ರಾತ್ರಿಯೆಲ್ಲ ಮಲಗಿದ್ದರೂ ಬೆಳಗ್ಗೆ ಯಾಕ್ ಆಕಳಿಕೆ ಬರುತ್ತೆ ಅಂತ ಯೋಚನೆ ಮಾಡಿದೀರಾ?

ಪದೇ ಪದೇ ಆಕಳಿಕೆ ಬರ್ತಿದ್ರಂತೂ ಸ್ವಲ್ಪ ಗಂಭೀರವಾಗಿ ತೊಗೊಳೋದು ವಾಸಿ

ಈವತ್ತಿನ ದಿನಗಳಲ್ಲಿ ಇದು ಕಾಮನ್ ಪ್ರಾಬ್ಲಂ. ರಾತ್ರಿಯಲ್ಲಾ ಮಲಗಿದ್ದರೂ ಬೆಳಗ್ಗೆ ಆಕಳಿಸ್ತಾನೇ ಇರ್ತೀವಿ. ಯಾಕಿಂಗಾಗ್ತಿದೆ ಅಂತ ಒಂದ್ಸಲಾನಾದ್ರು ಯೋಚ್ನೆ ಮಾಡಿದ್ದೀರಾ? ಅಯ್ಯೋ ಯಾರೋ ಬೇಜಾನ್ ನೆನಸ್ಕೋತಿರ್ಬೋದು ಅಂದ್ಕೊಂಡು ಸುಮ್ನಾಗಿರ್ತೀರ. ಯಾವತ್ತೋ ಒಂದ್ ದಿನ ಈ ತರ ಆದ್ರೆ ಪರ್ವಾಗಿಲ್ಲ. ಆಗಾಗ ಆಕಳಿಸೋದು ಆಗ್ತಾನೇ ಇರುತ್ತೆ ಅಂದ್ರೆ ಯಾರ್ಗೇ ಆಗ್ಲಿ ಒಂಥರಾ ಆಗುತ್ತೆ. ತಲೆ ಚಿಟ್ ಹಿಡುಯುತ್ತೆ. ಕೆಲಸದ್ಮೇಲೆ ಗಮನ ಕೊಡೋಕಾಗಲ್ಲ. ಪದೇಪದೇ ಆಕಳಿಸೋದನ್ನ ನೀವು ಸೀರಿಯಸ್ಸಾಗಿ ತಗೊಳ್ಳೇ ಬೇಕು. ರಾತ್ರಿ ಹೊತ್ತು ಒಳ್ಳೆ ನಿದ್ದೆ ಮಾಡಿದ್ರೂ ಆಕಳಿಕೆ ಬರ್ತಾ ಇದ್ರೆ ಅದಕ್ಕೆ ಮುಖ್ಯವಾಗಿ 5 ಕಾರಣಗಳಿರ್ತಾವೆ.

1. ಮನಸ್ಸಿನ ಮೇಲೆ ತುಂಬಾ ಒತ್ತಡ ಇದ್ದರೆ ಅಥವಾ ತುಂಬ ಬೇಜಾರಾಗಿದ್ರೆ ಹೀಗಾಗುತ್ತೆ

ಕೆಲವರು ಒಳ್ಳೆ ನಿದ್ದೆ ಮಾಡಿದ್ದೀನಿ ಅಂತ ಅಂದ್ಕೊಂಡಿರ್ತಾರೆ. ಆದರೆ ಮಾನಸಿಕವಾಗಿ ತುಂಬಾ ಒತ್ತಡದಲ್ಲಿರ್ತಾರೆ. ಕೆಲವರು ಡಿಫ್ರೆಸ್ ಆಗಿರ್ತಾರೆ. ಇದ್ರಿಂದ್ಲೂ ಪದೇಪದೇ ಆಕಳಿಕೆ ಬರ್ತಿರತ್ತೆ. ಮನಸ್ಸಲ್ಲಿ ಒತ್ತಡ ಇರೋದ್ರಿಂದ ಮಲಗಿದ್ರೂ ಒಳ್ಳೆ ನಿದ್ದೆ ಬಂದಿರಲ್ಲ. ಇದ್ರಿಂದ ದೇಹ ವಿಶ್ರಾಂತಿ ಸಿಕ್ಕಿರಲ್ಲ. ಆಗ್ಲೂ ಈ ರೀತಿ ಆಕಳಿಕೆ ಬರ್ತಾನೇ ಇರುತ್ತೆ. ಆದಷ್ಟು ಮನಸ್ಸಿನ ಒತ್ತಡ, ಉದ್ವೇಗವನ್ನ ಕಡಿಮೆ ಮಾಡ್ಕೊಳ್ಳೋದೆ ಈ ಸಮಸ್ಯೆಗೆ ಪರಿಹಾರ.

 

2. ಜಾಸ್ತಿ ನೀರು ಕುಡೀದೆ ಇರೋದ್ರಿಂದ ದೇಹ ಡೀಹೈಡ್ರೇಟ್ ಆಗಿ ಈ ತರ ಆಗುತ್ತೆ

ನಮ್ ದೇಹದ ಮುಕ್ಕಾಲು ಭಾಗ ನೀರಿನಿಂದ್ಲೇ ಆಗಿರೋದು. ಒಂದು ಗಿಡಕ್ಕೆ ನೀರು ಹಾಕ್ಲಿಲ್ಲ ಅಂದ್ರೆ ಅದು ಹೆಂಗ್ ಒಣಗೋಗುತ್ತೋ ನಮ್ ದೇಹಾನೂ ಅಷ್ಟೇ ಸೊರಗೋಗುತ್ತೆ. ಆದ್ರಿಂದ ಡೀಹೈಡ್ರೇಟ್ ಆಗ್ದಂಗೆ ನೋಡ್ಕೊಳ್ಳಿ. ನಮ್ ದೇಹಕ್ಕೆ ಅಗತ್ಯ ಇಲ್ದೇ ಇರೋಷ್ಟು ನೀರು ಸಿಗದಿದ್ದಾಗ್ಲೂ ಈ ರೀತಿ ಆಗುತ್ತೆ. ಹಾಗಂತೇಳಿ ಕಾಫಿ, ಟೀ, ಕೋಕ್ ಅದೂಇದೂ ಅಂತ ಕುಡಿದ್ರೆ ಆರೋಗ್ಯ ಇನ್ನಷ್ಟು ಕೆಡುತ್ತೆ. ಚೆನ್ನಾಗಿ ನೀರು ಕುಡೀರಿ ಸಾಕು. ಇದ್ರಿಂದ ದೇಹದ ಅಂಗಗಳು ಚುರುಕಾಗಿ ಕೆಲಸ ಮಾಡ್ತಾವೆ. ಸುಸ್ತಾಗಲ್ಲ. ಒಳ್ಳೆ ನಿದ್ದೆ ಬರುತ್ತೆ. ಆಕಳಿಕೆ ತೂಗಡಿಕೆ ಎಂತದ್ದೂ ಬರಲ್ಲ.

3. ಹಾಳೂಮೂಳು ತಿನ್ನೋದ್ರಿಂದ್ಲೂ ಬೆಳಗ್ಗೆ ಹೊತ್ತು ಆಕಳಿಕೆ ಬರುತ್ತೆ

ನಮ್ ದೇಹಕ್ಕೆ ಬೇಕಾಗಿರೋಂತ ಪುಷ್ಟಿಕರವಾದ ಆಹಾರ ಬಿಟ್ಟು ಎಣ್ಣೆ ಜಾಸ್ತಿ ಇರೋಂತ, ಕರಿದ ಉರಿದ, ಜಂಕ್ ಫುಡ್ ತಿನ್ನೋದ್ರಿಂದ್ಲೂ ಈ ರೀತಿ ಸಮಸ್ಯೆ ಬರುತ್ತೆ. ಜಂಕ್ ಫುಡ್ ರುಚಿರುಚಿಯಾಗಿರುತ್ತೆ. ಆದರೆ ಅದ್ರಿಂದ ನಮ್ ದೇಹಕ್ಕೆ ಪೌಷ್ಟಿಕಾಂಶಗಳು ಸಿಗಲ್ಲ. ಇದ್ರಿಂದ ಸುಸ್ತಾಗೋದು, ಮಂಕ್ ಕವಿದಂಗಿರೋದು ಆಗಿ ಆಕಳಿಕೆ ಶುರುವಾಗುತ್ತೆ. ಆರೋಗ್ಯದ ದೃಷ್ಟಿಯಿಂದ ಜಂಕ್ ಫುಡ್ ಬಿಡೋದು ಒಳ್ಳೇದು. ಆಗ ಬೆಳಗ್ಗೆ ಹೊತ್ತು ಆಕಳಿಕೆ ಬರೊಲ್ಲ.

4. ಕೆಲವು ತರದ ಆರೋಗ್ಯದ ಸಮಸ್ಯೆಗಳು ಇದ್ದರೂ ಹೀಗಾಗುತ್ತೆ

ಮೇಲೆ ಹೇಳಿದ ಕಾರಣಗಳ್ಳದೆ ಕೆಲವೊಂದು ಆರೋಗ್ಯ ಸಮಸ್ಯೆಗಳಿಂದ್ಲೂ ಈ ರೀತಿ ಆಗೋ ಚಾನ್ಸ್ ಇದೆ. ವಿಟಮಿನ್ ಕೊರತೆ, ರಕ್ತದ ಕೊರತೆ, ಥೈರಾಯ್ಡ್ ಪ್ರಾಬ್ಲಂ ಇನ್ನೂ ಬೇರೆ ಏನಾದ್ರೂ ಆರೋಗ್ಯ ಸಮಸ್ಯೆಗಳಿರ್ಬೋದು. ಡಾಕ್ಟರ್ ಹತ್ರ ಎಲ್ಲಾ ಪರೀಕ್ಷೆಗಳನ್ನ ಮಾಡಿಸ್ಕೊಳ್ಳೋದ್ರಿಂದ ಏನ್ ಪ್ರಾಬ್ಲಂ ಅಂತ ಗೊತ್ತಾಗುತ್ತೆ. ಹಾಗಂತ 'ಸ್ವಯಂ ವೈದ್ಯ' ಮಾಡ್ಕೊಳ್ಳೋದಕ್ಕೆ ಹೋಗ್ಬೇಡಿ. ಇದ್ದಕ್ಕಿದ್ದಂತೆ ವ್ಯಾಯಾಮ ಮಾಡೋದು, ವಾಕಿಂಗ್ ಹೋಗೋದು ಬೇಡ. ವೈದ್ಯರನ್ನ ಭೇಟಿ ಆಗೋದು ಉತ್ತಮ. ಯಾಕಂದ್ರೆ ನಿಮ್ ಆರೋಗ್ಯಾನ ಕಾಪಾಡ್ಕೊಳ್ಳೋದು ನಿಮ್ ಕೈಯಲ್ಲೇ ಇದೆ.

 

5. ಮೈ ಬಗ್ಗಿಸೋದು ಕಡಿಮೆ (ಅಥವಾ ಇಲ್ಲವೇ ಇಲ್ಲ) ಅಂದರೂ ಹೀಗಾಗುತ್ತೆ

ನಮ್ ದೇಹಕ್ಕೆ ವ್ಯಾಯಾಮ ಬೇಕೆ ಬೇಕು. ಇಲ್ಲಾ ಅಂದ್ರೆ ಒಳ್ಳೆ ನಿದ್ದೆ ಬರಲ್ಲ. ವ್ಯಾಯಾಮವನ್ನ ಜೀವನದಲ್ಲಿ ಒಂದು ಭಾಗ ಆಗಿರ್ಬೇಕು. ದಿನನಿತ್ಯ ಮಾಡ್ಲೇಬೇಕು. ಇಲ್ಲಾ ಅಂದ್ರೆ ದೇಹಕ್ಕೆ ಒಳ್ಳೆ ನಿದ್ದೆ ಸಿಗಲ್ಲ. ಇದ್ರಿಂದ ಬೆಳಗ್ಗೆ ಹೊತ್ತು ಆಕಳಿಸೋದು ಜಾಸ್ತಿ ಆಗುತ್ತೆ. ದಿನನಿತ್ಯ ದೈಹಿಕವಾದಂತ ವ್ಯಾಯಾಮ ಮಾಡ್ಲೇಬೇಕು. ಆಗ ಈ ಸಮಸ್ಯೆ ಇರಲ್ಲ. 

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ:

ನಿಮ್ಮ ಲೈಕೇ ನಮಗೆ ಪ್ರೇರಣೆ. ಕಳ್ಕೊಳಕ್ಕೇನಿದೆ? ಮಾಡಿಬಿಡಿ!

ವಿಜ್ಞಾನದ ಪ್ರಕಾರ ಚಂದ್ರ ಇಲ್ಲದೆ ಹೋದರೆ ಭೂಮಿಗೆ ಏನಾಗುತ್ತೆ ಅಂತ ಕೇಳಿ ಆಶ್ಚರ್ಯ ಪಡ್ತೀರಿ

ಯೋಚನೇನೂ ಮಾಡಕ್ಕಾಗಲ್ಲ

ನಮ್ಮ ಭೂಮಿಗೆ ತುಂಬಾ ಹತ್ತಿರದವನು ಚಂದ್ರ. ಭೂಮಿ ಮೇಲಿರೋ ಎಲ್ಲಾ ಜೀವಿಗಳ ವಿಕಾಸಕ್ಕೆ ಸಹಾಯ ಮಾಡಿರೋದು ಮಾತ್ರ ಅಲ್ಲ, ನಮ್ಮ ಭೂಮಿ ಸರಿಯಾಗಿ ವಿಕಾಸ ಆಗಕ್ಕೂ ಸಹಾಯ ಮಾಡಿದಾನೆ ಅಂತಾರೆ. ಸುಮಾರು 4.5 ಬಿಲಿಯನ್ ವರ್ಷಗಳ ಹಿಂದೆ ಮಂಗಳ ಗ್ರಹದಷ್ಟು ದೊಡ್ಡದಾಗಿರೋ ಒಂದು ಗ್ರಹದ್ ಚೂರು ನಮ್ಮ ಭೂಮಿಗೆ ಬಡೀತಂತೆ. ಆಗ ಹುಟ್ಟಿದೋನೇ ಚಂದ್ರ. ಭೂಮಿಯಿಂದ ಬೇರೆ ಆದ್ರೂ ಅದಿಕ್ಕೆ ಅಂಟ್ಕೊಂಡೇ ಅವತ್ತಿಂದ ಸುತ್ತಾ ಇದಾನೆ.

ಅದೇನೋ ಸರಿ; ಇವನೇನಾದ್ರೂ ಇಲ್ದೇ ಹೋದ್ರೆ ಏನಾಗತ್ತೆ? ಈ ಕೆಳಗಿನ ಐದು ಅಂಶ ಅಂತೂ ಗ್ಯಾರಂಟಿ ಅನ್ನತ್ತೆ ವಿಜ್ಞಾನ. ನೀವೇ ನೋಡಿ...

1. ರಾತ್ರಿ ಕತ್ಲೋ ಕತ್ತಲು!

ಚಂದ್ರ ಇಲ್ದೇ ಇದ್ರೆ ರಾತ್ರಿ ಕತ್ಲು ಸಿಕ್ಕಾಪಟ್ಟೆ ಜಾಸ್ತಿ ಆಗತ್ತೆ. ಚಂದ್ರ ಬಿಟ್ರೆ ದೊಡ್ಡದಾಗಿ ಕಾಣೋದು ಶುಕ್ರ. ಆದ್ರೆ ಶುಕ್ರನ್ ಬೆಳಕು ಕತ್ಲೆ ಹೋಗ್ಸಲ್ಲ. ಶುಕ್ರ ತುಂಬಾ ದೊಡ್ಡದಾಗಿ ಕಾಣ್ವಾಗ ಇರೋದಕ್ಕಿಂತ ಪೂರ್ಣಚಂದ್ರ 2000 ಪಟ್ಟು ದೊಡ್ಡದಾಗಿ ಕಾಣ್ತಾನೆ.

2. ವರ್ಷದಲ್ಲಿ 1,100-1,400 ದಿನ, ದಿನಕ್ಕೆ 6 - 8 ಗಂಟೆ ಆಗೋಗತ್ತೆ

ಯಾಕಂದ್ರೆ ಭೂಮಿ ತಿರುಗೋದಿಕ್ಕೆ ಚಂದ್ರ ಒಂಥರಾ ಬ್ರೇಕ್ ಹಾಕಿದಾನೆ. ಅವನ ಗುರುತ್ವಾಕರ್ಷಣೆಯಿಂದ ಭೂಮಿ ಸ್ಪೀಡು ಕಮ್ಮಿ ಆಗಿದೆ. ಈ ಬ್ರೇಕ್ ಇಲ್ದೇ ಇದ್ರೆ ಭೂಮಿ ಇನ್ನೂ ತುಂಬಾ ವೇಗವಾಗಿ ತಿರುಗ್ತಾ ಇತ್ತು. ಕಣ್ಮುಚ್ಚಿ ಕಣ್ ತೆಗೆಯೋದ್ರಲ್ಲಿ ಒಂದು ದಿನ ಮುಗಿಯತ್ತೇನೋ, ಚಂದ್ರ ಇಲ್ದಿದ್ರೆ

3. ಸಮುದ್ರದಲ್ಲಿ ಅಲೆಗಳು ಏಳಲ್ಲ

ಸೂರ್ಯ ಭೂಮಿಗಿಂತ 400 ಪಟ್ಟು ದೊಡ್ಡದು, ಸುಮಾರು 400 ಪಟ್ಟು ದೂರಾನೂ ಇದೆ. ಅದಕ್ಕೆ ಇವೆರಡೂ ಭೂಮಿಯಿಂದ ಒಂದೇ ಗಾತ್ರ ಇರೋ ಹಾಗೆ ಕಾಣೋದು. ಸೂರ್ಯ ಚಂದ್ರಂಗಿಂತ 27 ಮಿಲಿಯನ್ ಪಟ್ಟು ದೊಡ್ಡದಾಗಿದೆ. ಹಾಗಂತ ಚಂದ್ರ ಇಲ್ದೆ ಹೋದ್ರೆ ಸಮುದ್ರದಲ್ಲಿ ಏಳೋ ಅಲೆ ಇನ್ನೂ ದೊಡ್ದ ಗಾತ್ರದ್ದಿರತ್ತೆ ಅಂತ ಅನ್ಕೊಂಡ್ರೆ ತಪ್ಪು. ಸೂರ್ಯನಿಂದ ಉಂಟಾಗೋ ಅಲೆಗೆ ಚಂದ್ರನ ಅಲೆಯ 40% ಶಕ್ತಿ ಮಾತ್ರಾನೇ ಇರೋದು. ಈಗ ಉಕ್ಕೋ ಎತ್ರಕ್ಕಿಂದ ಕಾಲು ಭಾಗ ಉಕ್ಕತ್ತೇನೋ ಅಷ್ಟೇ.

4. ಗ್ರಹಣಗಳೇ ಆಗಲ್ಲ

ಚಂದ್ರಗ್ರಹಣಾನೂ ಇಲ್ಲ; ಸೂರ್ಯಗ್ರಹಣಾನೂ ಇಲ್ಲ – ಸೂರ್ಯ ಮತ್ತೆ ಭೂಮಿ ಮಧ್ಯ ಯಾರೂ ಬರಲ್ವಲ್ಲ ಆಗ. ಚಂದ್ರ ಬಿಟ್ರೆ ಭೂಮಿ ಮತ್ತೆ ಸೂರ್ಯನ ಮಧ್ಯೆ ಹಾಯೋದು ಶುಕ್ರಗ್ರಹ ಮಾತ್ರ. ಅಂದ್ರೆ ಶುಕ್ರಗ್ರಹಣ! ಅದ್ಯಾವಾಗಾಗತ್ತೋ ಯಾರ್ ಬಲ್ರು?

5. ಪರಿಸರದಲ್ಲಿ ಏನೇನೋ ಏರುಪೇರುಗಳಾಗುತ್ತವೆ

ಚಂದ್ರ ಭೂಮಿನ ಹಿಡ್ಕೊಂಡಿದಾನೋ, ಅಥವಾ ಭೂಮಿ ಚಂದ್ರನ್ನ ಹಿಡ್ಕೊಂಡಿದ್ಯೋ! ಅಂತೂ ಇವೆರಡೂ ಒಂದನ್ನೊಂದು ಕಂಟ್ರೋಲ್  ಮಾಡ್ತಿವೆ. ಆದ್ರೆ ಚಂದ್ರ ಇಲ್ದೇ ಇದ್ರೆ ಭೂಮಿ ಅಕ್ಷರೇಖೆ ಆಗ್ಗಾಗ್ಗ ವಿಪರೀತವಾಗಿ ಅಚಾನಕ ಬದಲಾಗಿ ಬಿಡತ್ತೆ. ಈಗ ಚಂದ್ರನ ಪ್ರಭಾವದಿಂದ ಸರಿಯಾಗಿ 23.5 ಡಿಗ್ರೀನಲ್ಲೇ ತಿರುಗ್ತಾ ಇದೆ. ಚಂದ್ರ ಏನಾರ ಇಲ್ಲಾ ಅಂದ್ರೆ ಭೂಮಿ ತುಂಬಾ ತಿರಗ್ ಬಹುದು ಅಥವಾ ತಿರಗ್ದೇ ನೆಟ್ಟಗೆ ಇರಬಹುದು. ಆಗ ಋತುಗಳೇ ಇಲ್ದೇ ಹೋಗಬಹುದು; ಅಥವಾ ವಿಚಿತ್ರ ಅನ್ನೋ ತರ ಋತುಗಳು ಬರಬಹುದು. ನಾವು ಬುಧಗ್ರಹದ್ ತರ ಸಮತಟ್ಟಾಗಿ ಸುತ್ತಾ ಇರ್ತೀವಿ ಅಥವಾ ಯುರೇನಸ್ ತರ ಚಿತ್ರವಿಚಿತ್ರ ವಾತಾವರಣದಲ್ಲಿ ಬಿದ್ದು ಹೊರಳಾಡ್ತಿರ್ತೀವಿ!!

ಅದಕ್ಕೇ ಹೇಳೋದು, ಭೂಮಿಗೂ ಸೂರ್ಯಂಗೂ ಮಧ್ಯ ಏನೇನೇ ಬಂದ್ರೂ, ಭೂಮಿಗೂ ಚಂದ್ರಂಗೂ ಮಧ್ಯ ಏನೂ ಬರೋದಿಲ್ಲ ಅಂತ. ಅಂತ ಅಪೂರ್ವವಾದ ಸಂಬಂಧ ಭೂಮಿ-ಚಂದ್ರಂದು. ಅಲ್ವಾ?

ಹಂಚಿಕೊಳ್ಳೋದು ಒಳ್ಳೆಯದು, ಹಂಚಿಕೊಳ್ಳಿ: