ಈಗಿರೋ‌ ಕೆಲಸ ಬಿಡದೆ ಒಂದು ಒಳ್ಳೇ ಸೈಡ್ ಬಿಸಿನೆಸ್ ಶುರು ಮಾಡೋ ಆಸೆ ಇದ್ರೆ ಹೀಗ್ ಮಾಡಿ

ನಿಮ್ಮ ಬಾಸ್ ನೀವೇ ಆದ್ರೆ ಚಿಂದಿ ಅಲ್ವಾ?

ಒಂದು ಕೆಲಸ ಮಾಡ್ತಿರುವಾಗ ಇನ್ನೊಂದು ಸೈಡ್ ಬಿಸಿನೆಸ್ ಶುರು ಮಾಡೋದು ಸುಲಭದ ಕೆಲಸ ಅಲ್ಲ, ಆದರೆ ಮಾಡಬಹುದು. ಎಷ್ಟೋ ಜನ ಮಾಡಿರೋರಿದಾರೆ. ಇದನ್ನ ಹೇಗೆ ಮಾಡೋದು ಅನ್ನಕ್ಕೆ ಒಂದು ಉತ್ತರ ಅಂತ ಇಲ್ಲ… ಒಬ್ಬೊಬ್ಬರಿಗೆ ಒಂದೊಂದ್ ಉತ್ತರ. ಆದರೆ ಕೆಳಾಗೆ ಕೊಟ್ಟಿರೋ‌ ಹೆಜ್ಜೆಗಳ್ನ ಹಾಕ್ತಾ ಹೋದರೆ ನಿಮ್ಮ ಬಾಸ್ ನೀವೇ ಆಗೋ ದಿನ ಬಂದೇ ಬರುತ್ತೆ…

1. ಸೈಡ್ ಬಿಸಿನೆಸ್ ಶುರು ಮಾಡೇ ಮಾಡ್ತೀನಿ ಅಂತ ನಿಮ್ಮ ಮನಸ್ಸಲ್ಲಿ ಗಟ್ಟಿ ಮಾಡ್ಕೊಳಿ

ಹೀಗ್ ಯಾಕ್ ಹೇಳ್ತಿದೀವಿ ಅಂದ್ರೆ ನೀವು ಮಾಡಕ್ಕೆ ಹೊರಟಿರೋ ಕೆಲಸ ಸುಲಭದ್ದಲ್ಲ. ನಿಮ್ಮ ಮನೆಯೋರ್ಗೆ ನೀವು ಈಗ ಕೊಡುವಷ್ಟು ಸಮಯ ಕೊಡಕ್ಕಾಗಲ್ಲ. ಹಲವಾರು ಕಷ್ಟದ ತೀರ್ಮಾನಗಳ್ನ ನೀವು ತೊಗೋಬೇಕಾಗುತ್ತೆ. ಆದ್ದರಿಂದ ಮೊದಲು ಮಾಡೇ ಮಾಡಬೇಕು ಅನ್ನೋ ತೀರ್ಮಾನ ತೊಗೊಳ್ಳಿ. ಆಮೇಲೆ ಒಂದು ವಾರದಲ್ಲಿ ನಿಮ್ಮ ಸಮಯ ಎಲ್ಲೆಲ್ಲಿ ಹೋಗ್ತಿದೆ ಅಂತ ಲೆಕ್ಕ ಹಾಕಿ. ಎಲ್ಲಿ ನೀವು ಸಮಯ ಉಳಿಸಬಹುದು ಅಂತ ನೋಡ್ಕೊಳಿ. ಟೀವಿ ನೋಡೋದು, ಫೇಸ್ಬುಕ್ ಗೀಸ್ಬುಕ್ಕಲ್ಲಿ ಸಮಯ ಕಳೆಯೋದು… ಇದನ್ನೆಲ್ಲ ಕಡಿಮೆ ಮಾಡ್ಕೋಬೋದಾ ನೋಡಿ. ಎಷ್ಟು ಸಮಯ ಉಳಿಸಕ್ಕಾಗತ್ತೋ ಅಷ್ಟು  ಬೇಗ ನಿಮ್ಮ ಕನಸು ನನಸಾಗುತ್ತೆ.

2. ನಿಮ್ಮ ಕೈಯಲ್ಲಿ ಏನಾಗುತ್ತೆ ಏನಾಗಲ್ಲ ಅಂತ ಸ್ಪಷ್ಟವಾಗಿ ತಿಳ್ಕೊಳಿ

ನಿಮ್ಮ ಹೊಸ ಬಿಸಿನೆಸ್ಗೆ ಯಾವ ಯಾವ ಸಾಮರ್ಥ್ಯಗಳು ಬೇಕು? ನಿಮಗೆ ಆ ಸಾಮರ್ಥ್ಯಗಳೆಲ್ಲ ಇದ್ಯಾ? ಇಲ್ಲದೆ ಹೋದರೆ ನಿಮಗೆ ಕಲಿಯಕ್ಕೆ ಸಮಯ ಬೇಕು. ಅಥವಾ ಅದು ಯಾರಿಗೆ ಬರತ್ತೋ ಅವರ ಕೈಯಲ್ಲಿ ಮಾಡಿಸ್ಕೋಬೇಕು. ಅವರಿಗೆ ಕೊಡಕ್ಕಾಗುವಷ್ಟು ದುಡ್ಡಿದ್ಯಾ ನಿಮ್ಮ ಹತ್ತಿರ? ಇದನ್ನೆಲ್ಲ ಯೋಚನೆ ಮಾಡಿ.

ಮೂಲ

3. ನಿಮ್ಮ ಬಿಸಿನೆಸ್ ಐಡಿಯಾ ಕೆಲಸ ಮಾಡೋ ಸಾಧ್ಯತೆ ಎಷ್ಟಿದೆ ಅಂತ ಜನರನ್ನ ಕೇಳಿ ತಿಳ್ಕೊಳಿ

ಎಷ್ಟೋ ಜನ ಹೊಸ ಬಿಸಿನೆಸ್ ಶುರು ಮಾಡ್ತೀನಿ ಅಂತ ಮಾಡಿಬಿಡ್ತಾರೆ, ಆದರೆ ಅವರು ಏನ್ ಮಾರಕ್ಕೆ ಹೊರಟಿರ್ತಾರೋ ಅದು ಜನರಿಗೆ ಬೇಕಗೇ ಇರಲ್ಲ! ಆದ್ದರಿಂದ ನೀವು ಪ್ಲಾನ್ ಮಾಡುವಾಗ ಮೊದಲು ನಿಮ್ಮ ಐಡಿಯಾ ಕೆಲಸ ಮಾಡುತ್ತಾ ಅಂತ ಕಂಡ್ ಹಿಡೀರಿ. ನೀವು ಏನ್ ಮಾರಕ್ಕೆ ಹೊರಟಿದೀರೋ ಅದು ಜನರಿಗೆ ಬೇಕಾ? ಎಂಥ ಜನರಿಗೆ ಬೇಕು? ಅವರನ್ನ ಮಾತಾಡಿಸಿ. ಅದು ಬಿಟ್ಟು ನಾನು ಮಾಡಿದ್ಮೇಲೆ ಚೆನ್ನಾಗಿ ಇದ್ದೇ ಇರುತ್ತೆ ಅನ್ಕೋಬೇಡಿ. ಇಲ್ಲಿ ಎಡವಿದರೆ ನಿಮ್ಮ ಹೊಸ ಬಿಸಿನೆಸ್ ಜಪ್ಪಯ್ಯ ಅಂದ್ರೂ ಉದ್ಧಾರ ಆಗಲ್ಲ.

4. ಜನರಿಗೆ ಬೇಕಾಗಿರೋದು ಏನಾದರೂ ಹೊಸದು ಮಾಡಿ

ನಿಮ್ಮ ಬಿಸಿನೆಸ್ಗೂ ಈಗಾಗಲೇ ಇರೋ ಬಿಸಿನೆಸ್ಗಳಿಗೂ ಏನಾದರೂ ವ್ಯತ್ಯಾಸ ಇರಬೇಕು. ಅಷ್ಟೇ ಅಲ್ಲ, ಆ ವ್ಯತ್ಯಾಸ ಜನರಿಗೆ ತುಂಬ ಇಷ್ಟ ಆಗಬೇಕು, ಅದಕ್ಕೆ ಅವರು ದುಡ್ಡು ಕೊಡಕ್ಕೆ ರೆಡಿ ಇರಬೇಕು. ಆಗಲೇ ಅದು ನಿಮ್ಮ ಬಿಸಿನೆಸ್ ಅನ್ನಿಸಿಕೊಳೋದು, ಮತ್ತೆ ಉದ್ಧಾರ ಆಗೋದು! ನಿಮಗೆ ಬೆಲೆ ಕಡಿಮೆ ಮಾಡಕ್ಕಾಗುತ್ತಾ? ಹೊಸ ತಂತ್ರಜ್ಞಾನ ಅಳವಡಿಸಕ್ಕಾಗುತ್ತಾ? ಹೊಸ ಸಾಧ್ಯತೆಗಳ್ನ ತೆರ್ಕೊಳೋಹಂಗೆ ಮಾಡಕ್ಕಾಗುತ್ತಾ? ಎನು ಹೊಸದು ಮಾಡ್ತೀರಿ? ಇದರ ಬಗ್ಗೆ ಎಲ್ಲ ಯೋಚನೆ ಮಾಡಬೇಕಾದರೆ ನಿಮಗೆ ನೀವೇ ಸುಳ್ಳು ಹೇಳ್ಕೋಬೇಡಿ. ಇಲ್ಲಾಂದ್ರೆ ಆಮೇಲೆ ಕಷ್ಟ ಆಗುತ್ತೆ.

ಮೂಲ

5. ಅಳೆಯಕ್ಕೆ ಮತ್ತೆ ಮುಟ್ಟಕ್ಕೆ ಆಗುವಂಥ ಗುರಿಗಳ್ನ ಇಟ್ಕೊಳಿ

ನಿಮ್ಮ ಬಿಸಿನೆಸ್ನ ಹೆಂಗ್ ನಡೆಸ್ತೀರಿ ಅನ್ನೋದು ನಿಮಗೆ ಗೊತ್ತಿರಬೇಕು. ಗುರಿ ಅಂತ ಇಲ್ಲದೆ ಹೋದ್ರೆ, ಅಥವಾ ಅದನ್ನ ಅಳೆಯಕ್ಕಾಗದೆ ಹೋದ್ರೆ, ಅಥವಾ ನಿಮ್ಮ ಕೈಯಲ್ಲಿ ಮುಟ್ಟಕ್ಕೇ‌ ಆಗದೆ ಹೋದ್ರೆ ನಿಮ್ಮ ಬಿಸಿನೆಸ್ ಉದ್ಧಾರ ಆಗಲ್ಲ. ಅದಕ್ಕೇ ಪ್ರತಿದಿನದ ಗುರಿಗಳು, ಪ್ರತಿ ವಾರದ ಗುರಿಗಳು, ಪ್ರತಿ ತಿಂಗಳ ಗುರಿಗಳು ಅಂತ ಇರಬೇಕು.

6. ಹೇಗೆ ಶುರು ಮಾಡ್ತೀರಿ, ಶುರು ಆದಮೇಲೆ ಏನ್ ಮಾಡ್ತೀರಿ ಅನ್ನೋದು ಸ್ಪಷ್ಟವಾಗಿರಬೇಕು

ಗುರಿಗಳ್ನ ಹಾಕ್ಕೊಂಡ್ರೆ ಕೆಲಸ ಆಗೋಗಲ್ಲ. ಆ ಗುರಿಗಳ್ನ ಮುಟ್ಟಕ್ಕೆ ಎನೇನ್ ಮಾಡ್ತೀರಿ? ಬಿಸಿನೆಸ್ ಶುರು ಆದಮೇಲೆ ಏನೇನ್ ಮಾಡ್ತೀರಿ? ಇದರ ಬಗ್ಗೆಯೆಲ್ಲ ಆಳವಾಗಿ ಯೋಚನೆ ಮಾಡಿ. ಇದನ್ನ ನಿಮ್ ಬಿಟ್ರೆ ಬೇರೆ ಯಾರಿಗೂ ಮಾಡಕ್ಕಾಗಲ್ಲ. ನೆನಪಿಡಿ: ನೀವು ಇವತ್ತು ಏನೇ ಪ್ಲಾನ್ ಮಾಡಿದರೂ ನಾಳೆ ಅದು ನಡಿಯದೆ ಇರಬಹುದು. ಯಾಕಂದ್ರೆ ಪರಿಸ್ಥಿತಿ, ವಾತಾವರಣ ಎಲ್ಲಾ ಬದಲಾಗ್ತಾನೇ ಇರುತ್ತೆ. ಆದ್ದರಿಂದ ನೀವು ಎನೇ ಬಂದರೂ ಅದನ್ನ ನಿಮ್ಮ ಪ್ಲಾನಲ್ಲಿ ಅಳವಡಿಸಿಕೊಳ್ಳೊ ಕಲೆನೂ ಕಲಿತುಕೊಳ್ಳಬೇಕು. ನೀವು ಶುರು ಮಾಡಬೇಕು ಅಂತಿರೋ ಬಿಸಿನೆಸ್ ನಿಮಗೆ ನಿಜವಾಗಲೂ ತುಂಬ ಇಷ್ಟವಾದರೆ ಇದನ್ನೆಲ್ಲ ಮಾಡೇ ಮಾಡ್ತೀರಿ.

ಮೂಲ

7. ನಿಮಗೆ ಆಗದೆ ಇರೋ ಕೆಲಸ ಬೇರೆಯೋರ ಕೈಯಲ್ಲಿ ಮಾಡಿಸಿ

ನಿಮಗೆ ಯಾವ ಕೆಲಸವನ್ನ ಚೆನ್ನಾಗಿ… ಎಲ್ಲರಿಗಿಂತ ಚೆನ್ನಾಗಿ ಮಾಡಕ್ಕಾಗುತ್ತೋ ಅದನ್ನ ಮಾತ್ರ ನೀವು ಮಾಡಬೇಕು. ಮಿಕ್ಕಿದ್ದನ್ನ ಬೇರೆಯೋರ ಕೈಯಲ್ಲಿ ಮಾಡಿಸಬೇಕು. ಎಲ್ಲಾ ನಾನೇ ಮಾಡ್ತೀನಿ ಅಂತ ಹೊರಟರೂ ಕಷ್ಟ, ಎಲ್ಲಾ ಕೊಟ್ಟು ಮಾಡಿಸ್ತೀನಿ ಅಂದರೂ ಕಷ್ಟ. ಅದಕ್ಕೇ ಹೇಳಿದ್ದು… ಸರಿಯಾಗಿ ಯೋಚನೆ ಮಾಡಿ ಮಾಡಬೇಕು ಅಂತ.

8. ನಿಮ್ಮ ವಸ್ತು ಅಥವಾ ಸೇವೆ ಜನರಿಗೆ ಇಷ್ಟ ಆಗ್ತಿದ್ಯಾ ಅಂತ ತಿಳ್ಕೊಳಿ

ಜನರಿಗೆ ಉಪಯೋಗ ಆಗುವಂಥ ವಸ್ತು ಅಥವಾ ಸೇವೆ ಮಾರೋದೇ ನಿಮ್ಮ ಮೊಟ್ಟಮೊದಲ ಗುರಿ. ಆದ್ದರಿಂದ ಜನರನ್ನೇ ಕೇಳಿ. ಮುಲಾಜಿಲ್ಲದೆ ಅವರಿಗೇನನ್ನಿಸುತ್ತೆ ಅದನ್ನ ಹೇಳಕ್ಕೆ ಹೇಳಿ. ಇದನ್ನ ಆದಷ್ಟು ಬೇಗ ಮಾಡಿ, ಮಾಡ್ತಾನೇ ಇರಿ. ಎಂದಿಗೂ ನಿಲ್ಲಿಸಬೇಡಿ. ಈಗ ಫೇಸ್ಬುಕ್, ಟ್ವಿಟರ್ ಮುಂತಾದ ಕಡೇನೂ ನೀವು ಸರ್ವೇಗಳ್ನ ಮಾಡಬಹುದು. ಅದನ್ನೆಲ್ಲ ಉಪಯೋಗಿಸಿಕೊಳ್ಳಿ.

ಮೂಲ

9. ಹೊಸ ಬಿಸಿನೆಸ್ಗೂ ಈಗಿನ ಕೆಲಸಕ್ಕೂ ವ್ಯತ್ಯಾಸ ಚೆನ್ನಾಗಿ ನೆನಪಿಟ್ಟುಕೊಳ್ಳಿ

ಈಗ ನೀವಿರೋ ಕಂಪನಿ ಥರದ್ದೇ‌ ಇನ್ನೊಂದು ಕಟ್ಟೋದು ಸುಲಭ ಅನ್ನಿಸಬಹುದು, ಆದರೆ ಹಾಗೆ ಮಾಡಿದರೆ ಕಾನೂನಿನ ತೊಂದರೆಗಳು ಏಳಬಹುದು. ಅಷ್ಟೇ ಅಲ್ಲ, ಈಗಿನ ಕೆಲಸದಲ್ಲಿ ನಿಮ್ಮ ಸಂಬಂಧಗಳೂ ಹಾಳಾಗುತ್ತವೆ. ಅಷ್ಟೇ ಅಲ್ಲ, ಈಗಿನ ಕೆಲಸ ಮಾಡಬೇಕಾಗಿದ್ದಾಗ ಹೊಸ ಬಿಸಿನೆಸ್ ಕೆಲಸ ಮಾಡಕ್ಕೆ ಹೋದರೂ ಕಷ್ಟಾನೇ. ಅಲ್ಲೂ ಇಲ್ಲ ಇಲ್ಲೂ ಇಲ್ಲ ಅನ್ನೋಹಂಗೆ ಆಗಿಬಿಡಬೇಡಿ. ಹುಷಾರಾಗಿರಿ.

10. ಹೊಸ ಬಿಸಿನೆಸ್ ಒಂದು ಹಂತಕ್ಕೆ ಬರೋ ವರೆಗೂ ಈಗಿರೋ ಕೆಲಸ ಬಿಡಬೇಡಿ

ಆ ಹಂತ ಯಾವುದು ಅಂತ ನಿಮಗೇ ಗೊತ್ತಿರಬೇಕು. ಇಷ್ಟು ದುಡ್ಡು ಅಂತ ಮಾಡಕ್ಕೆ ಶುರು ಮಾಡಿರಬೇಕು, ಅಥವಾ ಇಷ್ಟು ಹೆಸರು ಅಂತ ಮಾಡಿರಬೇಕು… ಇಷ್ಟು ಬಳಕೆದಾರರು ಅಂತ ಇರಬೇಕು…. ಇದೆಲ್ಲ ನಿಮಗೆ ಬಿಟ್ಟಿದ್ದು. ಆದರೆ ಆ ಹಂತ ಮುಟ್ಟೋ ಮುಂಚೇನೆ ನೀವು ಈಗಿನ ಕೆಲಸ ಬಿಟ್ಟುಬಿಟ್ಟರೆ ಕಷ್ಟ ಆಗುತ್ತೆ. ನಿಮ್ಮ ಹತ್ತಿರದವರನ್ನ ಈ ವಿಷಯದ ಬಗ್ಗೆ ಕೇಳಿ. ನಿಮ್ಮ ಮನೆಯೋರ ಹತ್ತಿರಾನೂ ಮಾತಾಡಿ. ಅವಸರದಲ್ಲಿ ಏನೇನೋ‌ ಮಾಡಕ್ಕೆ ಹೋಗಿ ಕೈ ಸುಟ್ಕೋಬೇಡಿ.

ಮೂಲ

ಸರಿ ಹಾಗಾದ್ರೆ, ಹೊಸ ಬಿಸಿನೆಸ್ ಶುರು ಮಾಡ್ಕೊಳಕ್ಕೆ ರೆಡಿ ನಾ? ಏನ್ ಶುರು ಮಾಡ್ತೀರಿ?

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ:

ನಿಮ್ಮ ಲೈಕೇ ನಮಗೆ ಪ್ರೇರಣೆ. ಕಳ್ಕೊಳಕ್ಕೇನಿದೆ? ಮಾಡಿಬಿಡಿ!

ಈ 10 ಪ್ರಶ್ನೆಗಳಿಗೆ ನೀವು ಕೊಡೋ ಉತ್ತರದಿಂದ ನಿಮ್ಮ ವ್ಯಕ್ತಿತ್ವದ ಕೇಂದ್ರಬಿಂದು ಯಾವುದು ಅಂತ ಗೊತ್ತಾಗುತ್ತೆ

ಒಂದು ಚಿಕ್ಕ ಅಂತೆಕಂತೆ ಕ್ವಿಜ಼್‌

ಚಕ್ ಚಕ್ ಅಂತ ಉತ್ತರ ಆಯ್ಕೆ ಮಾಡ್ಕೋತಾ ಹೋಗಿ… ಜಾಸ್ತಿ ಯೋಚನೆ ಮಾಡಬೇಡಿ…:-)

 

 

ನೆನೆಪದ: 

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ: