್ಮ ಟೆನ್ಷನ್ನು, ನಿಮ್ಮ ಕೆಲಸಗಳೆಲ್ಲ ನೆನಪಾಗದೇ ಇಲ್ಲ, ಇಡೀ ಜೀವನ ಹೀಗೆ ಅವ್ಳನ್ನ ನೋಡ್ಕೊಂಡು ನೆಮ್ಮದಿಯಾಗಿದ್ಬಿಡ್ಬೇಕು ಅನ್ನಿಸತ್ತೆ.

ಮೂಲ

9. ಇವತ್ತಿನ ತಂಕ ಯಾರ್ ಹತ್ರನೂ ಹೇಳಿರದ ಗುಟ್ಟನ್ನ ಇವಳ ಹತ್ರ ಹೇಳ್ಕೊಬೇಕು ಅನ್ನಿಸತ್ತೆ. ನಿಮ್ಮ ಭಾವನೆಗಳ್ನೆಲ್ಲ ಅವ್ಳ್ ಹತ್ರ ಹಂಚ್ಕೊಬೇಕು ಅನ್ನಿಸತ್ತೆ. ನಿಮ್ಮೆಲ್ಲಾ ಗುಟ್ಟುಗಳ್ನ ಅವ್ಳು ಕಾಪಾಡ್ತಾಳೆ.

10. ನಿಮಗೆ ಗೊತ್ತಿಲ್ಲದ ಹಾಗೆ ಅವಳು ನಿಮ್ಮ ಪ್ರಪಂಚ ಆಗ್ಬಿಟ್ಟಿರ್ತಾಳೆ. ನೀವು ನಿಮ್ಮ ಮುಂದಿನ ಜೀವನದ ಬಗ್ಗೆ ಮಾಡೋ ಪ್ರತಿಯೊಂದು ಯೋಚನೇಲು ಅವಳಿಗೆ ಜಾಗ ಕೊಟ್ಟಿರ್ತೀರ.

11. ಕನಸಲೂ ನೀನೆ ಮನಸಲೂ ನೀನೆ... ದಿನಾ ಕನಸಲ್ಲಿ ಅವಳೇ ಬರ್ತಾಳೆ. ನಿಮಗೆ ಅವಳ್ ಬಿಟ್ಟು ಬೇರೇನೂ ಬೇಕಿರಲ್ಲ.

12. ಯಾವತ್ತೂ ಅನುಭವಿಸದ ಅನ್ಯೋನ್ಯತೆ ನಿಮಗೆ ಅವ್ಳ ಬಗ್ಗೆ. ಅಪ್ಪಿ ತಪ್ಪಿ ಒಂದ್ಸತಿ ಅವ್ಳನ್ನ ಮುಟ್ಟಿದ್ರೆ ಮೈ ಜುಮ್ ಅನ್ನತ್ತೆ, ತಲೆ ನಿಲ್ಲದೇ ಇಲ್ಲ. ಅವ್ಳನ್ನ ನಿಮ್ಮ ತೋಳಲ್ಲಿ ತಬ್ಬಿ ಹಿಡ್ಕೊಬೇಕು ಅನ್ನಿಸತ್ತೆ, ಹೀಗೆ ಜೀವನ ಪೂರ್ತಿ ಒಟ್ಟಿಗೆ ಇರ್ಬೇಕು ಅನ್ನಿಸ್ತಿರತ್ತೆ.

ಮೂಲ

13. ಬರಿ ಅದೇ ಅಂತಲ್ಲ, ಜಾಸ್ತಿ ಸುತ್ತಾಡ್ಬೇಕು ಅನ್ನೊಹಾಗೆ ಮಾಡ್ತಾಳೆ, ಬೇರೆ ಬೇರೆ ಹೋಟೆಲ್ಲಿಗೆ ಹೋಗಿ ಹೊಸ-ಹೊಸ ತಿಂಡಿ ಊಟ ಟ್ರೈ ಮಾಡ್ಬೇಕು ಅನ್ನಿಸೋ ಹಾಗೆ ಮಾಡ್ತಾಳೆ. ಪ್ರತಿ ಕ್ಷಣ ಜಗತ್ತು ಹೊಸದಾಗಿ ಕಾಣೋಹಾಗೆ ಮಾಡ್ತಾಳೆ. ನಿಮ್ಮ ಜೀವನ  ಇನ್ನು ಕುತೂಹಲಕಾರಿ ಆಗತ್ತೆ.

14. ನಿಮ್ಮ ಸ್ನೇಹಿತರಿಗೆ, ಮನೆಯವರಿಗೆಲ್ಲ ಅವಳನ್ನ ಪರಿಚಯ ಮಾಡ್ಸ್ ಬೇಕು ಅನ್ನಿಸತ್ತೆ. ಅವಳೆಷ್ಟು ಒಳ್ಳೇವ್ಳು ಅಂತ ನಿಮ್ಮ ಮನೆಯವರಿಗೆ ಖಂಡಿತ ಗೊತ್ತಾಗತ್ತೆ ಅಂತ ನಿಮಗನ್ನಿಸತ್ತೆ... ಅವ್ಳ ಗುಣ ಎಲ್ಲಾರ್ಗೂ ಹಿಡ್ಸೋ ಅಂತದ್ದು ಅಂತ ನಿಮ್ಗೆ ಎಷ್ಟರಮಟ್ಟಿಗೆ ಅನ್ನಿಸತ್ತೆ ಅಂದ್ರೆ ಕೆಲವೊಮ್ಮೆ ಇವಳನ್ನ ನನಗಿಂತ ಜಾಸ್ತಿ ನನ್ನ ಸ್ನೇಹಿತರೆ ಇಷ್ಟ ಪಡ್ತಿದಾರಲ್ಲಪ್ಪ ಅಂತ ಅನ್ನಿಸಿಬಿಡತ್ತೆ.

15. ನಿಮ್ಮ ಬಗ್ಗೆ ತುಂಬ ಕಾಳಜಿ ಮತ್ತೆ ಪ್ರೀತಿ ತೋರುಸ್ತಾಳೆ ಅವಳು, ಹೇಗೆ ಅಂತ ಹೇಳಕ್ಕಾಗಲ್ಲ. ದಿನ ನೀರ್ ಕುಡಿ ಅಂತ ಹೇಳೋದ್ರಿಂದ ನಿಮ್ಮ ಹುಟ್ಟು ಹಬ್ಬಕ್ಕೆ ಅದ್ಭುತವಾಗಿ ಒಂದು ಸುರ್ಪ್ರೈಸ್ ರೆಡಿ ಮಾಡೊತನ್ಕ ಎಲ್ಲ ಮಾಡಿರ್ತಾಳೆ... ನಿಮ್ಮನ್ನ ಯಾವಾಗ್ಲೂ ಖುಷಿಯಾಗಿ ನೋಡ್ಬೇಕು ಅನ್ನೋದು ಅವಳ ಆಸೆ ಆಗಿರತ್ತೆ.

16. ಅವ್ಳಿಗೆ ನಿಮ್ಮ ನಿಜವಾದ ಮುಖ ನೀವ್ ತೋರಿಸ್ತೀರ. ನಿಮಗೆ ಮೆಚ್ಚಿಸಕ್ಕೆ ನಾಟಕ ಆಡ್ಬೇಕು ಅಂತ ಅನ್ಸಲ್ಲ. ನೀವಾಗಿ ಅವಳೊಂದಿಗೆ ಆರಾಮಾಗಿ ಇರಬಹುದು. ನಿಮ್ಮ ಎಲ್ಲ ತುಂಟತನ ಮತ್ತೆ ತರ್ಲೆಗಳು ಅವ್ಳು ನಿಮ್ಮನ್ನ ಹೆಚ್ಚೆಚ್ಚು ಪ್ರೀತ್ಸೋ ಹಾಗೆ ಮಾಡತ್ತೆ. ಅವಳ ಜೊತೆ ನಿಮಗೆ ಯಾವ್ದೇ ಹಿಂಜರಿಕೆ ಇರಲ್ಲ.

ಮೂಲ

17. ಅವಳು ಸ್ವಂತಂತ್ರವಾಗಿ ತನ್ನ ಕೆಲಸ ತಾನು ಮಾಡ್ಕೊಂಡು ಇರೋಂತ ಹುಡುಗಿ ಆಗಿದ್ರು ಯಾವಾಗಾದ್ರೂ ಸಹಾಯ ಬೇಕು ಅನ್ಸಿದ್ರೆ, ನಿಮ್ಮನ್ನ ಕೇಳ್ತಾಳೆ. ನೀವು ಇಲ್ಲ ಅನ್ನಲ್ಲ ಅಂತ ಅವ್ಳಿಗೆ ಚೆನ್ನಾಗಿ ಗೊತ್ತಿರತ್ತೆ. ಯಾವತ್ತೂ ನಿಮಗೆ ಮೋಸ ಮಾಡಬೇಕು ಅನ್ನೋ ಯೋಚ್ನೆ ಇರಲ್ಲ.

18. ನಿಮಗೆ ಚೆನ್ನಾಗಿ ಗೊತ್ತಿರತ್ತೆ ಇವ್ಳು ಯಾವಾಗ್ಲೂ ಎಂತ ಸಮಯದಲ್ಲೂ ಜೊತೇಗೆ ಇರ್ತಾಳೆ ಅಂತ. ಕೆಲವೊಮ್ಮೆ ನಿಮಗೆ ಏನು ತೋಚದೇ, ಇನ್ನೇನು ದಾರಿ ಇಲ್ಲ ಅಂದಾಗ ಕೂಡ, ಇವಳು ನಿಮ್ಮನ್ನ ಬಿಡದೇ ಬೆನ್ನೆಲುಬಾಗಿ ನಿಲ್ತಾಳೆ ಅನ್ನಿಸತ್ತೆ.

19. ಯಾವುದೇ ಅನುಮಾನ ಇಲ್ಲದೆ ಕಣ್ಣು ಮುಚ್ಚಿಕೊಂಡು ಎಲ್ಲ ಸಮಯದಲ್ಲೂ ನಂಬಬಹುದು. ಅವಳು ಎಲ್ಲಿ, ಯಾರ್ ಜೊತೆ, ಯಾವ ಸಮಯದಲ್ಲಿ ಇದ್ದಳು, ಯಾಕೆ ಇದ್ದಳು ಅನ್ನೋದೆಲ್ಲ ನಿಮ್ಗೆ ದೊಡ್ಡ ವಿಷ್ಯ ಅನ್ಸದೇ ಇಲ್ಲ, ಅವ್ಳ ಬಗ್ಗೆ ಬಲವಾದ್ ನಂಬಿಕೆ ನಿಮ್ಗಿರತ್ತೆ. ನಿಮ್ಮ ಸಂಬಂದಾನೆ ಹಾಗೆ! ಇಬ್ಬರು ಒಬ್ಬರನ್ನ ಒಬ್ಬರು ಅಷ್ಟು ನಂಬ್ತೀರಿ, ಅಷ್ಟೇ ಗೌರವ ಕೊಡ್ತೀರಿ.

20. ಅವ್ಳು ಯಾವದಾದ್ರು ಕಾರಣಕ್ಕೆ ಬೇಜಾರಾಗಿದ್ರೆ ನಿಮಗೆ ತಡ್ಕೊಳಕ್ಕಾಗಲ್ಲ, ಯಾರಾದ್ರೂ ಬೇಜಾರ್ ಮಾಡಿದ್ರೆ ನೀವು ಅವ್ರನ್ನ ಸುಮ್ನೆ ಬಿಡಲ್ಲ. ಅವಳು ದುಃಖ ಪಡೋದನ್ನ ನಿಮಗೆ ಸಹಿಸಿಕೊಳಕ್ಕೆ ಆಗದೇ ಇಲ್ಲ.

ಮೂಲ

21. ನೀವು ನಿಮ್ಮ ಮುಂದಿನ ದಿನಗಳಿಗೆ ಅಂತ ಮಾಡಿದ ಎಲ್ಲ ಯೋಚನೆಲಿ ನಿಮಗೆ ಗೊತ್ತಿಲ್ಲದ ಹಾಗೆ ಅವಳನ್ನು ಸೇರಿಸಿಕೊಂಡಿರ್ತೀರ. ನೀವು ಸುತ್ತಾಡಬೇಕು ಅನ್ಕೊಂಡಿರೋ ಜಾಗ, ನೀವು ಮಾಡ್ಬೇಕು ಅನ್ಕೊಂಡಿರೋ ಸಾಹಸ, ಹೀಗೇ ಎಲ್ಲದ್ರಲ್ಲೂ ಅವ್ಳು ಇದ್ದೇ ಇರ್ತಾಳೆ...

22. ನಿಮಗೆ ಸರ್ವಸ್ವಾನು ಅವಳೇ ಆಗಿರ್ತಾಳೆ. ನೀವು ರಾತ್ರಿ ಮಲಗುವಾಗ ತೊಗೊಳೋ ಕೊನೆ ಹೆಸರು ಅವಳದ್ದೇ, ಬೆಳಗ್ಗೆ ಎದ್ದಾಗ ಹೇಳೋ ಮೊದಲನೇ ಹೆಸರು ಅವಳದ್ದೇ. ನಿಮ್ಮೆಲ್ಲ ತುಂಟಾಟದಲ್ಲಿ ಅವಳು ಇರ್ತಾಳೆ, ಅವಳ ಜೊತೆ ನಿಮ್ಮ ಜೀವನ ಪೂರ್ತಿ ಕಳೀಬೇಕು ಅಂತ ಅನ್ನಿಸತ್ತೆ. ಹೌದು ಅವಳೇ ನಿಮ್ಮ ಪ್ರೇಯಸಿ, ಅವಳೇ ನಿಮ್ಮ ನಿಜವಾದ ಸಂಗಾತಿ.

23. ನಿಮ್ಮ ಬದುಕು ಸಾರ್ಥಕ ಅಂತ ಅನ್ನಿಸೋದು, ಬದುಕಿಗೆ ಒಂದು ಅರ್ಥ ಅಂತ ಸಿಗೋದು, ಅವಳು ನಿಮ್ಮ ಜೊತೆ ಇದ್ದಾಗ ಮಾತ್ರ.

ಮೂಲ

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ: