ಈ ಸಲ ನಂದಿ ಬೆಟ್ಟಕ್ಕೆ ಹೋದಾಗ ಇದ್ಯಾವುದೂ ಬಿಡಬೇಡಿ

ನೋಡೋದು ಮಾಡೋದು ಎರಡೂ

ನಮ್ಮಲ್ಲೊಂದು ಜನಪ್ರಿಯ ಮಾತಿದೆ ''ನಂದಿ ನೋಡ್ದೋನು ಹಂದಿಗಿಂತ್ಲೂ ಕಡೆ'' ಅಂತ. ಅಂದ್ರೆ ನಂದಿ ಬೆಟ್ಟದ ಮಹತ್ವ ಹೇಳಕ್ಕೆ ಆ ಮಾತ್ನ ಬಳಸ್ತಾರೆ ಅಷ್ಟೇ. ಹಾಗಂತ ನೋಡ್ದೆ ಇರೋರೆಲ್ಲಾ ಹಂದಿ ಅಂತ ಅಲ್ಲ. ಬೆಂಗಳೂರಿನಿಂದ ಬಹಳ ದೂರ ಏನಿಲ್ಲ ನಂದಿಬೆಟ್ಟ. ಸುಮಾರು 45 ಕಿ.ಮೀ ಅಷ್ಟೇ. ಚಿಕ್ಕಬಳ್ಳಾಪುರ ನಗರದಿಂದ 10 ಕಿ.ಮೀ ದೂರದಲ್ಲಿದೆ. ಅರ್ಕಾವತಿ ನದಿ ಹುಟ್ಟು ಇಲ್ಲೇ ಅಂತಾರೆ. ಅದೆಲ್ಲಾ ಇರ್ಲಿ. ನಂದಿಬೆಟ್ಟ ಅಂದ್ರೆ ಸಾಮಾನ್ಯವಾಗಿ ಟಿಪ್ಪು ಡ್ರಾಪ್ ಕೇಳೇ ಇರ್ತೀರ. ಅಲ್ಲಿರೋದು ಅದೊಂದೇ ಅಲ್ಲ. ನೋಡೋ ಅಂತಾದ್ದು ಬಹಳ ಇದೆ. ನಂದಿಬೆಟ್ಟದಲ್ಲಿ ಏನೇನೆಲ್ಲಾ ನೋಡಿ ಮಜಾ ಮಾಡ್ಬೋದು ಗೊತ್ತಾ?

1. ಟಿಪ್ಪು ಡ್ರಾಪ್

ಮೈಸೂರು ಹುಲಿ ಅಂತ ಕರೆಸಿಕೊಂಡಿರೋ ಟಿಪ್ಪು ಸುಲ್ತಾನ್ ಹೆಸರಿಂದ್ಲೇ ಇದನ್ನ ಕರೀತಾರೆ. ಅವನ ಕಾಲದಲ್ಲಿ ಖೈದಿಗಳನ್ನ ಇಲ್ಲಿಂದ ತಳ್ಳಿ ಕ್ರೂರವಾಗಿ ಸಾಯಿಸ್ತಿದ್ರು. ಈಗ ಜಾಗ ನೋಡ್ತಾನೋಡ್ತಾ ಆಗ ಎಷ್ಟೆಲ್ಲಾ ಜನ ಸತ್ರೋ ಏನೋ ಅಂದ್ಕೊಂಡು ಅಯ್ಯೋ ಪಾಪ ಅನ್ನಿಸ್ತದೆ. 

2. ಟಿಪ್ಪುವಿನ ಬೇಸಿಗೆ ಅರಮನೆ ಮತ್ತೆ ಕೋಟೆ

ಗಂಗರ ಕಾಲದಲ್ಲಿ ಚಿಕ್ಕಬಳ್ಳಾಪುರದ ಮುಖ್ಯಸ್ಥರು ಇದನ್ನ ಕಟ್ಟಿಸಿದ್ರು. ಟಿಪ್ಪು ಸುಲ್ತಾನ್ ಕಾಲದಲ್ಲಿ ಇದನ್ನ ಇನ್ನಷ್ಟು ರಿಪೇರಿ ಮಾಡ್ಸಿ ಇಲ್ಲೊಂದು ವಿಶ್ರಾಂತಿ ಗೃಹವನ್ನ ಕಟ್ಟಿಸಿದ. ಬೇಸಿಗೆ ಕಾಲದಲ್ಲಿ ಇಲ್ಲಿ ತಣ್ಣಗಿರ್ತಿತ್ತು. ಟಿಪ್ಪೂನ ಬೇಸಿಗೆ ಬಂಗಲೆಯಾಗಿ ಬಳಸ್ತಿದ್ರು. ಇದು ಸಾಮಾನ್ಯ ಜನರ ಬಳಕೆಗೆ ಇಲ್ಲ. ಛೇ! ನಾನೂ ಒಂದ್ಸಲ ಇಲ್ಲಿ ಹಾಯಾಗಿ ಮಲಗ್ಬೇಕಾಗಿತ್ತು ಅಂದ್ಕೋತೀರ.

3. ಕುದುರೆ ಮೆಟ್ಟಿಲು

ಬೆಟ್ಟದ ಈಶಾನ್ಯ ಭಾಗದಲ್ಲಿ ಕಲ್ಲಿನ ಬಾಗಿಲಿದೆ. ಇದನ್ನ ಕುದುರೆಗಳ ಬೆನ್ ಮೇಲೆ ಕೂತು ಹತ್ತಲು ಸೈನಿಕರು ಬಳಸುತ್ತಿದ್ದರಂತೆ. ಹಾಗಾಗಿ ಇದಕ್ಕೆ ಕುದುರೆ ಮೆಟ್ಟಿಲು ಅಂತ ಕರೀತಾರೆ. ಈ ದಾರೀನ ನೋಡ್ತಾ ಸೈನಿಕರು ಏನೆಲ್ಲಾ ಮಾಡ್ತಿದ್ರು ಅಂತ ನೆನೆಸ್ಕೊಂಡು ಥ್ರಿಲ್ ಆಗ್ತೀರ.

4. ಶತ್ರುಗಳಿಂದ ತಪ್ಪಿಸಿಕೊಳ್ಳೋಕೆ ರಹಸ್ಯ ದಾರಿ

ಪಶ್ಚಿಮ ದಿಕ್ಕಲ್ಲಿ ಈ ರಹಸ್ಯ ದಾರಿ ಇದೆ. ಆಗಿನ ಕಾಲದಲ್ಲಿ ರಾಜರು ಇಲ್ಲಿಗೆ ಬಂದಾಗ ಏನಾದ್ರೂ ಅವರ ಮೇಲೆ ಅನಿರೀಕ್ಷಿತ ದಾಳಿ ನಡೆದ್ರೆ, ಅಲ್ಲಿಂದ ತಪ್ಪಿಸಿಕೊಳ್ಳಕ್ಕೆ ಇದನ್ನ ಬಳಸ್ತಿದ್ರಂತೆ. ಆಗಿನ ಕಾಲ್ದಲ್ಲಿ ಏನೆಲ್ಲಾ ಟ್ರಿಕ್ಸ್ ಇತ್ತು ಅಂತ ತಿಳ್ಕೊಂಡ್ ಖುಷಿ ಪಡ್ತೀರ.

5. ದೇವಾಲಯಗಳು

ಇಲ್ಲಿ ಶ್ರೀ ಭೋಗನರಸಿಂಹ, ಶ್ರೀ ಉಗ್ರ ನರಸಿಂಹ ಮತ್ತೆ ಯೋಗ ನರಸಿಂಹ ದೇವಾಲಯಗಳಿವೆ. ಪುರಾತನ ಕಾಲದ ಈ ದೇವಸ್ಥಾನಗಳು ನೋಡಲು ಸುಂದರವಾಗಿವೆ.

6. ಗವಿ ವೀರಭದ್ರಸ್ವಾಮಿ ದೇವಸ್ಥಾನ

ಇದು ಬೆಟ್ಟದ ತುದಿಯಲ್ಲಿದೆ. ಟಿಪ್ಪು ಅರಮನೆಯಿಂದ ಸುಲ್ತಾನ್ ಪೇಟೆಗೆ ಹೋಗೋ ದಾರಿಯಲ್ಲಿ ಇದನ್ನ ಕಾಣ್ಬೋದು. ಸ್ವಾಭಾವಿಕವಾಗಿ ದೊಡ್ಡ ಬಂಡೆಗಳಿಂದ ನಿರ್ಮಾಣ ಆಗಿರೋ ದೇವಸ್ಥಾನ ಇದು. ನಿಮ್ಮಲ್ಲಿ ಭಕ್ತಿ ಉಕ್ಕಿ ಬರುವಂತೆ ಮಾಡ್ತಾನೆ ಗವಿ ವೀರಭದ್ರಸ್ವಾಮಿ.

7. ಮಕ್ಕಳ ಆಟದ ಮೈದಾನ

ತೋಟಗಾರಿಕೆ ಇಲಾಖೆ ಇದನ್ನ ನೋಡ್ಕೊಳ್ತಿದೆ. ಇಲ್ಲಿ ಮಕ್ಕಳು ಆಡೋಕೆ ಜಾರೋಬಂಡಿ, ಉಯ್ಯಾಲೆ, ರಂಕರಾಟೆ ಎಲ್ಲ ಇದೆ. ಇಲ್ಲಿ ಮಕ್ಕಳ ಜೊತೆ ನೀವೂ ಮಕ್ಕಳ ತರಹ ಆಗ್ಬೋದು.

8. ನೆಹರು ನಿಲಯ

ಜವಾಹರ್ ಲಾಲ್ ನೆಹರು ಇಲ್ಲಿಗೆ ಬಂದಾಗ ತೋಟಗಾರಿಕೆ ಇಲಾಖೆ ಪ್ರವಾಸಿ ಮಂದಿರದಲ್ಲಿ ಉಳ್ಕೊಂಡಿದ್ರು. ಹಾಗಾಗಿ ಇದನ್ನ ನೆಹರು ನಿಲಯ ಅಂತ ಕರೀತಾರೆ. ನೋಡ್ತಾ ನೋಡ್ತಾ ಆಹಾ ಎಷ್ಟ್ ಚೆನ್ನಾಗಿದೆ ಅಂದ್ಕೋತೀರ.

9. ಗಾಂಧಿ ಹೌಸ್

ಮಹಾತ್ಮಗಾಂಧಿ ಇಲ್ಲಿ ಉಳ್ಕೊಂಡಿದ್ರು. ಈಗ ಕರ್ನಾಟಕ ಸರ್ಕಾರದ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆ ನೋಡ್ಕೊಳ್ತಿದೆ. ಗಣ್ಯರಿಗೆ ಮಾತ್ರ ಇದನ್ನ ಮೀಸಲಾಗಿದೆ. ಛೇ ನಮ್ಗೂ ಸಿಕ್ಕಿದ್ರೆ ಇಲ್ಲಿ ಒಂದ್ ದಿನ ಕಳೀಬೋದಾಗಿತ್ತಲ್ಲಾ ಅಂದ್ಕೋತೀವಿ. (ಚಿತ್ರದಲ್ಲಿ ನೀವ್ ನೋಡ್ತಿರೋದು ನಂದಿಬೆಟ್ಟದ ಎಂಟ್ರಸ್)

10. ಮಯೂರ ಹೋಟೆಲ್

ತೋಟಗಾರಿಕೆ ಮತ್ತೆ ಕರ್ನಾಟಕ ಪ್ರವಾಸೋದ್ಯಮ ಇಲಾಖೆಗಳು ಇದನ್ನ ನಡೆಸ್ತಿವೆ. ಇಲ್ಲಿ ವೆಜ್  ಮತ್ತು ನಾನ್-ವೆಜ್ ಎರಡೂ ಸಿಗುತ್ತೆ. ಕಾಫಿ, ಟೀ, ತಿಂಡಿ ತಿಂದು ಸುಧಾರಿಸ್ಕೋಬಹುದಿಲ್ಲಿ.

11. ನದಿಗಳು

ಪೆನ್ನಾರ್, ಪಾಲಾರ್ ಮತ್ತೆ ಅರ್ಕಾವತಿ ನದಿಗಳು ಹುಟ್ಟೋದು ಇಲ್ಲೇ. ಆದ್ರೆ ಅವೆಲ್ಲಾ ಈಗಿಲ್ಲ. ಯಾಕಂದ್ರೆ ಅವೆಲ್ಲಾ ಒಣಗಿ ಹೋಗಿವೆ.

12. ಅಮೃತ ಸರೋವರ

ಬೆಟ್ಟದ ಮೇಲೆ ಈ ಸರೋವರ ಇದೆ. ವರ್ಷ ಪೂರ್ತಿ ಇಲ್ಲಿ ನೀರನ್ನ ಕಾಣ್ಬೋದು. ಸೂರ್ಯನ ಬಿಸಿಲಿಗೆ ಇಲ್ಲಿನ ನೀರು ಹೊಳೀತಾ ಕಣ್ಣಿಗೆ ಸುಂದರವಾಗಿ ಕಾಣುತ್ತೆ.

13. ಬ್ರಹ್ಮಾಶ್ರಮ

ಮುನಿಗಳಾದ ರಾಮಕೃಷ್ಣರು ಇಲ್ಲಿ ಧ್ಯಾನ ಮಾಡ್ತಿದ್ರಂತೆ. ಇಲ್ಲಿ ತಂಪಾದ ಗುಹೆ ಇದೆ. ಆಶ್ರಮದಲ್ಲಿರೋ ಋಷಿ ಮುನಿಗಳು ಮುಂಜಾನೆ ಬೆಟ್ಟದ ಮೇಲೆ ಜೊತೆಯಾಗಿ ಕುಳಿತು ಭಂಗಿ ಸೇದಿ ಮುಂದಿನ ಕೆಲ್ಸಗಳಿಗೆ ಹೋಗ್ತಿದ್ರು ಅಂತ ಹೇಳ್ತಾರೆ.

14. ಪ್ಯಾರಾಗ್ಲೈಡಿಂಗ್, ಸೈಕ್ಲಿಂಗ್, ಬೈಕಿಂಗ್

ಕರ್ನಾಟಕದಲ್ಲಿ ಪ್ಯಾರಾಗ್ಲೈಡಿಂಗ್ ಮಾಡಲು ಸೂಕ್ತವಾದ ತಾಣ ಇದು (ಈಗ ಅಲ್ಲಿ ಪ್ಯಾರಾಗ್ಲೈಡಿಂಗ್ ಮಾಡ್ತಿಲ್ಲ). ಇನ್ನು ಸೈಕ್ಲಿಂಗ್ ಮಾಡೋರಿಗೆ ಇದು ಸ್ವರ್ಗ ಇದ್ದಂತೆ. ~7 ಕಿ.ಮೀ ಸೈಕಲ್ ತುಳಿದ್ರೆ 400 ಮೀಟರ್ ಎತ್ತರದ ಬೆಟ್ಟ ತಲುಪ್ತೀವಿ. ರಜಾ ದಿನಗಳಲ್ಲಿ ಬೆಂಗ್ಳೂರಿಂದ ಸೈಕ್ಲಿಸ್ಟ್‌ಗಳು/ಬೈಕರ್‌ಗಳು ಬರ್ತಾರೆ. ನಿಮಗೂ ಆ ರೀತಿ ಮಾಡ್ಬೇಕು ಅನ್ನಿಸಿದ್ರೆ ಬೈಕ್ ಅಥ್ವಾ ಸೈಕಲಲ್ಲಿ ಬರ್ಬೋದು.

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ:

ನಿಮ್ಮ ಲೈಕೇ ನಮಗೆ ಪ್ರೇರಣೆ. ಕಳ್ಕೊಳಕ್ಕೇನಿದೆ? ಮಾಡಿಬಿಡಿ!

ವಿಜ್ಞಾನದ ಪ್ರಕಾರ ಚಂದ್ರ ಇಲ್ಲದೆ ಹೋದರೆ ಭೂಮಿಗೆ ಏನಾಗುತ್ತೆ ಅಂತ ಕೇಳಿ ಆಶ್ಚರ್ಯ ಪಡ್ತೀರಿ

ಯೋಚನೇನೂ ಮಾಡಕ್ಕಾಗಲ್ಲ

ನಮ್ಮ ಭೂಮಿಗೆ ತುಂಬಾ ಹತ್ತಿರದವನು ಚಂದ್ರ. ಭೂಮಿ ಮೇಲಿರೋ ಎಲ್ಲಾ ಜೀವಿಗಳ ವಿಕಾಸಕ್ಕೆ ಸಹಾಯ ಮಾಡಿರೋದು ಮಾತ್ರ ಅಲ್ಲ, ನಮ್ಮ ಭೂಮಿ ಸರಿಯಾಗಿ ವಿಕಾಸ ಆಗಕ್ಕೂ ಸಹಾಯ ಮಾಡಿದಾನೆ ಅಂತಾರೆ. ಸುಮಾರು 4.5 ಬಿಲಿಯನ್ ವರ್ಷಗಳ ಹಿಂದೆ ಮಂಗಳ ಗ್ರಹದಷ್ಟು ದೊಡ್ಡದಾಗಿರೋ ಒಂದು ಗ್ರಹದ್ ಚೂರು ನಮ್ಮ ಭೂಮಿಗೆ ಬಡೀತಂತೆ. ಆಗ ಹುಟ್ಟಿದೋನೇ ಚಂದ್ರ. ಭೂಮಿಯಿಂದ ಬೇರೆ ಆದ್ರೂ ಅದಿಕ್ಕೆ ಅಂಟ್ಕೊಂಡೇ ಅವತ್ತಿಂದ ಸುತ್ತಾ ಇದಾನೆ.

ಅದೇನೋ ಸರಿ; ಇವನೇನಾದ್ರೂ ಇಲ್ದೇ ಹೋದ್ರೆ ಏನಾಗತ್ತೆ? ಈ ಕೆಳಗಿನ ಐದು ಅಂಶ ಅಂತೂ ಗ್ಯಾರಂಟಿ ಅನ್ನತ್ತೆ ವಿಜ್ಞಾನ. ನೀವೇ ನೋಡಿ...

1. ರಾತ್ರಿ ಕತ್ಲೋ ಕತ್ತಲು!

ಚಂದ್ರ ಇಲ್ದೇ ಇದ್ರೆ ರಾತ್ರಿ ಕತ್ಲು ಸಿಕ್ಕಾಪಟ್ಟೆ ಜಾಸ್ತಿ ಆಗತ್ತೆ. ಚಂದ್ರ ಬಿಟ್ರೆ ದೊಡ್ಡದಾಗಿ ಕಾಣೋದು ಶುಕ್ರ. ಆದ್ರೆ ಶುಕ್ರನ್ ಬೆಳಕು ಕತ್ಲೆ ಹೋಗ್ಸಲ್ಲ. ಶುಕ್ರ ತುಂಬಾ ದೊಡ್ಡದಾಗಿ ಕಾಣ್ವಾಗ ಇರೋದಕ್ಕಿಂತ ಪೂರ್ಣಚಂದ್ರ 2000 ಪಟ್ಟು ದೊಡ್ಡದಾಗಿ ಕಾಣ್ತಾನೆ.

2. ವರ್ಷದಲ್ಲಿ 1,100-1,400 ದಿನ, ದಿನಕ್ಕೆ 6 - 8 ಗಂಟೆ ಆಗೋಗತ್ತೆ

ಯಾಕಂದ್ರೆ ಭೂಮಿ ತಿರುಗೋದಿಕ್ಕೆ ಚಂದ್ರ ಒಂಥರಾ ಬ್ರೇಕ್ ಹಾಕಿದಾನೆ. ಅವನ ಗುರುತ್ವಾಕರ್ಷಣೆಯಿಂದ ಭೂಮಿ ಸ್ಪೀಡು ಕಮ್ಮಿ ಆಗಿದೆ. ಈ ಬ್ರೇಕ್ ಇಲ್ದೇ ಇದ್ರೆ ಭೂಮಿ ಇನ್ನೂ ತುಂಬಾ ವೇಗವಾಗಿ ತಿರುಗ್ತಾ ಇತ್ತು. ಕಣ್ಮುಚ್ಚಿ ಕಣ್ ತೆಗೆಯೋದ್ರಲ್ಲಿ ಒಂದು ದಿನ ಮುಗಿಯತ್ತೇನೋ, ಚಂದ್ರ ಇಲ್ದಿದ್ರೆ

3. ಸಮುದ್ರದಲ್ಲಿ ಅಲೆಗಳು ಏಳಲ್ಲ

ಸೂರ್ಯ ಭೂಮಿಗಿಂತ 400 ಪಟ್ಟು ದೊಡ್ಡದು, ಸುಮಾರು 400 ಪಟ್ಟು ದೂರಾನೂ ಇದೆ. ಅದಕ್ಕೆ ಇವೆರಡೂ ಭೂಮಿಯಿಂದ ಒಂದೇ ಗಾತ್ರ ಇರೋ ಹಾಗೆ ಕಾಣೋದು. ಸೂರ್ಯ ಚಂದ್ರಂಗಿಂತ 27 ಮಿಲಿಯನ್ ಪಟ್ಟು ದೊಡ್ಡದಾಗಿದೆ. ಹಾಗಂತ ಚಂದ್ರ ಇಲ್ದೆ ಹೋದ್ರೆ ಸಮುದ್ರದಲ್ಲಿ ಏಳೋ ಅಲೆ ಇನ್ನೂ ದೊಡ್ದ ಗಾತ್ರದ್ದಿರತ್ತೆ ಅಂತ ಅನ್ಕೊಂಡ್ರೆ ತಪ್ಪು. ಸೂರ್ಯನಿಂದ ಉಂಟಾಗೋ ಅಲೆಗೆ ಚಂದ್ರನ ಅಲೆಯ 40% ಶಕ್ತಿ ಮಾತ್ರಾನೇ ಇರೋದು. ಈಗ ಉಕ್ಕೋ ಎತ್ರಕ್ಕಿಂದ ಕಾಲು ಭಾಗ ಉಕ್ಕತ್ತೇನೋ ಅಷ್ಟೇ.

4. ಗ್ರಹಣಗಳೇ ಆಗಲ್ಲ

ಚಂದ್ರಗ್ರಹಣಾನೂ ಇಲ್ಲ; ಸೂರ್ಯಗ್ರಹಣಾನೂ ಇಲ್ಲ – ಸೂರ್ಯ ಮತ್ತೆ ಭೂಮಿ ಮಧ್ಯ ಯಾರೂ ಬರಲ್ವಲ್ಲ ಆಗ. ಚಂದ್ರ ಬಿಟ್ರೆ ಭೂಮಿ ಮತ್ತೆ ಸೂರ್ಯನ ಮಧ್ಯೆ ಹಾಯೋದು ಶುಕ್ರಗ್ರಹ ಮಾತ್ರ. ಅಂದ್ರೆ ಶುಕ್ರಗ್ರಹಣ! ಅದ್ಯಾವಾಗಾಗತ್ತೋ ಯಾರ್ ಬಲ್ರು?

5. ಪರಿಸರದಲ್ಲಿ ಏನೇನೋ ಏರುಪೇರುಗಳಾಗುತ್ತವೆ

ಚಂದ್ರ ಭೂಮಿನ ಹಿಡ್ಕೊಂಡಿದಾನೋ, ಅಥವಾ ಭೂಮಿ ಚಂದ್ರನ್ನ ಹಿಡ್ಕೊಂಡಿದ್ಯೋ! ಅಂತೂ ಇವೆರಡೂ ಒಂದನ್ನೊಂದು ಕಂಟ್ರೋಲ್  ಮಾಡ್ತಿವೆ. ಆದ್ರೆ ಚಂದ್ರ ಇಲ್ದೇ ಇದ್ರೆ ಭೂಮಿ ಅಕ್ಷರೇಖೆ ಆಗ್ಗಾಗ್ಗ ವಿಪರೀತವಾಗಿ ಅಚಾನಕ ಬದಲಾಗಿ ಬಿಡತ್ತೆ. ಈಗ ಚಂದ್ರನ ಪ್ರಭಾವದಿಂದ ಸರಿಯಾಗಿ 23.5 ಡಿಗ್ರೀನಲ್ಲೇ ತಿರುಗ್ತಾ ಇದೆ. ಚಂದ್ರ ಏನಾರ ಇಲ್ಲಾ ಅಂದ್ರೆ ಭೂಮಿ ತುಂಬಾ ತಿರಗ್ ಬಹುದು ಅಥವಾ ತಿರಗ್ದೇ ನೆಟ್ಟಗೆ ಇರಬಹುದು. ಆಗ ಋತುಗಳೇ ಇಲ್ದೇ ಹೋಗಬಹುದು; ಅಥವಾ ವಿಚಿತ್ರ ಅನ್ನೋ ತರ ಋತುಗಳು ಬರಬಹುದು. ನಾವು ಬುಧಗ್ರಹದ್ ತರ ಸಮತಟ್ಟಾಗಿ ಸುತ್ತಾ ಇರ್ತೀವಿ ಅಥವಾ ಯುರೇನಸ್ ತರ ಚಿತ್ರವಿಚಿತ್ರ ವಾತಾವರಣದಲ್ಲಿ ಬಿದ್ದು ಹೊರಳಾಡ್ತಿರ್ತೀವಿ!!

ಅದಕ್ಕೇ ಹೇಳೋದು, ಭೂಮಿಗೂ ಸೂರ್ಯಂಗೂ ಮಧ್ಯ ಏನೇನೇ ಬಂದ್ರೂ, ಭೂಮಿಗೂ ಚಂದ್ರಂಗೂ ಮಧ್ಯ ಏನೂ ಬರೋದಿಲ್ಲ ಅಂತ. ಅಂತ ಅಪೂರ್ವವಾದ ಸಂಬಂಧ ಭೂಮಿ-ಚಂದ್ರಂದು. ಅಲ್ವಾ?

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ: