ಜೀವನದಲ್ಲಿ ಆತಂಕ ಕಡಿಮೆ ಮಾಡ್ಕೊಳಕ್ಕೆ ನೀವು ಮಾಡಬೇಕಾಗಿರೋ ಕೆಲವು ಮುಖ್ಯವಾದ ಕೆಲಸಗಳಿವೆ ಕೇಳಿ

ಸೂಕ್ಷ್ಮ ಮನಸ್ಸಿನವರಿಗಂತೂ ಇದು ಬಹಳ ಮುಖ್ಯ

ಒಂದಲ್ಲಾ ಒಂದು ಸಂದರ್ಭದಲ್ಲಿ ಎಲ್ರೂ ಆತಂಕಕ್ಕೆ ಒಳಗಾಗಿರ್ತೀವಿ. ಇನ್ನೇನಾಗುತ್ತದೋ ಏನೋ ಅನ್ನೋ ಗಾಬರಿಯನ್ನ ನಮ್ಮಲ್ಲಿ ಉಂಟು ಮಾಡುತ್ತೆ ಆತಂಕ. ಒಬ್ಬ ಹುಡುಗ/ಹುಡುಗಿಗೆ ಪ್ರಪೋಸ್ ಮಾಡ್ಬೇಕು, ಕೆಲಸಕ್ಕೆ ಇಂಟರ್‌ವ್ಯೂಗೆ ಹೋಗಬೇಕು... ಇಂತ ಸಂದರ್ಭಗಳಲ್ಲಿ ಸಹಜವಾಗೇ ಅಂಗೈಯಲ್ಲಿ ಸಣ್ಣಗೆ ಬೆವರು, ಎದೆ ಡವಡವ ಅಂತ ಬಡ್ಕೊಳೋದು ಎಲ್ಲಾ ಆಗುತ್ತೆ. ಮನಸ್ಸಲ್ಲಿ ಆತಂಕ ಇದ್ದಾಗ ಸರಿಯಾಗಿ ನಿದ್ದೆ ಬರಲ್ಲ, ನೆಮ್ಮದಿ ಇರಲ್ಲ, ಯಾವ ಕೆಲಸಾನೂ ಸರಿಯಾಗಿ ಮಾಡಕ್ಕಾಗಲ್ಲ. ಅದರಲ್ಲೂ ತುಂಬಾ ಸೂಕ್ಷ್ಮ ಮನಸ್ಸಿನವರಾದ್ರೆ ಇನ್ನೂ ಕಷ್ಟ. ಆತಂಕ ಕಡಿಮೆ ಮಾಡ್ಕೊಳ್ಳೋದೆಂಗೆ? ಇಲ್ಲಿದೆ ನೋಡಿ 10 ಉಪಾಯ.

1. ನಿಮ್ಮನ್ನ ನೀವು ಕೀಳಾಗಿ ಕಾಣೋದು ನಿಲ್ಲಿಸಿ

ಮನಸ್ಸಲ್ಲಿ ಒಳ್ಳೇ ಆಲೋಚನೆಗಳನ್ನ ಮಾಡೋದ್ರಿಂದ್ಲೂ ಆತಂಕದಿಂದ ಹೊರಗ್ ಬರ್ಬೋದು. ನಿಮ್ಮಲ್ಲಿರೋ ಬೇರೆ ಗುಣಗಳನ್ನ ಗುರುತಿಸ್ಕೊಳ್ಳಿ. ಉದಾಹರಣೆಗೆ ಹೇಳ್ಬೇಕು ಅಂದ್ರೆ ಬೇರೆಯವರ ಬಗ್ಗೆ ತುಂಬಾ ಅನುಕಂಪ ಇರುತ್ತೆ, ಇಲ್ಲಾ ನಿಮ್ಮಲ್ಲಿ ಒಳ್ಳೇ ಕ್ರಿಯೇಟೀವ್ ಆಲೋಚನೆ ಇರುತ್ತೆ. ಅವುಗಳ ಕಡೆ ಗಮನ ಕೊಡೋದ್ರಿಂದ, ಅಥವಾ ಏನಾದರೂ ಹೊಸಾದು ಕಲೀಯೋದ್ರಿಂದ ಆತಂಕ ಕಡಿಮೆ ಆಗುತ್ತೆ.

2. ಆತಂಕ ಅನ್ನೋದು ಕ್ಷಣಿಕ ಅಂತ ಅರ್ಥ ಮಾಡ್ಕೊಳಿ

ಈವತ್ತಿದ್ದಂಗೆ ಇನ್ನೊಂದ್ ದಿನ ಇರಲ್ಲ. ವಾತಾವರಣಾನ್ನೂ ಅಷ್ಟೇ ಕ್ಷಣಕ್ಷಣಕ್ಕೂ ಬದಲಾಗ್ತಾನೇ ಇರತ್ತೆ. ಇಲ್ಲಿ ಯಾವುದೂ ಶಾಶ್ವತ ಅಲ್ಲ. ಆತಂಕನೂ ಅಷ್ಟೇ ಕ್ಷಣಿಕ. ಆತಂಕ, ಭಯ, ಗಾಬರಿ ಜಾಸ್ತಿ ಮಾಡ್ಕೊಳ್ಳೋದ್ರಿಂದ ನಿಮ್ಮ ಅಂತಃಶಕ್ತಿಯನ್ನೇ ಅಲ್ಲಾಡಿಸಿಬಿಡುತ್ತೆ. "ಈ ಜಗತ್ತಿನಲ್ಲಿ ಯಾವುದೂ ಶಾಶ್ವತ ಅಲ್ಲ, ನಮ್ಮ ಸಮಸ್ಯೆಗಳೂ ಅಷ್ಟೇ'' ಅಂತ ಚಾರ್ಲಿ ಚಾಪ್ಲಿನ್ ಹೇಳಿದ ಮಾತನ್ನ ಜ್ಞಾಪಕ ಇಟ್ಕೊಳ್ಳಿ.

3. ಯಾತಕ್ಕೆ ಆತಂಕ ಪಟ್ಕೊಂಡಿದೀರಿ ಅಂತ ಯಾರ ಹತ್ತಿರ ಆದ್ರೂ ಹೇಳ್ಕೊಳಿ

ಆತಂಕ ಅನ್ನೋದು ಏಕಾಂತವಾದ ಅನುಭವ. ಎಷ್ಟು ಏಕಾಂಗಿಯಾಗಿರ್ತಾರೋ ಅಷ್ಟು ಆತಂಕ ಜಾಸ್ತಿ ಆಗುತ್ತೆ ಅನ್ನೋದು ಗೊತ್ತಿರ್ಲಿ. ನಿಮ್ಮ ಆತಂಕಕ್ಕೆ ಕಾರಣ ಏನು, ಯಾವ ವಿಚಾರವಾಗಿ ಆತಂಕ ಪಡ್ತಿದ್ದೀರಾ ಅನ್ನೋದನ್ನ ನಿಮ್ಮ ಆತ್ಮೀಯರ ಹತ್ತಿರ ಹೇಳ್ಕೊಳ್ಳಿ. ಹಾಗಂತ ಯಾರಯಾರ ಹತ್ರಾನೋ ಹೇಳ್ಕೊಂಡ್ರೆ ಆತಂಕ ಕಡಿಮೆ ಆಗಲ್ಲ. ನಿಮ್ಮ ಬಗ್ಗೆ ಅವರಿಗೆ ಚೆನ್ನಾಗಿ ಗೊತ್ತಿರ್ಬೇಕು. ನಿಮ್ಮನ್ನ ಅರ್ಥ ಮಾಡ್ಕೊಳ್ಳೋ ಅಂತಾವ್ರು ಆಗಿರ್ಬೇಕು ಅಷ್ಟೇ.

4. ಯಾರಿಂದ ನಿಮಗೆ ಆತಂಕ ಆಗ್ತಿದೆ ಅಂತ ಗುರುತಿಸಿಕೊಳ್ಳಿ

ಕೆಲವು ಸಂಬಂಧಗಳೇ ನಿಮ್ಮ ಆತಂಕಕ್ಕೆ ಕಾರಣ ಅನ್ನೋದಾದ್ರೆ ಅದನ್ನ ಸೀರಿಯಸ್ಸಾಗಿ ಆಲೋಚನೆ ಮಾಡ್ಲೇಬೇಕು. ಒಬ್ರಿಂದ ನಿಮಗೆ ತುಂಬಾ ಆತಂಕ ಆಗ್ತಿದೆ ಅಂದ್ರೆ ಅಂತಹ ಸಂಬಂಧ ಕಡಿದುಕೊಳ್ಳೋದೆ ಉತ್ತಮ. ಅದರ ಬಗ್ಗೆ ಏನ್ ಬೇಜಾರ್ ಮಾಡ್ಕೋಬೇಡಿ.

5. ಸಮಸ್ಯೆ ಎದುರಿಸಿ... ಓಡೋಗ್ಬೇಡಿ

ನಿಮ್ಮ ಆತಂಕಕ್ಕೆ ಕಾರಣ ಆಗಿರೋ ವಿಚಾರ ಅಥವಾ ವ್ಯಕ್ತಿಯಿಂದ ದೂರ ಸರಿಯೋದ್ರಿಂದ ಆತಂಕ ಇನ್ನೂ ಜಾಸ್ತಿ ಆಗತ್ತೆ ಹೊರತು ಕಡಿಮೆಯಂತೂ ಆಗಲ್ಲ. ಅದೇನಾಗುತ್ತೋ ನೋಡೇ ಬಿಡೋಣ ಅಂತ ಎದ್ ನಿಂತ್ಕೊಳ್ಳಿ. ಸಮಸ್ಯೇನ ಫೇಸ್ ಮಾಡಿ. ಆತಂಕ ಅನ್ನೋದು ಆ ಕ್ಷಣದಲ್ಲಿ ಆಗೋಂತ ಭಯ ಅಷ್ಟೇ. ನೀವು ಆತಂಕದಲ್ಲೇ ಒದ್ದಾಡ್ತಾ ಇದ್ರೆ ಏನೂ ಮಾಡಕ್ಕಾಗಲ್ಲ. ಸಮಸ್ಯೇನ ಎದುರಿಸ್ದಾಗ್ಲೇ ಆತಂಕದಿಂದ ಹೊರಗ್ ಬರೋಕ್ ಸಾಧ್ಯ.

6. ಒಂದೊಂದ್ಸಲ ಏನ್ ಆಗಬೇಕು ಅಂತಿರುತ್ತೋ ಅದು ಆಗೇ ಆಗುತ್ತೆ, ತಪ್ಸಕ್ಕಾಗಲ್ಲ ಅಂತ ಮರೀಬೇಡಿ

ಆಗಲೇ ಬೇಕು ಅಂತಿದ್ರೆ ಅದನ್ನ ಯಾರ್ ಕೈಲೂ ತಪ್ಸೋಕಾಗಲ್ಲ. ಆದ್ರೆ ಆ ಸಂದರ್ಭದಲ್ಲಿ ನೀವ್ ಹೆಂಗ್ ರಿಯಾಕ್ಟ್ ಮಾಡ್ತೀರ ಅನ್ನೋದು ನಿಮ್ ಕೈಯಲ್ಲೇ ಇದೆ. ಆತಂಕ ಜಾಸ್ತಿ ಮಾಡ್ಕೊಳ್ಳೋದು ಬಿಡೋದು ಅಷ್ಟೇ. ''ಒತ್ತಡದಿಂದ ನಾವ್ಯಾರೂ ಸಾಯಲ್ಲ, ಅದಕ್ಕೆ ನಾವು ಹೇಗೆ ರಿಯಾಕ್ಟ್ ಮಾಡ್ತೀವಿ ಅನ್ನೋದ್ರೆ ಮೇಲೆ ಅದು ಅವಲಂಭಿಸಿದೆ'' ಅಂತ ಸ್ಟ್ರೆಸ್ ಸಂಶೋಧನೆಯ ಪಿತಾಮಹ  ಡಾ.ಹನ್ಸ್ ಸೆಲ್ಯೇ ಹೇಳಿರೋ ಮಾತನ್ನ ಗಮನಿಸಿ.

7. ಆತಂಕ ಮಾಡ್ಕೊಳೋದ್ರಿಂದ ಏನೂ ಸಾಧಿಸಕ್ಕಾಗಲ್ಲ ಅನ್ನೋದು ಮರೀಬೇಡಿ

ಆತಂಕದಿಂದ ಗುರಿ ಮುಟ್ಟಕ್ಕಾಗಲ್ಲ. ಆತಂಕ ಪಡ್ತಾ ಪಡ್ತಾ ಆರೋಗ್ಯ ಕೆಡುತ್ತೆ. ಇದ್ರಿಂದ ಸಮಯ ಹಾಳಾಗುತ್ತೆ ಹೊರತು, ಜೀವನದಲ್ಲಿ ಏನನ್ನೂ ಸಾಧಿಸಕ್ಕೆ ಆಗಲ್ಲ. ಆತಂಕದಿಂದ ಜೀವನದಲ್ಲಿ ನಷ್ಟಾನೇ ಹೊರತು ಲಾಭ ಅಂತೂ ಇಲ್ಲ. ಆದ್ರಿಂದ ಆತಂಕವನ್ನ ಅಲ್ಲೇ ಬಿಟ್ಟು..ಮುಂದೆ ನಡಿಯೋದೆ ಜಾಣರ ಲಕ್ಷಣ.

8. ಪ್ರಾಣಾಯಾಮ, ಧ್ಯಾನ, ವ್ಯಾಯಾಮದಿಂದ ಮನಸ್ಸು ಪ್ರಶಾಂತವಾಗಿಟ್ಕೊಳ್ಳಿ

ದೀರ್ಘವಾಗಿ ಉಸಿರೆಳೆದ್ಕೊಳ್ಳಿ, ಸ್ವಲ್ಪ ಹೊತ್ತು ಹಾಗೇ ಬಿಗಿಹಿಡ್ದು ಆಮೇಲೆ ನಿಧಾನವಾಗಿ ಉಸಿರನ್ನ ಹೊರಗ್ ಬಿಡಿ. ಇದ್ರಿಂದ ಮನಸ್ಸಿನ ಭಾರ ಕಡಿಮೆ ಆಗುತ್ತೆ. ಒಂದ್ ಕಪ್ ಕಾಫಿ ಕುಡೀರಿ. ವ್ಯಾಯಾಮ ಮಾಡಿ, ಯೋಗ ಧ್ಯಾನ ಪ್ರಾಣಾಯಾಮ ಮಾಡಿ. ಇದ್ರಿಂದ ನಿಮ್ಮ ದೇಹ ಮನಸ್ಸು ಆತಂಕದಿಂದ ಹೊರಗ್ ಬರುತ್ತೆ. ಆತಂಕ ಜಾಸ್ತಿ ಆದಷ್ಟೂ ನಮ್ ದೇಹದಲ್ಲಿ ಅಡ್ರೆನಾಲಿನ್ ಪ್ರಮಾಣ ಜಾಸ್ತಿ ಆಗುತ್ತೆ. ವ್ಯಾಯಾಮ ಅದನ್ನ ಕರಗಿಸುತ್ತೆ. ಬೆಚ್ಚಗಿರೋ ನೀರಲ್ಲಿ ಹಿತವಾದಂತ ಒಂದ್ ಸ್ನಾನ ಮಾಡಿ. ಒಳ್ಳೇ ಸಂಗೀತ ಕೇಳಿ. ಇಂಟರ್-ನೆಟ್ಟಲ್ಲಿ ಜಾಲಾಡಿ, ನಿಮಗಿಷ್ಟವಾಗಿರೋ ಸಿನಿಮಾ ನೋಡಿ. ರಿಲ್ಯಾಕ್ಸ್ ಆಗೋದಕ್ಕೆ ಏನೋ ಒಂದು ಮಾಡಿ. ಆತಂಕಪಡ್ತಾ ಮಾತ್ರ ಕೂರ್ಬೇಡಿ.

9. ನಿಮ್ಮ ಆರೋಗ್ಯಕ್ಕಿಂತ ಯಾವುದೂ ಮುಖ್ಯ ಅಲ್ಲ ಅನ್ನೋದು ಗಮನದಲ್ಲಿ ಇರಲಿ

ನಿಜವಾದ ಸಮಸ್ಯೆ ಏನು ಅನ್ನೋದನ್ನ ಮೊದಲು ತಿಳ್ಕೊಳ್ಳಿ. ಸುಮ್ನೆ ಮನಸ್ಲನ್ನೇ ಹಂಗಾಗಿರತ್ತೆ, ಹಿಂಗಾಗಿರುತ್ತೆ ಅಂತ ಕಲ್ಪಿಸಿಕೊಳ್ಳೋದ್ರಿಂದ ಸಮಸ್ಯೆ ಇನ್ನಷ್ಟು ದೊಡ್ದದಾಗಿ ಕಾಣಾಕೆ ಶುರುವಾಗುತ್ತೆ. ಯಾವ ಸಮಸ್ಯೇನು ನಾವು ಊಹಿಸಿಕೊಂಡಷ್ಟು ದೊಡ್ಡದಾಗಿರಲ್ಲ. ಆರೋಗ್ಯಕ್ಕಿಂತ್ಲೂ ಯಾವುದೂ ಮುಖ್ಯ ಅಲ್ಲ. ಆತಂಕ, ಭಯ, ಒತ್ತಡ ಅನ್ನೋದು ವಿಷ ಇದ್ದಂತೆ ಅನ್ನೋದು ಗಮನದಲ್ಲಿರ್ಲಿ.

10. ಹಿಂದೇನೂ ನಿಮಗೆ ಆತಂಕ ಆಗಿತ್ತು, ಆಗಲೂ ನೀವು ಗೆದ್ದು ಹೊರಗೆ ಬಂದಿದ್ರಿ ಅಂತ ನೆನಪಿಸಿಕೊಳ್ಳಿ

ಯಾವತ್ತೂ ಆತಂಕ ಆಗಿದ್ದಾಗ ಅದರಿಂದ ಹೊರಗೆ ಬರಕ್ಕೇ ಆಗಲ್ವೇನೋ‌ ಅನ್ನಿಸ್ತಾ ಇರುತ್ತೆ. ಆದರೆ ನಿಮಗೇ ಎಷ್ಟೋ‌ ಸಲ ಎಂತೆಂಥದೋ ಆತಂಕಗಳಿಂದ ಹೊರಗೆ ಬಂದಿರೋ ಅನುಭವ ಇರುತ್ತೆ. ಬೇಕಾದರೆ ಯೋಚಿಸಿ ನೋಡಿ. ಹಾಗೇ ಈ ಸಲಾನೂ ಕಡೆಗೆ ಎಲ್ಲಾ ಸರಿ ಹೋಗುತ್ತೆ. ಯಾಕೆ ಅಂತೀರಾ? ಯಾಕಂದ್ರೆ ಈ ಆತಂಕಗಳೆಲ್ಲ ಬರೋದೇ‌ ನಿಮ್ನ ಪರೀಕ್ಷಿಸೋದಕ್ಕೆ. ನೀವು ಗೆದ್ದೇ ಗೆಲ್ತೀರಿ. ಪ್ರಯತ್ನ ಮಾಡಬೇಕಷ್ಟೆ.

ಇಷ್ಟು ಮಾಡುದ್ರೆ ನಿಮ್ಮ ಆತಂಕ ಎಷ್ಟು ಹೊತ್ತು ಉಳಿಯುತ್ತೆ? ಯೋಚನೆ ಮಾಡಿ. ಹೀಗೆ ಮಾಡೋದು ಬಿಟ್ಟು ಏನೂ ತೋಚ್ತಾ ಇಲ್ಲ ಅಂತ ಕೂತ್ಕೊಂಡ್ರೆ ಕೂತ್ಕೊಂಡೇ ಇರ್ತೀರಿ... ಏಳಿ, ಎದ್ದೇಳಿ!

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ:

ಈ 10 ಚಿಕ್ಕ ಚಿಕ್ಕ ಬದಲಾವಣೆ ಮಾಡ್ಕೊಂಡ್ರೆ ನಿಮ್ಮ ಜೀವನ ದೊಡ್ಡ ರೀತೀಲಿ ಬದಲಾಗತ್ತೆ ಅನ್ನೋದ್ರಲ್ಲಿ ಸಂದೇಹಾನೆ ಇಲ್ಲ

ಒಂದೊಂದ್ಸರ್ತಿ ಊಹೂಂ ಅನ್ನೋಕ್ಕೂ ಗೊತ್ತಿರ್ಬೇಕು

ಜೀವನ ಅದರ ಎಲ್ಲ ರೂಪದಲ್ಲೂ ಕೆಲವೊಮ್ಮೆ ನಮಗೆ ಎಷ್ಟು ಮಾಡಿದ್ರೂ ಅಷ್ಟೇ ಅನ್ನೋ ಭಾವನೆ ಬರೋಹಾಗೆ ಮಾಡಬಹುದು. ಆದ್ರೆ ಜೀವನದಲ್ಲಿ ಒಂದೊಂದ್ಸರ್ತಿ ಎಷ್ಟೇ ಕಷ್ಟ ಬಂದ್ರೂ ಮನಸ್ಸಿದ್ದರೆ ಮಾರ್ಗ ಇದ್ದೇ ಇದೆ ಅನ್ನೋದು ನೆನಪಿರ್ಲಿ.

ಈ 10 ವಿಷಯದ ಬಗ್ಗೆ ಗಮನ ಕೊಟ್ರೆ ನಿಮ್ಮ ಜೀವನ ಬದಲಾಯಿಸಿಕೊಳ್ಳೋದಕ್ಕೆ ಸಹಾಯ ಆಗುತ್ತೆ. ಆದ್ರೆ ಒಂದು ನೆನಪಿರ್ಲಿ... ಇವೆಲ್ಲಾ ಝಟ್ ಪಟ್ ಅಂತ ಆಗೋ ಬದಲಾವಣೆಗಳಲ್ಲ... ಸಮಯ ಹಿಡಿದೇ ಹಿಡಿಯತ್ತೆ. ಆದ್ರೆ ಕೊನೇಲಿ ಖುಷಿಯಾಗೋದು ಖಂಡಿತಾ. 

1. ಬೆಳಗ್ಗೆ ಲೇಟಾಗಿ ಏಳೋ ಬದ್ಲು ಬೇಗ ಏಳೋ ಅಭ್ಯಾಸ ಮಾಡ್ಕೊಳಿ

ಹಲವಾರು ಸಂಶೋಧನೆ, ಅಧ್ಯಯನಗಳಿಂದ ಗೊತ್ತಾಗಿರೋದು ಏನಪ್ಪಾ ಅಂದ್ರೆ ಬೆಳಗ್ಗೆ ಬೇಗ ಎದ್ದವರು ಬೇರೆಯವರಿಗಿಂತ ಕೆಲಸ ತುಂಬಾ ಚೆನ್ನಾಗಿ ಮಾಡ್ತಾರೆ, ತುಂಬಾ ಖುಷಿಯಾಗೂ ಇರ್ತಾರೆ ಅಂತ. ದಿನದಲ್ಲಿ ಕೆಲವೇ ಗಂಟೆಗಳು ನಮಗೆ ಸಿಗೋದು, ಅದ್ರಲ್ಲಿ ನಿದ್ದೆಯಲ್ಲೇ ಹೆಚ್ಚು ಸಮಯ ಹಾಳಾದ್ರೆ ನಿಮಗೆ ಬೇರೆದಕ್ಕೆ ಇನ್ನೆಲ್ಲಿಂದ ಟೈಮ್ ಸಿಗುತ್ತೆ?

ಇನ್ನು ನಿಮ್ಮ ಆಫೀಸ್ 24 ಗಂಟೇನೂ ಕೆಲಸ ಮಾಡೊತರದ್ದಾದ್ರೆ, ಬೆಳಗ್ಗೆ ಬೇಗ ಹೋಗಿ, ಬೇಗ ವಾಪಸ್ ಬಂದ್ರೆ ನಿಮ್ಮ ಸ್ವಂತಕ್ಕೆ, ಮನೆಯವರ ಜೊತೆ ಕಳೆಯೋದಕ್ಕೆ... ಹೀಗೆ ಎಲ್ಲದಕ್ಕೂ ನಿಮಗೆ ಸಾಕಷ್ಟು ಟೈಮ್ ಸಿಗುತ್ತೆ.

ಮೂಲ

2. ಎಲ್ಲದಕ್ಕೂ ಸರಿ, ಆಯ್ತು, ಮಾಡ್ತೀನಿ ಅಂತ ಒಪ್ಕೊಳೋ ಬದ್ಲು ಆಗಾಗ ಇಲ್ಲ, ಮಾಡಕ್ಕಾಗಲ್ಲ ಅಂತ ಹೇಳೋ ಅಭ್ಯಾಸ ಬೆಳೆಸ್ಕೊಳಿ

ಎಲ್ಲ ಟೈಮಲ್ಲೂ ಸರಿ, ಆಯ್ತು , ಮಾಡ್ತೀನಿ ಅಂತ ಒಪ್ಕೋಳೋದು ಸರಿಯಲ್ಲ. ಹೀಗೆ ಒಪ್ಕೋಳೋದ್ರಿಂದ ನಿಮ್ಮ ಮಾಡ್ಬೇಕಾಗಿರೋ ಕೆಲಸದ ಪಟ್ಟಿಗೆ ಇನ್ನಷ್ಟು ಸೇರುತ್ತೆ, ಕೆಲಸದಲ್ಲಿ ಎಷ್ಟು ಮುಳುಗಿ ಹೋಗ್ತೀರಾ ಅಂದ್ರೆ ನಿಮಗೆ ಅಂತ ಸ್ವಲ್ಪ ಬಿಡುವು ಮಾಡ್ಕೊಳೋದು ತುಂಬಾ ಕಷ್ಟ ಆಗುತ್ತೆ.

ಆಗಾಗ ಸಮಯಕ್ಕೆ ತಕ್ಕಂತೆ ನೀವು ಇಲ್ಲ, ಆಗಲ್ಲ, ಅಂತ ಹೇಳೋ ರೂಢಿ ಮಾಡ್ಕೊಂಡ್ರೆ ಅನವಶ್ಯಕವಾಗಿ ನೀವು ಹೇಳಿದ್ದಕ್ಕೆಲ್ಲ ಒಪ್ಪಿಕೊಂಡು ಕೆಲಸ ಮಾಡ್ತೀರಾ ಅಂತ ಗೊತ್ತಿದ್ದೇ ನಿಮಗೆ ಕೆಲಸ ಹೇಳ್ತಾರಲ್ಲ... ಅದೆಲ್ಲಾ ನಿಲ್ಲುತ್ತೆ. ನಿಮ್ಮ ಕೆಲಸ, ಟೈಮ್ ಎಲ್ಲ ನಿಮ್ಮ ನಿಯಂತ್ರಣದಲ್ಲಿರುತ್ತೆ.

3. ಯಾವಾಗ್ಲೂ ಕೈಯ್ಯಲ್ಲಿ ಮೊಬೈಲ್ ಫೋನ್ ಹಿಡ್ಕೊಂಡು ಕೂರೋ ಬದ್ಲು ಹೊರಗೆ ಹೋಗಿ ಸುತ್ತಾಡ್ಕೊಂಡು ಬನ್ನಿ

ಈಗಿನ ಟೆಕ್ನಾಲಜಿಯಿಂದ ನಮಗೆ ತುಂಬಾನೇ ಉಪಯೋಗ ಆಗಿದೆ. ಆದ್ರೆ ಇತ್ತೀಚಿಗೆ ನಾವು ಅದ್ರಲ್ಲಿ ಎಷ್ಟು ಮುಳ್ಗಿರ್ತಿವಿ ಅಂದ್ರೆ ಅದು ಇಲ್ಲ ಅಂದ್ರೆ ನಮಗೆ ಕೈಕಾಲೇ ಓಡಲ್ಲ ಅನ್ನೋ ಹಾಗೆ ಆಡ್ತೀವಿ. ಅದ್ರಲ್ಲೂ ಈ ಸ್ಮಾರ್ಟ್ ಫೋನ್ ಬಂದ್ಮೇಲಂತೂ ನೆಟ್ವರ್ಕ್ ಸಿಕ್ಕಿಲ್ಲ, ಇಂಟರ್ನೆಟ್ ಕನೆಕ್ಟ್ ಆಗ್ತಿಲ್ಲ ಅಂದ್ರೆ ಏನೋ ಕಳ್ಕೊಂಡಿರೋವ್ರ ಹಾಗೆ ಪರದಾಡ್ತಿವಿ ( ನಮ್ಮ ಹತ್ತಿರದವರು ದೂರ ಆದಾಗ್ಲೂ ಹೀಗೆ ನಾವು ಆಡಿರಲ್ವೇನೋ). ಈ ಮೊಬೈಲ್ ಹತ್ತಿರ ಇದ್ದಷ್ಟೂ ನಾವು ಆಗಾಗ ಅದನ್ನ ನೋಡೋದು, ಅಲ್ಲೇನಾಗ್ತಿದೆ, ಇಲ್ಲೇನಾಗ್ತಿದೆ ಅಂತ ಹುಡುಕಾಡೊ ಪ್ರಯತ್ನ ಮಾಡ್ತಾ ಇರ್ತೀವಿ.

ಆಗಾಗ ಈ ಮೊಬೈಲ್ ಮನೇಲೆ ಬಿಟ್ಟು ಕನಿಷ್ಠ 10 -15 ನಿಮಿಷನಾದ್ರೂ ಪ್ರಶಾಂತವಾಗಿರೋ ಜಾಗಕ್ಕೆ ಹೋಗಿ ಸುತ್ತಾಡಿಕೊಂಡು ಬನ್ನಿ. ನೀವು ಇಲ್ಲಿವರ್ಗೂ ಯೋಚನೆ ಮಾಡಿರದ ವಿಚಾರಗಳು ನಿಮಗೆ ಹೊಳೆಯುತ್ತೆ. ಈ ವಿಷಯಗಳು ನಿಮ್ಮ ತಲೆಗೆ ಹೋದಾಗ ನೀವು ಯೋಚನೆ ಮಾಡೋ ರೀತೀನೂ ಬದ್ಲಾಗತ್ತೆ. ಇದು ನಿಮಗೆ ಒಂಥರಾ ಖುಷಿ, ಉತ್ಸಾಹ ತುಂಬುತ್ತೆ.

ಮೂಲ

4. ನಿಮ್ಮನ್ನ ನೀವು ತೆಗಳ್ಕೊಳೋ ಬದ್ಲು ಹೊಗಳ್ಕೊಳಿ

ಸ್ವಯಂ ಟೀಕೆ ಒಂದು ಒಳ್ಳೆ ಸ್ವಭಾವಾನೆ, ಯಾಕೆ ಅಂದ್ರೆ ನಿಮ್ಮನ್ನ ನೀವು ಟೀಕೆ ಮಾಡ್ಕೊಳ್ತಾ ಇದ್ರೆ ನಿಮಗೆ ಸಿಕ್ಕ ಸಣ್ಣ ಪುಟ್ಟ ಗೆಲುವಿಗೇ ಸುಮ್ಮನಿದ್ದು ವಿಶ್ರಾಂತಿ ತೊಗೊಳಕ್ಕೆ ಅದು ಬಿಡಲ್ಲ, ಯಾವಾಗ್ಲೂ ಇನ್ನೂ ಮುಂದೆ ಸಾಗೋ ಹಾಗೆ ಮಾಡತ್ತೆ.

ಆದ್ರೆ ಬರಿ ಟೀಕೆ ಮಾಡ್ತಿದ್ರೆ ಆಗಲ್ಲ, ನೀವು ನಿಮ್ಮ ಸಾಧನೆ, ಯಶಸ್ಸಿನ ಬಗ್ಗೆ ಹೆಮ್ಮೆ ಪಟ್ಕೊಳಕ್ಕೆ ಆಗಾಗ ಹೊಗಳಿಕೇನೂ ಬೇಕು. ಇಲ್ಲ ಅಂದ್ರೆ ನಿಮ್ಮ ಸಾಧನೆ ಬಗ್ಗೆ ನಿಮಗೆ ಮೆಚ್ಚುಗೆ, ಸಮಾಧಾನ ಏನೂ ಇರಲ್ಲ.

5. ರಜಾ ಅಂತ ಹೆಚ್ಚು ಮಲ್ಕೊಳೋ ಬದ್ಲು ಬೇಗ ಎದ್ದು ವ್ಯಾಯಾಮ ಮಾಡಿ

ಬಾಕಿದಿನ ಎಲ್ಲ ಬೇಗ ಎದ್ದು ಹೋಗ್ತೀವಿ, ಇವತ್ತಾದ್ರೂ ಜಾಸ್ತಿ ಮಲಗೋಣ ಅಂತ ಮಲಗೋದು ಬಿಡಿ. ಈ ರಜಾ ದಿನದ ಅದ್ರಲ್ಲೂ ವಾರಾಂತ್ಯದ 48 ಗಂಟೆ ತುಂಬಾನೇ ಮುಖ್ಯ. ಅದು ನಿಮಗೆ ಅಂತ ಇರೋ ಟೈಮ್. ಅದರ ಉಪಯೋಗ ಸರಿಯಾಗಿ ಮಾಡ್ಕೊಳಿ.

ಮಲಗಿ ಸಮಯ ಹಾಳುಮಾಡದೆ ಬೇರೆ ದಿನ ಮಾಡಕ್ಕೆ ಆಗದಿದ್ದ ವ್ಯಾಯಾಮ ಮಾಡಿ, ಬೇಗೆ ತಿಂಡಿ ಊಟ ಮುಗಿಸಿದ್ರೆ ಸಂಜೆ ಹೊತ್ತು ನಿಮ್ಮ ಮನೆಯವರ, ಸ್ನೇಹಿತರ ಜೊತೆ ಆರಾಮಾಗಿ ಇರೋದಕ್ಕೆ ಸಮಯ ಸಿಗುತ್ತೆ. ಲೇಟಾಗಿ ಇದ್ದಷ್ಟೂ ಸಮಯ ಕಮ್ಮಿ ಸಿಗುತ್ತೆ.

ಮೂಲ

6. ಕೂಲ್ ಡ್ರಿಂಕ್ಸ್ ಬದ್ಲು ನೀರು ಕುಡಿಯೋ ಅಭ್ಯಾಸ ಮಾಡ್ಕೊಳಿ

ಇತ್ತೀಚೆಗಂತೂ ಎಲ್ಲರೂ ಈ ಕೂಲ್ ಡ್ರಿಂಕ್ಸ್ ಕುಡಿಯೋದು ಹೆಚ್ಚು. ಇದ್ರಿಂದ ಸಕ್ಕರೆ ಕಾಯಿಲೆನೂ ಬರೋದು ಹೆಚ್ಚಾಗಿದೆ. ಅಷ್ಟೇ ಅಲ್ಲ ನಿಮ್ಮ ಹಲ್ಲು ಹಾಳು ಮಾಡೋದ್ರಲ್ಲೂ ಇದು ಎತ್ತಿದ ಕೈ. ಒಂದು ಅಧ್ಯಯನದ ಪ್ರಕಾರ, ಪ್ರತಿ 10 ಜನರಲ್ಲಿ ಒಬ್ರಿಗೆ  ಈ ಕೂಲ್ ಡ್ರಿಂಕ್ಸ್ ಕುಡಿಯೋದ್ರಿಂದ ಸಕ್ಕರೆ ಕಾಯಿಲೆ ಬಾರೋ ಸಾಧ್ಯತೆ ಹೆಚ್ಚಾಗ್ತಿದೆಯಂತೆ. ಅದನ್ನ ಬಿಟ್ಟು ನೀರು ಕುಡಿಯೋ ಅಭ್ಯಾಸ ಮಾಡ್ಕೊಳಿ.

ಇದ್ರಿಂದ ನಿಮ್ಮ ಹಲ್ಲು ಚೆನ್ನಾಗಿರೋದು ಮಾತ್ರ ಅಲ್ಲ, ಚರ್ಮದ ಆರೋಗ್ಯಕ್ಕೂ ಒಳ್ಳೇದು. ಈ ಕಾರಣಗಳು ನಿಮಗೆ ಕೂಲ್ ಡ್ರಿಂಕ್ಸ್ ಬಿಡೋದಕ್ಕೆ ಸರಿಯಾದದ್ದಲ್ಲ ಅನ್ನಿಸಿದ್ರೆ, ಒಂದು ಹಲ್ಲನ್ನ ಈ ಕೂಲ್ ಡ್ರಿಂಕ್ಸ್ ಒಳಗೆ ಹಾಕಿ ಒಂದು ರಾತ್ರಿ ಇಡೀ ಇಟ್ಟು ಮರುದಿನ ನೋಡಿ, ಅದರ ಗತಿ ಏನಾಗಿರುತ್ತೆ ಅಂತ ತಿಳ್ಕೊಂಡು ಆಮೇಲೆ ನೀವೇ ನಿರ್ಧಾರ ಮಾಡ್ಕೊಳಿ.

7. ಹಿಂದೆ ಆಗಿದ್ದನ್ನ ನೆನಸ್ಕೊಂಡು ಕೊರಗೋ ಬದ್ಲು ಮುಂದೆ ಏನ್ ಮಾಡ್ಬೋದು ಅಂತ ಪ್ಲಾನ್ ಮಾಡಿ

ಹಿಂದಿನ ನೆನಪುಗಳು ಎಷ್ಟೇ ನಮಗೆ ಖುಷಿ ಕೊಡುವಂತದ್ದಾಗಿದ್ರೂ ಅದ್ರಲ್ಲೇ ಮುಳಿಗಿರಬಾರ್ದು. ಅದು ಮುಗಿದು ಹೋಗಿರೋ ಕ್ಷಣ. ಇದು ಕೆಟ್ಟ ನೆನಪುಗಳಿಗೂ ಅನ್ವಯಿಸತ್ತೆ.

ನೀವು ನಿಮ್ಮ ಮುಂದಿನ ಗುರಿ ಏನು ಅಂತ ನಿರ್ಧಾರ ಮಾಡಿದ ಮೇಲೆ ನಿಮ್ಮ ಹಿಂದಿನ ನೆನಪುಗಳ ಬಗ್ಗೆ ಯೋಚ್ನೆ ಮಾಡೋದು ಕಮ್ಮಿ ಆಗುತ್ತೆ. ಎಲ್ಲಿ ವರೆಗೂ ನಾವು, ಹಿಂದೆ ಆಗಿದ್ರ ಬಗ್ಗೆ ತಲೆ ಕೆಡಿಸ್ಕೊತಿರ್ತೀವೋ , ಆಗ ನಮ್ಮ ಭವಿಷ್ಯ ಕಳೆದು ಹೋಗುತ್ತೆ. 

ಮೂಲ

8. ನನ್ನ್ ಕೈಯ್ಯಲ್ಲಿ ಏನೂ ಸಾಧಿಸಕ್ಕಾಗಲ್ಲ ಅಂತ ಕೈ ಚಲ್ಲೋ ಬದ್ಲು ಒಂದು ಕೊನೆ ಸರ್ತಿ ಪ್ರಯತ್ನ ಮಾಡಿ

ವಯಸ್ಸಾದಷ್ಟೂ ಕನಸುಗಳನ್ನ, ನಮ್ಮ ಗುರಿಗಳನ್ನ ಸಾಧಿಸಕ್ಕಾಗಲ್ಲ ಅಂತ ಕೈ ಬಿಡೋದೇ ಹೆಚ್ಚು. ಹೀಗೆ ನಮ್ಮ ಕನಸನ್ನ ಬಿಡೋ ಬದಲು ಯಾವುದಾದ್ರೂ ಸುಲಭವಾಗಿ ಸಾಧಿಸಬಹುದಾದ ಮೈಲಿಗಲ್ಲಿನ ಬಗ್ಗೆ ಯೋಚಿಸಿ. ಇಂತ ಕನಸಿನ, ಗುರಿ ಬಗ್ಗೆ ಯೋಚಿಸಿ, ಅದನ್ನ ಸಾಧಿಸಕ್ಕೆ ತುಂಬಾ ಹತ್ತಿರ ಹೋಗ್ತಿದ್ದೀವಿ ಅನ್ನಿಸದಾಗ ನಿಮಗೆ ತುಂಬಾನೇ ಖುಷಿ ಸಿಗುತ್ತೆ. ಮಕ್ಕಳು ಏನಾದ್ರು ಸಾಧನೆ ಮಾಡಿದಾಗ ಖುಷಿ ಪಡ್ತಾರಲ್ಲ ಆ ರೀತಿಯ ಖುಷಿ, ಸಮಾಧಾನ ಸಿಗುತ್ತೆ.

9. ಯಾವಾಗ್ಲೂ ಡಯೆಟ್ಟು ಅಂತ ತಲೆ ಕೆಡಿಸ್ಕೊಳೋ ಬದ್ಲು ಒಂದೊಂದ್ಸರ್ತಿ ರುಚಿಯಾಗಿರೋ ಊಟ ತಿಂಡಿ ತಿನ್ನಿ

ಪ್ರತಿಯೊಬ್ಬರ ಜೀವನದಲ್ಲೂ ಊಟ ತಿಂಡಿಗೆ ತಮ್ಮದೇ ಆದ ಪದ್ಧತಿ ಇರುತ್ತೆ. ಅದ್ರಲ್ಲೂ ನಮ್ಮ ದೇಹಕ್ಕೆ, ಆರೋಗ್ಯಕ್ಕೆ ಸರಿ ಹೊಂದೋ ಡಯಟ್ ಊಟ ತಿಂಡೀನ ಇಷ್ಟ ಇಲ್ಲ ಅಂದ್ರೂ ಬಲವಂತವಾಗಿ ತಿನ್ತಿರ್ತೀವಿ.

ಇದೆಲ್ಲ ಇದ್ದಿದ್ದೇ, ಆಗಾಗ ನಿಮಗಿಷ್ಟ ಆಗೋ ಸ್ವೀಟ್, ಐಸ್ ಕ್ರೀಮ್, ಪಿಜ್ಜಾ, ಬರ್ಗರ್ ಎಲ್ಲಾನೂ ತಿನ್ನಿ, ಆದ್ರೆ ಆಮೇಲೆ ಸರಿಯಾಗಿ ವ್ಯಾಯಾಮ ಮಾಡೋದನ್ನ ಮರೀಬೇಡಿ.

ಮೂಲ

10. ಯಾವಾಗ್ಲೂ ಕುಂಟ ನೆಪ ಕೊಡೋ ಬದ್ಲು ತಪ್ಪಾಗಿದ್ರೆ ಪ್ರಾಮಾಣಿಕವಾಗಿ ಒಪ್ಕೊಳಿ

ಪ್ರಾಮಾಣಿಕತೆ ಒಳ್ಳೇದು ಅಲ್ವ? ಕೆಲವೊಂದು ಸಲ ಅದು ನಿಮಗೆ ನೋವನ್ನೂ ಕೊಡಬಹುದು, ಆದ್ರೆ ನಿಮ್ಮಲ್ಲಿ ಬದಲಾವಣೆ ಬರ್ಬೇಕು, ನೀವು ಸುಧಾರಿಸ ಬೇಕು ಅಂದ್ರೆ ನೀವು ಪ್ರಾಮಾಣಿಕವಾಗಿರ್ಬೇಕು. ನೀವು ಪ್ರಾಮಾಣಿಕವಾಗಿರಕ್ಕೆ ಶುರು ಮಾಡಿದ್ರೆ, ನಿಮ್ಮ ಸಾಮರ್ಥ್ಯನೂ ಹೆಚ್ಚಾಗುತ್ತೆ. ಇದನ್ನ ತಿಳ್ಕೊಳೋ ಒಳ್ಳೆ ಸುಲಭ ವಿಧಾನ ಅಂದ್ರೆ ನೀವು ಪ್ರತಿಯೊಂದು ಕೆಲಸ ಮುಗಿಸಿದಾಗಲೂ ನೀವು ಮಾಡಿರೋ ಪ್ರಯತ್ನದ ಬಗ್ಗೆ ಪ್ರಶ್ನೆ ಮಾಡ್ಕೊಳಿ. ನೀವು ಯಾವುದಾದ್ರೂ ಪ್ರಾಜೆಕ್ಟ್ ಗೆ ಕೆಲಸ ಮಾಡ್ತಾ ಇದ್ರೆ, ನಿಮ್ಮ ಜೊತೇಲಿರೋ ಕೆಲಸಗಾರರಿಂದ ನಿಮ್ಮ ಸುಧಾರಣೆ ಬಗ್ಗೆ ತಿಳ್ಕೊಳಿ.

ಈ ಸಣ್ಣಪುಟ್ಟ ಬದಲಾವಣೆಗಳನ್ನ ಮಾಡ್ಕೊಂಡ್ರೆ ನಮ್ಮ ಜೀವನ ಬದಲಾಗೋದ್ರಲ್ಲಿ ಯಾವುದೇ ಅನುಮಾನ ಇಲ್ಲ!

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ: